Iesu—Boni Kiingin te Maiu ae Rangi ni Manena

E KOAUA bwa e rangi ni manena maiun Iesu? E teretere raoi bwa e kaikawaaki Iesu n te tabo ae mangori ao a aki rangi ni bati ana bwai ni maiuna ni kabane. Bon ‘akea nneni kawenean atuna.’ (Ruka 9:​57, 58) Irarikin anne, e riribaaki, e uaraoaki, ao n tokina e a tiringaki irouia taan riribaia.

Ko kona n iango ni kangai: ‘Tiaki anne te aeka ni maiu ae I iangoia bwa e rangi ni manena!’ Ma e bati riki te bwai ae ti riai n iangoia ibukini maiun Iesu. Ti na neneri aua mai iai.

1. ANA KANTANINGA IESU I NANONI MAIUNA BONI KARAOAN NANON TE ATUA.

“Kanau boni karaoan nanon teuare kanakomaiai.”​—Ioane 4:34.

E kakorakoraa Iesu ni kakoroi bukin ana kantaninga Tamana are i karawa ae Iehovaa rinanon ana taeka ma ana mwakuri. E namakina te kimwareirei ni karaoan nanon te Atua. E boni kabotaua karaoan anne ma te amwarake n aron ae kaotaki n te kibu ane e a tibwa mwaneweaki. Ti na rinanoi aaro tabeua ake e karaoa iai te kabotau anne.

E taekin taeka akanne Iesu tao n te tawanou. (Ioane 4:6) E a tia n ririanna rimarenan aaba aika tabukibuki i Tamaria n te ingabong anne ni kabane, ao e boni bae ni baki. Ni koauana, a kaumakia taan rimwina ni kangai: “Rabi, amwarake.” (Ioane 4:31) E oti n ana kaeka bwa e bon namakinna bwa e nuai raoi ao kakorakoraaki mani karaoan ana mwakuri te Atua. E aki ngkanne kinaaki n anne bwa bon te mwaane ngaia ae manena maiuna?

2. E KORAKORA TANGIRAN TAMANA.

“I tangira te Tama.”​—Ioane 14:31.

E rangi ni kaan ana iraorao Iesu ma Tamana i karawa. Ibukini korakoran tangiran te Atua irouna, e a kaungaaki bwa e na kaotiota Tamana, Arana, ana kantaninga ao aroarona. E kororaoi kaotiotan Tamana rinanon ana taeka, ana mwakuri ao aroarona n te aro are ti a noria iroun Iesu ae bannan Tamana. Mangaia are ngke e titirakinaki Iesu irouni Biribo ni kangai: “Kaota te Tama nakoira,” ao e kaeka Iesu ni kangai: “Ane e a tia n norai ao e a tia naba n nora te Tama.”​—Ioane 14:​8, 9.

E korakora tangiran te Atua iroun Iesu ngaia are e kukurei n ongeaba irouna ni karokoa matena. (I-Biribi 2:​7, 8; 1 Ioane 5:3) E manena maiun Iesu ngkai e korakora te aeka n tangira anne irouna.

3. E TANGIRIIA AOMATA IESU.

“Akea te tangira iroun te aomata ae korakora riki nakon aei, ae e na anga maiuna ibukia raoraona.”​—Ioane 15:13.

Ibukin aki kororaoira, a a kananokawaki ara kantaninga ibukini maiura nakon taai aika imwaira. E kabwarabwaraaki n te Baibara ni kangai: “Aron rokon te bure irouia kaain te aonnaba mairoun te mwaane ae tii temanna [ae Atam] ao rokon te mate n te bure, ao e a ituia aomata ni kabane te mate ibukina bwa a bane ni bure.” (I-Rom 5:12) Ti aki kona ni birinako mani mwin te bure ae te mate.​—I-Rom 6:23.

Ti rangi ni kakaitau bwa e a tia Iehova ni karekea tokin aei nakon te botannaomata n te aro ae tatangira. E kataua Natina ae Iesu are kororaoi ma n akea ana bure bwa e na kammarakaki ao ni mate, bwa e aonga ni katauraoa te karea ni kaboomwi ibukini kamaiuaia botannaomata man te tautoronaki n te bure ao te mate. E kaungaaki Iesu ibukin tangiran Tamana ao aomata bwa e na kukurei ni karaoa aei ao n anga maiuna ae kororaoi ibukira. (I-Rom 5:​6-8) E rangi ni manena maiuna ibukin ana tangira ae korakora ibukia aomata.b

4. E ATAIA IESU BWA E TANGIRAKI IROUN TAMANA AO E KAKATONGA IROUNA.

“Bon Natiu ae I tangiria teuaei, ae I kakatonga irouna.”​—Mataio 3:17.

Bon akanne ana taeka Iehova mai karawa ni bwabetitoan Iesu. Ai ngaia are e boni kaota raoi nanona Iehova bwa e tangira Natina ae Iesu ae kakatongana irouna. Maroaka are e a katuruturua iai ni kangai Iesu: ‘E tangirai te Tama’! (Ioane 10:17) E ninikoria Iesu ni kaitaraa ribaakina ao kabuakakaana kioina ngkai e ataia bwa e tangiria Tamana ma ni kakatonga irouna. E buokaki naba man anne ni kaitaraa te mate. (Ioane 10:18) Akea te nanououa bwa e a rangi ni korakora riki manenani maiun Iesu ngkai e a namakinna raoi bwa e tangiria Tamana ma ni kakatonga irouna.

Ni koauana, e bon rangi ni manena maiun Iesu. E teretere raoi bwa ti kona n reiakina ae bati mairouna ibukin arora ae ti na maiuakina iai te maiu ae rangi ni manena. A na rinanoaki n te kaongora ae imwina, taeka n reirei aika mataata ake e angania taan rimwina Iesu ni kaineti ma aroni maiuia.