Te Maiu ae Rangi ni Manena E Kaota Aron Rekena Iesu
“Katotonga aron naba Kristo.”—1 Ioane 2:6, Te Baibara ni Katorika.
N ARON ae ti maroroakinna n te kaongora are imwain aei, e bon rangi ni manena maiun Iesu. Ngaia are ngkana ti tangiria bwa e na rangi ni manena maiura, ti wanawana ngkana ti kakairi n ana katoto ao ni kakauongo nakon ana taeka n reirei.
Ni koauana, e kaumakira Iehova bwa ti na karaoa raoi anne n aron ae taekinaki n te kibu ane mai eta. E irekereke katotongan Iesu ma bitakini maiura ni kabane ao touani mwin ana katoto ma ana reirei. Ni karaoan aei, ti na buokaki iai ni karekea akoara iroun te Atua ao maiura ae rangi ni manena.
Kanoan naba ana angareirei Iesu boni booto n reirei aika kona ni buokira bwa ti na katotonga naba maiuna. Ti a tia n atai booto n reirei aika bati aikai man ana Kabwarabwara i aon te Maunga ae rangi n ataaki. Ti na rinanoi booto n reirei tabeua ao arora ni kona ni maiuakini.
TE BOTO N REIREI: “A a kukurei akana ataia bwa a kainnanoa te Atua.”—Mataio 5:3.
ARONI BOUTOKAAN TE MAIU AE RANGI NI MANENA MAN TE BOTO N REIREI:
E taekinna Iesu bwa a kainnanoa ataakin te Atua aomata bwa bon anne rikiaia. Ti rangi ni kan atai kaekaan titiraki aikai: Tera bukini menara ikai? E aera ngkai e a rangi ni bati te rawawata i aon te aba? E tabeakinira raoi te Atua? Iai te maiu imwin te mate? Ti riai n atai kaekaan titiraki akanne bwa e aonga n rangi ni manena maiura. E ataia Iesu bwa tii teuana te tabo ae na reke iai kaekaan titiraki akanne bwa Ana Taeka te Atua. E taku Iesu ngke e tataro nakon Tamana: “Bon te koaua am taeka.” (Ioane 17:17) Ti kona ni buokaki n Ana Taeka bwa ti na ataia ae ti kainnanoa te Atua?
TE KATOTO MAN TE RONGORONGO AE KOAUA:
Ngkai Esa bon te tia anene ae rangi n onimakinaki n te baen ni katangitang teuana ae rangi n ataaki, e na bae n tanoata taekana bwa te tia anene. Ma e ngae n anne, e namakinna naba Esa bwa e tuai tabwanin raoi kukureina. E taku: “E ngae ngke I kukurei ngkai I kaaina te baen ni katangitang, ma I rangi n tangiria bwa e na manena riki maiu.” Ma imwin tabeua te tai, e a kaitiboo ma temanna Ana Tia Kakoaua Iehova. E taku Esa: “I tabeki au titiraki nakoina aika rangi ni bati. Ao e anaaki nanou n ana kaeka mani kiibu aika eti, ai ngaia are I a kariaia ae N na reirei n te Baibara ma ngaia.” E rotaki nanon Esa ni baike e reiakin n ana reirei n te Baibara ao e a kaungaaki bwa e na katabua maiuna nakon Iehova. E taku: “I aki toki n tiotionako rinanoni kangaanga aika bati ao kabuanibwai n taai ake rimoa. Ma e a manena riki maiu ngkai.”a
TE BOTO N REIREI: “A a kukurei akana nanoanga.”—Mataio 5:7.
ARONI BOUTOKAAN TE MAIU AE RANGI NI MANENA MAN TE BOTO N REIREI:
E irekereke te nanoanga ma kaotiotan te atataiaomata nakoia aomata ao bwainan te akoi ao tabeakinaia naba. E kaotiota te nanoanga Iesu nakoia aomata ake a kainnanoa buokaia. E kairaki man ana nanoanga ae korakora bwa e na biririmoa ni kabebetei rawawataia. (Mataio 14:14; 20:30-34) Ngkana ti katotonga Iesu ni bwaina te nanoanga, ti a karakaa iai manenan maiura ibukina bwa a kukurei riki naake a kaotiota te nanoanga nakoia aomata. (Mwakuri 20:35) Ti kona ni kaotiota te nanoanga nakoia aomata rinanon ara mwakuri ma ara taeka aika irianaki n te akoi, ao kabebeteaia ake a kainnanoa ara ibuobuoki. E na raka riki marurungira ngkana ti bwaina te nanoanga?
TE KATOTO MAN TE RONGORONGO AE KOAUA:
Boni banna ni katoto Maria ma buuna ae Carlos ni kaotiotan te nanoanga. E a tia ni mate buun taman Maria, ao e a manga mwauku n ririki aika tibwa nako. A anaia nakoni mwengaia ao n tararuaia ni baike e kainnanoi ni kabane. A bati boong ake a aki bati ni matu raoi iai ao ni biriaitua naba n uotia nakon te onnaoraki ngkana e roko ana kangaanga ibukin tiokana. A taekinna naba bwa a a rangi ni kua n taai tabetai. Ma a kukurei n aron are e taekinna Iesu ibukina bwa a a rangi n rau nanoia ngkai a a tia ni karaoi bwaai ni kabane ake e kainnanoi tamani Maria.
TE BOTO N REIREI: “A a kukurei taan raoi.”—Mataio 5:9.
ARONI BOUTOKAAN TE MAIU AE RANGI NI MANENA MAN TE BOTO N REIREI:
Nanon te taeka ae “taan raoi” bon “te tia karekea te raoi.” E na kanga te tia karekea te raoi ni boutokaa maiuna bwa e na rangi ni manena riki? Te anga teuana, ti karekei ara iraorao aika raraoi riki ma aomata aika i rarikira. Ti wanawana ngkana ti mutiakina te taeka n reirei man te Baibara aei: “Karaoa ami kabanea ni kona ni karekea te rau ma aomata ni kabane.” (I-Rom 12:18) Te taeka ae “aomata ni kabane” e nanonaki iai kaain te utu ni kabane ao aomata ake tao a kaokoro ara onimaki ma ngaiia. E kona ni karakaa riki manenani maiura bwainan te raoi ma “aomata ni kabane”?
TE KATOTO MAN TE RONGORONGO AE KOAUA:
Iangoa rongorongon te ateiaine temanna ae Nair. Inanon ririki aika bati, ao e aitara neiei ma karawawata aika mwaiti ake a a riki bwa tuoana ibukini kateimatoaan te raoi ai moarara riki i nanon ana utu. E kaikawaiia natina n tii ngaia ngke e moani kitanaki irouni buuna tao 15 te ririki n nako. Iai ana kangaanga natina te mwaane temanna bwa e tautoronaki n tangiran te drug, ao n angiin te tai e a riao kamanenaana n te aro are e a ruanikai iai maiun neiei ma natina te aine. E kakoauaa Nair bwa e reke korakorana ni kaotiota te raoi i aan aeka ni kataaki aikai mani baike e reiakini man te Baibara. E kataia neiei n aki kauntaeka ke n un ibukini bwaai. E kakorakoraa naba ni bwaina te akoi, te atataiaomata ao n tauraoi ni kabwarai aia bure aomata. (I-Ebeto 4:31, 32) E kakoauaa raoi neiei bwa man reiakinan te raoi, e a kona n reke ana iraorao aika moan raraoi ma kaain ana utu ao aomata riki tabeman.
IAIANGOAN TAAI AIKA IMWAIRA
Ngkana ti tou mwin ana taeka n reirei Iesu aika manena, ti na boni karekea te kukurei ao te raunnano ni maiura. Ma ngkana ti kani karekea te maiu ae rangi ni manena, ti riai naba n atai baika a na riki n taai aika imwaira. Ni koauana, e na kanga n rangi ni manena maiura ngkana ti tii ataia ae ti na rikirake ni kara, ti na aoraki ao imwina ti mate? Eng, bon aikai baika a na riki ni maiura n te aonnaba aei.
Mangaia are bon aei te rongorongo ae raoiroi! A bati kakabwaia aika e kawakin Iehova ibukia te koraki ake a kakorakoraia ni “katotonga aron naba Kristo.” E berita Iehova bwa e na waekoa ni karokoa te waaki ae boou i aon te aba ike e mena iai te raoiroi. A na maeka iai aomata aika kakaonimaki ao ni maiuakina are e kantaningaia Iehova ike a nang karekea iai te marurung ae kororaoi. E kangai ana Taeka: “Noria! E a mena ana umwanrianna te Atua irouia aomata, ao e na maeka ma ngaiia ao a na riki bwa ana aomata. Ao te Atua e na boni memena irouia. Ao e na kaoa te rannimata ni kabane mai mataia, ao e nang akea riki te mate, ke te nanokawaki ke te tang ke te maraki. A a mauna bwaai rimoa.”—Te Kaotioti 21:3, 4.
E kimwareirei Maria are 84 ana ririki are e mwaneweaki n te moan rongorongo ni kaongora aika teuana imwin teuana ibukini kantaningaani kakororaoan taeka akanne. Ao ngkoe tera arom? Ko kan ataa ae bati riki ibukin “te maiu ni koaua” ae e na reke i aan Ana Tautaeka n Uea te Atua? (1 Timoteo 6:19) Ngkana ko kan ataia, ko kona n titirakinia Ana Tia Kakoaua Iehova akana n am tabo ke koroboki nakoia naake a boreetia te maekatin aei.b
a Ko kona ni wareka rongorongon Esa ni kabane n iteraniba 8-9 n te maekatin aei.
b A a tia ni buokaki aomata aika bati bwa a na reiakin reirei aika kakaokoro man te Baibara n te boki aeTera Ana Reirei ni Koaua te Baibara?, ae boreetiaki irouia Ana Tia Kakoaua Iehova, has helped many to make a topical study of the Scriptures.