Te Maiu ae Manena Ngkai ao n Aki Toki

KO KONA naba ni karekea maium ae manena ngkai. N te aro raa? Boni mani maiuakinani booto n reirei aika ibuobuoki n Ana Taeka te Atua ae te Baibara. Ti na neneri tii tabeua mai iai.

ANA BOTO N REIREI TE BAIBARA: “Akea ae raoiroi riki iroun te aomata nakon te amamarake ma te momoi, ma te kakukureia tamneina n te raoiroi i buakon ana makuri.” Aei are e koreia te Uea ae Toromon.​—TE MINITA 2:24, BG.

Ti karikaki bwa ti na karekei raun nanora n ara mwakuri aika raraoi. E ngae ngkana ko aitara ma kangaanga aika kakaiaki, ma ko kona ni karekea raun nanom ni maium ngkai man taningamaraum ni mwakuri ao bwainan te koaua.

ANA BOTO N REIREI TE BAIBARA: “E kakukurei riki te anga nakon te anganaki.”​—MWAKURI 20:35.

A a tia n noria aomata aika bati bwa karaoani bwaai ibukia tabemwaang, n te katoto, kabanean aia tai ma korakoraia ni buokiia tabemwaang n taai ni karawawata, moan te kakabwaia ao ni manena riki iai maiuia. E korea ae kangai Toromon: “Tai taua te bwai ae raoiroi mairouia akana e riai anganakia, Ngkana e kona baim ni karaoia.”​—Taeka N Rabakau 3:27, BG.

Iangoa ana katoto Ralph. Ngke e a ritaea teuaei man ana mwakuri, ao e a raona buuna ni kabwanina ana tai n te mwakuri ni minita ni Kristian. A kaai ni kabanea aia tai ae bati ni katoa namwakaina n te mwakuri ni minita, ike a anganano iai n reireinia aomata man te Baibara. E taku Ralph: “N okirani mwengara n te tairiki, ti a kua tiaki ibukina bwa ti a rikirake ni kara, ma ti kua ni kamanenaani korakorara ni kabane ni beku ibukin Tamara are i karawa. E raoiroi namakinan te kua imwini karaoan te mwakuri ae raoiroi!” E kukurei teuaei ma buuna ngkai e boto maiuia i aon te nano ni kan anga.

ANA BOTO N REIREI TE BAIBARA: “E tangira te aomata raona n te bong ae koraki, Ao e bungiaki te tari ba katokani kain tarina.”​—TAEKA N RABAKAU 17:17, BG.

E kona ni bebete te kangaanga ngkana e uaia ni maroroakinaki. E korea ae kangai te tia kororongorongo ae Francis Bacon ae te I-Engiran ibukia te koraki ake akea raoraoia ni koaua: “Te maeka n te aonnaba aei ai aroni buam i nanon te rereua.” E na kona ni kabebetea riki maiura karekeaia raoraora ni koaua ao te riki bwa te rao ni koaua. E kona n rangi n nakoraoi anne ao ni kakukurei.

ANA BOTO N REIREI TE BAIBARA: “A a kukurei akana ataia bwa a kainnanoa te Atua.”​—MATAIO 5:3.

E katerea Iesu te bwai ae rangi ni kakawaki ae riai n reke iroum ngkana ko kan nori kakoroani bukin ana berita nako te Atua, n aron te riai n ataa ae ko “kainnanoa te Atua” ao karaoan nanon anne. Ti kaokoro ma maan bwa ti bungiaki ma kainnanoan ataakin ae tera manenan te maiu ao te kantaninga iai. Bon tii Iehova ae te Atua ae kona ni kakoroa bukin te bae ti kainnanoia aei, ao e karaoa aei rinanon ana Taeka ae te Baibara. N aron ae ti noria n te kaongora are imwain aei, e kaotaki n te Baibara ana kantaninga te Atua ibukin te aonnaba. E tuangira bukini menara ikai, bukini batin te karawawata, ao baika e tangiri te Atua mairoura. E rangi ni kakawaki otara n ana koaua te Baibara akanne ibukini karekean te maiu ae manena ao ni karaunano. A kukurei te koraki ake a a tia ni karekei aia tai n reiakina te Baibara ao ni maiuakina are a ataia. Bukin tera? Ibukina bwa a karikirakea aia iraorao ae kaan ma ara tia Karikiriki ae “te Atua ae kukukurei,” ae Iehova.​—1 Timoteo 1:11.

ANA BOTO N REIREI TE BAIBARA: “Ururinga naba te tia Karaoiko . . . ngkai a tuai n roko boong aika bubuaka, ngkai a tuai ni kaaniko ririki ake ko nang kangai iai, Akea au kukurei n aikai.”​—TE MINITA 12:1, BG.

E anga ana taeka n reirei te Uea are Toromon ni kaineti ma rooro n rikirake ake a kabwaka n ataia ae a kona n reke kabuanibwai nakoni maiuia, ao e kakawaki naba anne ibukira ni kabane. Kabotoa uringan am tia Karikiriki iroum n aki ongeia bwa tera aroni maium. Anne te bwai ae e na anganiko te kantaninga ni koaua ni maium. Rarawa nakon te aeka n iango aei: “Ti na amwarake ma ni moi, bwa ti na mate ningabong.” (1 I-Korinto 15:32) E taekinaki ae kangai n Te Minita 8:12 (BG): Ngkana ko moanibwaia te Atua, ‘a na kakabwaiaaki’ bwaai ibukim.

E nora koauan anne te ataeinnaine ae arana Wendi. Ngke te roro n rikirake neiei ao e reiakina te taetae n Tibein ma tarina ae ataei riki bwa a aonga ni mwaing nakon te Dominican Republic, are e korakora iai kainnanoaia taan uarongorongoa te rongorongo ae raoiroi man te Baibara. “A bati ara tai n anga ngaira ni beku n te tabo are ti kainnanoaki iai, ma ti bon namakina naba te kukurei iai. Akea riki te bwai ae I kani karaoia n namwakaina akana onoua akanne! E rianako riki kakabwaiaara aika ti karekei nakon ara anganano ake ti karaoi.”

E Karekea te Maiu ae Manena te Kakaonimaki Nakon te Atua

E kona ni manena riki maium n te aro ae rangi n okoro ni karikirakean am iraorao ae kaan ma Iehova. N te aro raa? Ngke e kariria Atam ao Ewa Tatan bwa a na karitei nakon ana tautaeka te Atua, ao e taekinna naba bwa akea ae kona n teimatoa ni kakaonimaki nakon te Atua i aani kataakina. (Iobi 1:9-11; 2:4) Ko kona naba ni kaotia ae bon te tia kewe Tatan! N te aro raa? Boni man teimatoam ni kakaonimaki nakon te Atua n ongeabam n ana boto n reirei, ao ni kaotiotan ae ko atai aroaron Iehova aika moan te tamaroa ibukini bairean ae raoiroi ma ae buakaka ibukira.​—Te Kaotioti 4:11.

Ti riai n nanomwaaka i aan ara kangaanga ngkana ti kan uaiakina te maiu ae raoiroi. A na totokoira mani karekean te maiu ae manena kangaanga akanne? Karaua iangoia bwa aongkoa e a uaraoaki iroun te tia kairiribai ae iowawa, raoraora ae rangi n tangiraki ke kaain ara utu temanna. Ngkana e karekei kangaanga tabeua mairoun ara kairiribai kamanoan aran raoraora anne, e koaua bwa e na totokoaki iai rekeni maiura ae manena? E na bon aki! Ti na boni kukurei n nanomwaaka i aani kangaanga ibukini kaitiakan arana. Ai bon tii te arona naba ma teimatoara ni kakaonimaki nakon te Atua. E na boni kakukureia nanon te Atua teimatoara ni kakaonimaki i aani karaoakini mwakuri aika bure nakoira.​—Taeka N Rabakau 27:11.

Te Maiu ae Manena n Aki Toki

Kateia bwa tiam reiakinani bwaai nako ibukin te Atua ao ana kantaninga n aron am kabanea ni kona. E taku Iesu Kristo: “Ibukini karekean te maiu are aki toki, a riai n ataiko ae tii ngkoe te Atua ae koaua, ao n ataa naba teuare ko kanakomaia ae Iesu Kristo.” (Ioane 17:3) Ngkana e a kakoroa bukin ana moani kantaninga te Atua ibukin te aonnaba, e nang reke irouia aomata aika kakaonimaki te baere e moan iangoia Iehova ibukia, ae “te maiu are aki toki” n te aonnaba ae bwaretaiti. Ao ngkanne e nang boni manena ao ni karaunano maiura.​—Taian Areru 145:16.

Ko na karekea ia te atatai are e taekinna Iesu? Bon i nanon te Baibara ae Ana Taeka te Atua are e kaira koreana. Ngkana ko kainnanoa buokam ni karaoan aei, tai tabwara ni koroboki nakoia taani boreetia te maekatin aei. A na kukurei ni bairea temanna bwa e na buokiko n reiakina ana reirei ni koaua te Baibara.