“I rangi n iowawa”

AROU RIMOA:

I ikawairake n te utu ae e aki rangi ni kaubwai n iteran te kaawa ae Turku ae te matabaiawa. Bon te tiambion tamau n te itau ao ti irekereke iai ma tariu ae e uarereke riki nakoiu. N angiin te tai, I irekereke ma te un n te reirei ao I baitii n oro n au timoi. Ngke I a roro n rikirake ao I kaaina te kaeng ae rangi ni kinaaki n aia mwakuri aika buakaka, ike I a rangi n iowawa riki iai. I tangiri naba katangitang aika rangi ni karongoa mani kaungai baika buakaka. Ao I a moanna ni miiakinna bwa N na riki bwa te tia anene ae tanoata taekau.

I kabooi taian turam ibukin te katangitang ao ni karekeia kaain au baen. I waekoa n riki bwa te tia anene n ara baen. I kani bwaini aroaro aika aki riai n te tabo n anene. Ti rangi ni kinaaki irouia angiia aomata ibukin aroarora n taetae ao anuara aika aki riai n ara baen n anene. Ti a moanna ni karaoa ara kamataku i mataia aomata aika rangi ni bati. Ti rawei naba kunara tabeua ao e korakora tangiran kabaneani kunara irouia aomata. N raatokin 1980 ao ti a nakon te United States ni karaoa ara kamataku iai bwa ti aonga n tanoata riki. Ti kamataku i New York ao i Los Angeles n tabetai, ao ti karekei naba ara itoman tabeman aika a rangi n ataaki n taabo ni bitineti ibukin te katangitang, imwain okiran Finland.

E ngae ngke I kukurei ni mena n te baen ni katangitang, ma I bon tangiria naba ni karekea maiu ae manena. I rangi n un n aroia taani bitineti n te katangitang ni kaiangatoa ao ni kakairiribai, ao e a moanna ni bwara nanou ni maiu ae e aki riai. I namakinna bwa bon te aomata ae buakaka ngai, ao I a rangi ni maaka are N na kabuekaki n te ai ni moone. I kataia ni kakaaea buokau ni bokin Aaro nako ao I kakorakoraai n tataro ibukin ana ibuobuoki te Atua, e ngae ngke I namakinna bwa I aki kona ni kakukureia.

ARONI BITAKINI MAIU MAN TE BAIBARA:

I mwakuri n te aobiti n reta n au kaawa ibukini boutokaani maiu. N te bong teuana, I a ataia bwa ngaia raou ni mwakuri temanna bon Ana Tia Kakoaua Iehova. I a tabeki au titiraki aika a rangi ni bati nakoina. E a anaaki nanou n ana kaeka man te Baibara aika eti, ngaia are I a reirei ma ngaia n te Baibara. Imwin reireiu i nanon tabeua te wiki, e kaoaki au baen ni katangitang bwa e na raweaki bwanaara ao ni kaboonakoaki n te United States. I iangoia bwa bon aei te kakabwaia nakoira.

I tuanga te tia Kakoaua are e reirei ma ngai, bwa I rangi n tangiria ni karekea rawean bwanaara teuana riki te tai ma ni kaboonakoa, ao imwina I a maiuakini raoi booto n reirei man te Baibara. E bon aki kaota ana iango ma e tii tuangai bwa N na wareka ana taeka Iesu ni Mataio 6:24. E kangai te kibu anne: “Akea ae kona n toro irouia tooka aika uoman.” I rangi ni mimi ngke I a ataa nanon ana taeka Iesu anne. Ma imwin tabebong, e a manga boo ana tai ni mimi au tia reirei n te Baibara! I bon tuangnga ae I a aikoa kaaina te baen ni katangitang bwa I kani kakairi iroun Iesu!

Ai aron te tirotaam te Baibara are e kaotii nakoiu aroarou aika bubuaka. (Iakobo 1:​22-25) I noria n anuau bwa I rangi n iowawa. I kainikatonga, ao n rangi ni mwangainrangia te kani kaubwai. I kakamanenai taetae aika a bubuaka, I unun, I moko, ao I manging n te aro ae riao. Ngke I a ataia bwa a bati aroaroni maiu aika a kauntaba ma booto n reirei n te Baibara, I a namakina te bwarannano. E ngae n anne, I tauraoi ni karaoi bitaki aika kainnanoaki.​—I-Ebeto 4:​22-24.

Ni moanakin au reirei, e bon taonai riki te nanokawaki ibukin au bure ngkoa. Ma e rangi n ibuobuoki te tari are e kaira au reirei n te Baibara. E kaota nakoiu te bwai ae taekinaki n te Baibara n Itaia 1:18 (BG) ae kangai: “Ngkana tao ai aroni kunnikai aika uraura ami bure, ao a na riki ni mainaina n ai aron te tinoo.” I kakoauaa raoi n te kibu aei ao tabeua riki bwa e rangi n nanoanga Tamara are i karawa, ao e kani bauta ikoakia te koraki ake a raraoma ni koaua man aia bure.

Ngke I a kinaa raoi Iehova ao n tangiria, I a kani katabua maiu nakoina. (Taian Areru 40:8) I boni bwabetitoaki n 1992 n te bwabwaro ibukin aaba aika kakaokoro ibukia Ana Tia Kakoaua Iehova are e karaoaki i St. Petersburg, i Rutia.

AROU NI KAKABWAIAAKI:

A a rangi ni bati raoraou aika raoiroi i buakoia taan taromauria Iehova. Ti aki toki ni bobotaki ni katangitang n te aro ae riai ao ni kukurei n ana bwaintituaraoi te Atua aei. (Iakobo 1:17) I a kakabwaiaaki n te aro ae okoro ngke I a mare ma buu ae tangiraki ae Kristina. I ibuokanibwai ma ngaia ni baika bati n aron te kimwareirei, kangaangan te maiu ao ai uana naba ma ara tangira i marenara.

Ngke arona bwa I aki riki bwa temanna Ana Tia Kakoaua Iehova, tao N na bon aki maiu n te bong aei. I aki toki n taonaki ni kangaanga aika bati ao kabuanibwai n taai ake rimoa. Ma ngkai, e a rangi ni manena maiu ao I a namakinna bwa a nakoraoi bwaai ni kabane.