Aron Iesu Ni Kamoamoaa Raoiroin Te Atua

“E anga Kristo te Atua bwa te kareanraoi ike a a raoiakinaki iai aomata rinanon onimakinan raraani Kristo. E karaoa aei te Atua bwa e aonga ni kaotia bwa e eti arona.”​—I-ROM 3:25.

1, 2. (a) Tera reireiara man te Baibara ni kaineti ma aroia aomata? (b) Baikara titiraki aika a na rinanoaki n te kaongora aei?

E RANGI n ataaki rongorongon te karitei n te onnaroka are i Eten ae taekinaki n te Baibara. Ti bane n rotaki ni mwin ana bure Atam n aron ae kabwarabwaraaki ni kangai: “Rokon te bure irouia kaain te aonnaba mairoun te mwaane ae tii temanna ao rokon te mate n te bure, ao e a ituia aomata ni kabane te mate ibukina bwa a bane ni bure.” (I-Rom 5:12) E ngae ngkana ti kakorakoraira ni kakaraoa ae raoiroi ma ti boni kakairua naba, ngaia are ti kainnanoa kabwaraan ara bure mairoun te Atua. E bwaebwaeti naba te abotoro Bauro ni kangai: “I aki karaoa te raoiroi ae I kani karaoia, ma I kakaraoa te buakaka ae I aki kani karaoia. Ai kananoangara ngai!”​—I-Rom 7:19, 24.

² Ngkai bon taani bure ngaira ni kabane, ti riai n titirakinira baika kakawaki aikai: E kanga ni bungiaki Iesu are te I-Natareta ao e aki ituaki n rikiaia aomata ae te bure, ao e aera ngke e bwabetitoaki? E kanga ni kamoamoaaki raoiroin Iehova ni maiun Iesu? Ma ae te kabanea ni kakawaki, tera ae kakororaoaki ni mateni Kristo?

Te Karitei Nakon Raoiroin te Atua

3. E kanga Tatan ni mwamwanaa Ewa?

³ A aki wanawana ara moani karo ake Atam ma Ewa ngke a rawa nakon ana tautaeka te Atua bwa a kan tautaekanaki iroun “te naeta nikawai, are arana te Riaboro ao Tatan.” (Te Kaotioti 12:9) Iangoia bwa e kanga n riki aei. E kananououaa raoiroin ana waaki n tautaeka Iehova ae te Atua Tatan ngke e titirakina Ewa ni kangai: “E koaua ke e aki ba E kangai te Atua, Kam na tai amarake mani kaai ni kabane aika i nanon te ne n aroka aei?” E taekina ana tua te Atua ae mataata Ewa bwa iai te kai ae okoro ae a na aki ringnga bwa a kaawa ni mate. Ma Tatan te Riaboro e kabuakakaa te Atua n ana kewe ae kangai: “Kam na bon aki mate.” E reitaanako mwamwanaakin Ewa bwa e aonga ni kakoauaa ae aongkoa e taua te bwai ae raoiroi te Atua ngke e tuangnga bwa ngkana e kana te uaanikai, ao e na riki bwa kaanga te Atua ike e a inaomata iai ni bairea ae riai i bon irouna.​—Karikani Bwaai 3:1-5, BG.

4. A a kanga naba ni mena aomata i aan te tautaeka ae kaiangatoa ae kairaki iroun Tatan?

⁴ E bon nanonna Tatan bwa a na kukurei riki aomata ngkana a aki tautaekanaki iroun te Atua. E aki boutokaa raoiroin ana tautaeka te Atua Atam, ma e ongo riki irouni buuna ao e a manga kana te uaanikai are e tabuaki. Ngaia are e a urua kororaoina i matan Iehova ao e a anganira iai te amo ae karawawataira ae te bure ao te mate. N te tai naba anne, e a kairiia aomata nako aan te tautaeka ae kaiangatoa ae kairaki iroun Tatan, ae “atuan aon te aba.”​—2 I-Korinto 4:4, BG; I-Rom 7:14.

5. (a) E kanga ni kakoroa bukin ana taeka Iehova? (b) Tera te kantaninga are e anga te Atua nakoia kanoan Atam ao Ewa?

⁵ E kakoroa bukin ana taeka ae aki kona ni kairua Iehova ngke a a katuuaaeaki Atam ao Ewa n te mate. (Karikani Bwaai 3:16-​19) Ma tiaki nanona bwa e a aki koro bukin ana kantaninga te Atua. Boni kaitaraana raoi! Ngke e katuuaaeia Atam ma Ewa Iehova, ao e a manga karekea te kantaninga ae moan te raoiroi nakoia kanoaia n taai aika imwaia. E karaoa aei n taekinan ana kantaninga are e na kateirakea te “kariki” are e na kaikoakaki bukini waena iroun Tatan. Ma e na boni kamaoaki ikoakini bukini waen te Kariki are beritanaki ao e na ‘kaikoaka atun Tatan.’ (Karikani Bwaai 3:15, BG) E kabwarabwaraaki raoi te boto n iango aei n te Baibara n taekinan ae kangai ni kaineti ma Iesu Kristo: “Ibukin aei, ao e a kaotaki Natin te Atua, bwa e aonga n urui ana mwakuri te Riaboro.” (1 Ioane 3:8) Ma e kanga ni kamoamoaaki raoiroin te Atua n aroaron Iesu ao ni matena?

Nanon Ana Bwabetito Iesu

6. Ti kanga n ataia bwa e aki ituaki Iesu n te bure are mairoun Atam?

⁶ Ngke e a mwaane Iesu ao titeboo raoi ma Atam ngke e kororaoi ngkoa. (I-Rom 5:14; 1 I-Korinto 15:45) Nanon aei bwa e bungiaki Iesu ni kororaoi. E kanga ni kona n riki anne? E taekina te kabwarabwara ae mataata aei te anera are Kabiriera nakon tinan Iesu ae Maria: “E na ruoniko te taamnei ae raoiroi, ao e na rabuniko mwaakan Teuare Moan te Rietata. Ao ibukin anne, e na atongaki te nati are e bungiaki bwa e tabu ae Natin te Atua.” (Ruka 1:35) Ngke e uarereke Iesu, tao e bae Maria n taekini koaua tabeua nakoina ibukini bungiana. Ai ngaia are n te taina ngke e kuneaki Iesu n ana tembora te Atua irouia Maria ma Ioteba are e kaikawaia, ao e titirakinia ni kangai te ataei aei: “Kam aki ataia ae N na bae ni mena n umwan Tamau?” (Ruka 2:49) E teretere iai bwa e ataia Iesu man uarerekena bwa bon Natin te Atua ngaia. Mangaia are e rangi ni kakawaki irouna kamoamoaan raoiroin te Atua.

7. Baikara ana bwai Iesu aika kakawaki?

⁷ E kaota korakoran tangirani baika irekereke ma te onimaki Iesu n arona ni katoatai n irii botaki n taromauri. Ibukina bwa e kororaoi ana iango, e bae n tia n reiakin ao n ota raoi ni bwaai ni kabane ake e ongoraei ao ni wareki n te Baibara n te Taetae n Ebera. (Ruka 4:16) Iai riki irouna ana bwai ae kakawaki ae bon rabwatana n aomata ae kororaoi ae kona ni kareanaki ibukia aomata. E tataro Iesu ngke e bwabetitoaki ao tao e iaiangoi naba taetae ni burabeti ake n Taian Areru 40:6-8.​—Ruka 3:21; wareka I-Ebera 10:5-​10.a

8. E aera Ioane te tia Bwabetito ngke e kataia n tuka Iesu mani bwabetitoakina?

⁸ N te moantai, e kan tuka Iesu mani bwabetitoakina Ioane te tia Bwabetito. Bukin tera? Ibukina bwa e bwabetitoiia I-Iutaia Ioane ae kanikinaean aia rairannano man aia bure n uruan te Tua. Ngkai Ioane bon ana koraki ni kaan Iesu, e bae n ataia ae e raoiroi Iesu ngaia are e aki kainnanoa te rairannano. Ma e karaua nanona Iesu bwa e bon riai bwabetitoana ao e kamataataa ni kangai: “N te aro aei ti na kakororaoa iai ae raoiroi.”​—Mataio 3:15.

9. Tera ae nanonaki ni bwabetitoan Iesu?

⁹ Ngkai bon te aomata ae kororaoi Iesu e kona n iangoia bwa n aron Atam, e kona naba n riki bwa tamaia aomata aika kororaoi. Ma e aki kani karekea te aeka ni maiu anne Iesu nakon taai aika imwaina, bwa tiaki anne ae e kantaningaia Iehova ibukina. E kanakoaki Iesu iroun te Atua nako aon te aba bwa e na kakoroa bukini mwiokoan te Kariki are beritanaki, ke te Mesia. E nanonaki naba n aei kareanakini maiuna n aomata ae kororaoi. (Wareka Itaia 53:5, 6, 12.) Ni koauana, e kaokoro nanon ana bwabetito Iesu ma ngaira. E aki irekereke ma te katabu nakon Iehova, ngkai e a kaman riki Iesu bwa kaain ana natannaomata te Atua ae katabuaki ae Iteraera. Ma e nanonaki ni bwabetitoan Iesu bwa e anga ngaia ibukini karaoan nanon te Atua n aron ae kabwarabwaraaki n te Baibara ibukin te Mesia.

10. Tera ae irekereke ma karaoan nanon te Atua iroun Iesu ngkai te Mesia ngaia, ao tera ana namakin iai?

¹⁰ E irekereke ana kantaninga Iehova ibukin Iesu ma tataekinan te rongorongo ae raoiroi ibukin Ana Tautaeka n Uea te Atua, karekeaia taan rimwini Kristo, ao kataneiaia n te mwakuri ibukini karekeaia taan rimwini Kristo n taai aika a na roko. E irekereke naba aron Iesu n anga ngaia ma kukureina n nanomwaaka i aan te bwainikirinaki ao matena ae rangi ni kammaraki, are e a boutokaa iai ana tautaeka ae raoiroi Iehova ae te Atua. Ibukina bwa e bon tangira raoi Tamana are i karawa Iesu, e a rangi ni kukurei ni karaoa nanona ao e namakina korakoran raun nanona n anga rabwatana bwa te karea. (Ioane 14:31) E kimwareirei naba n ataan ae e kona ni kareanaki nakon te Atua kakawakini maiuna ae kororaoi bwa te kaboomwi are e na kainaomataira man tautoronakira n te bure ao te mate. Te koaua bwa e kariaia te Atua aron Iesu n anga ngaia bwa e na aonnangai mwioko aika kokorakora aikai? E boni kukurei!

11. E kanga Iehova ni kaota kakatongana iroun Iesu ngkai te Mesia ae beritanaki ngaia ke Kristo?

¹¹ A kaota koauani kakatongan Iehova ae te Atua taani korei Euangkerio ake aua ni kabane, n te tai are e aerake iai Iesu man ranin te Karaanga ae Ioretan. E kakoauaa Ioane te tia Bwabetito ni kangai: “I nora te taamnei bwa e ruo n ai aron te taobe mai karawa, ao e tiku i aon [Iesu] . . . Ao I bon noria, ao I anga au kaotioti bwa teuaei bon Natin te Atua.” (Ioane 1:32-​34) Irarikina e kangai Iehova n te tai anne: “Bon Natiu ae I tangiria teuaei, ae I kakatonga irouna.”​—Mataio 3:17; Mareko 1:11; Ruka 3:22.

E Kakaonimaki ni Karokoa Matena

12. Tera are e karaoia Iesu i nanon tenua ma te iterana te ririki imwini bwabetitoana?

¹² E rangi n tabetabe Iesu n reiakinia aomata taekan Tamana ao raoiroin ana tautaeka te Atua i nanon tenua ao te iterana te ririki. E namakina te kua ngke e mwananga ni kabutaa aon te Aba ni Berita, ma akea te bwai ae kona n tukia mani kakororaoani kaotiotan te koaua. (Ioane 4:6, 34; 18:37) E reiakinia naba aomata taekan Ana Tautaeka n Uea te Atua. E kaotiota ae e na kakororaoia te Tautaeka n Uea ibukia aomata, n arona ni katoki aoraki n te kakai, kaamwarakeaia aomata aika baki aika bati ao kautaia naba maate.​—Mataio 11:4, 5.

13. Tera ana reirei Iesu ni kaineti ma te tataro?

¹³ N oneani mwin are e na kani kamoamoaaki Iesu ibukin ana reirei ao ana mwakuri ni katoki aoraki, e katea te katoto ae rianako n arona n nanorinano ni kairiia aomata bwa a na kamoamoaa Iehova. (Ioane 5:19; 11:41-​44) E katereterei naba baika rangi ni kakawaki ake ti riai n tataroi. Ti riai ni bubutii naba n ara tataro bwa e na “katabuaki” aran te Atua ae Iehova, ao e na ruamwiaki ana waaki n tautaeka ae buakaka Tatan n ana tautaeka ae raoiroi te Atua bwa e aonga ni “kakororaoaki [nanona] i karawa ao n te aonnaba naba.” (Mataio 6:9, 10.) E kaumakira naba Iesu bwa ti na kaboraoi maiura ma aeka n tataro aikai n arora n “ukoukora moa ana tautaeka n uea te Atua ma ana raoiroi.”​—Mataio 6:33.

14. Bukin tera bwa e kainnanoa kakorakoraana Iesu ni kakororaoani mwiokoana n ana kantaninga te Atua, e ngae ngke e kororaoi?

¹⁴ Ngke e a uakaan te tai are e nang kareana iai maiuna Iesu, ao e a rikirake n ataa rawawatan mwiokoana are e karaoia. E aanaki ana kantaninga Tamana ao karineana n nanomwaakan Iesu i aani kataakina ae ribuaka ao ni matena ae rangi ni kammaraki. E tataro ni kangai Iesu nimabong imwaini matena: “E a rawawata nanou ngkai, ma tera ae N na taekinna? Tamau, kamaiuai man te aoa aei. Ma e ngae n anne, bon aei bukin rokou n te aoa aei.” Imwini kaotiotan namakin aikai iroun Iesu aika rereke naba irouia aomata, e bwaina te atataiaomata ni kaatuuan riki ana iango i aoni baike a rangi ni kakawaki ao e tataro ni kangai: “Tamau, neboa aram.” E kaeka naba ngkekei Iehova ni kangai: “I a tia n neboia ao N na manga neboia riki.” (Ioane 12:27, 28) Eng, e kariaia Iesu bwa e na rinanoni kataakin ana kakaonimaki ae te kabanea ni kangaanga ae e kona n aitara te aomata ma ngaia. Ma ti kakoauaa raoi bwa ngke e ongo Iesu ana taeka Tamana are i karawa, e a kakorakoraaki iai n onimakinan ae e na bon tokanikai ni kamoamoaan ao ni kaotiotan riain Iehova n tautaeka. Ao e bon tokanikai!

Te Bwai ae Kakororaoaki ni Maten Iesu

15. Bukin tera bwa e taekina ae kangai Iesu imwain raoi matena: “E a tia!”?

¹⁵ E taku Iesu ngke e nang anaa kabanean ikena i buakon te maraki ae korakora n tinena i aon te kai ni kammaraki: “E a tia!” (Ioane 19:30) Ai batira baike e kakororaoi Iesu man ana ibuobuoki te Atua i nanon ririki ake tenua ma te iterana, mani bwabetitoana ni karokoa matena! E riki te mwaeiei ae korakora ni maten Iesu, ike e a kairaki iai te mataniwi n tautia are e kaira kamateana bwa e na kangai: “Bon te koaua bwa Natin te Atua teuaei.” (Mataio 27:54) N taraana, e nora Iesu te mataniwi aei ngke e kakanikoaki n taekinan are Natin te Atua ngaia. E kateimatoa kakaonimakina Iesu n aki ongei bwaai ni kabane ake a karawawataa ao e a kaota iai koauan ae Tatan bon te tia kewe ae rangi ni buakaka. E taekina ae kangai Tatan ibukia aomata nako ake a boutokaa ana tautaeka te Atua: “E tauraoi te aomata ni kaki bai ni kabane i bukini kawakinani maiuna.” (Iobi 2:4, BK) Ibukini kakaonimakin Iesu, e a kaota iai koauan ae a kona naba ni kakaonimaki Atam ao Ewa i aani kataakia are e rangi ni bebete. Ma ae te kabanea ni kakawaki i buakoni bwaai nako, e boutokaaki ao ni kamoamoaaki raoiroin ana tautaeka Iehova ni maiun ao ni maten Iesu. (Wareka Taeka N Rabakau 27:11.) Iai riki te bwai ae kakororaoaki ni maten Iesu? Eng, bon iai!

16, 17. (a) E aera ngkai a kona n taraaki iroun te Atua taani Kakoaua ake imwain aia tai Kristian bwa a raoiroi? (b) E kanga Iehova n angan Natina kaniwangana ibukini kakaonimakina, ao tera ae e teimatoa ni karaoia te Uea ae Iesu Kristo?

¹⁶ A bati ana toro Iehova ake a maiu imwain rokon Iesu i aon te aba. A taraaki iroun te Atua bwa a raoiroi ao a karekea kantaningaan te mangauti. (Itaia 25:8; Taniera 12:13) Ma e boto i aon te tua raa kakabwaiaaia aomata aika taani bure n te aro ae kamimi iroun te Atua ae Iehova ae tabu? E kabwarabwaraaki n te Baibara ni kangai: “E anga [Iesu] Kristo te Atua bwa te kareanraoi ike a a raoiakinaki iai aomata rinanon onimakinan raraani Kristo. E karaoa aei te Atua bwa e aonga ni kaotia bwa e eti arona ni kabwarai buure ake a karaoaki rimoa, ngke e taotaona nanona, ao e kaotiota naba arona ae eti n te tai aei, ngkai e atonga te aomata ae onimakina Iesu bwa e raoiroi.”​—I-Rom 3:25, 26.b

¹⁷ E angan Iesu kaniwangana ae te mangauti Iehova ao mwiokoana ae rietata riki nakon are e karekea imwain ruona nako aon te aba. E a karekea te aki mamate Iesu n rikina bwa te taamnei ae mimitong. (I-Ebera 1:3) Ngkai e a riki Iesu Kristo bwa te Ibonga ae Rietata ao te Uea, e a teimatoa ni buokiia taan rimwina ni kamoamoaa raoiroin te Atua. Ai kakaitaura ngaira ngkai Tamara are i karawa ae Iehova, bon te tia Karekei kaniwangaia aomata nako ake a kakaraoa aei ao ni kakaonimaki ni beku ibukina n aroia ni kakairi iroun Natina!​—Wareka Taian Areru 34:3; I-Ebera 11:6.

18. Tera te boto n iango n te kaongora ae imwina?

¹⁸ A karekei aia iraorao ae kaan ma Iehova aomata ake a kakaonimaki ni kabane ni moa mairoun Abera, ibukina bwa a kaotiota onimakinan ao kakoauaan raoi te Kariki are beritanaki. E ataia Iehova bwa e na kakaonimaki raoi Natina ao e na kabwarai n te aro ae kororaoi “aia bure kaain te aonnaba” ni matena. (Ioane 1:29) A kakabwaiaaki naba aomata aika maiu ni boong aikai ni maten Iesu. (I-Rom 3:26) Baikara ngkanne kakabwaiaam aika kona n reke man ana karea ni kaboomwi Kristo? E na reiakinaki anne n te kaongora ae imwina.

[Kabwarabwara ae nano]

Ko na Kanga ni Kaeka?

• A kanga ni karitei aomata nakon raoiroin te Atua?

• Tera ae nanonaki ni bwabetitoan Iesu?

• Tera ae kakororaoaki ni maten Iesu?

[Taamnei n iteraniba 10]

Ko ataa ae nanonaki ni bwabetitoan Iesu?