Titiraki Aika Kaekaaki Man te Baibara

E aera ngkai e aranaki Iesu bwa Natin te Atua?

Bon akea buun te Atua are e na riki iai bwa te karo ae iai natina. Boni Ngaia te tia Kariki baika a maiu ni kabane. A karikaki aomata ma te konabwai ni katotonga aroaron te Atua. Anne bukina ngkai e atongaki te moan aomata are e karikia te Atua are Atam bwa “natin te Atua.” N aron naba anne, e atongaki Iesu bwa “Natin te Atua” ibukina bwa e karikaki ma aroaro aika titeboo ma aroaron Tamana.​—Wareka Ruka 3:38; Ioane 1:​14, 49.

E karikaki n ningai Iesu?

E karikaki Iesu iroun te Atua imwaini karikan Atam. Ni koauana, e karikaki Iesu iroun te Atua ao imwina e kamanenaaki bwa e na karikii bwaai ni kabane, n ikotaki naba ma anera. Anne bukina ngkai e taekinaki Iesu n te Baibara bwa “te moanibung i buakoni baika karikaki ni kabane,” iroun te Atua.​—Wareka I-Korote 1:​15, 16.

Bon te anera Iesu ae mena i karawa imwaini bungiakina i Betereem. E kamwainga maiun Iesu nakoni birotoni Maria te Atua ngke e a roko te tai are e a tia ni baireia, bwa e aonga ni kona ni bungiaki ao n riki bwa te aomata.​—Wareka Ruka 1:​30-32; Ioane 6:38; 8:23.

E aera ngke e kariaia te Atua bwa e na bungiaki Iesu i aon te aba ao n riki bwa te aomata? Tera mwiokoan Iesu ae okoro are e kakororaoia? Ko kona n nori kaekaan titiraki akanne n te Baibara, ao a na rangi ni kabatiaa riki am atatai ao am kakaitau n te bwai are e a tia ni karaoia Iesu ma Iehova ibukim.