Uaiakinan Te Kaantaninga Ae Manena N Te Maiu Aei

“Ke a bane ni kamoamoa Iehova akana iai ikeikeia.”​—TAIAN ARERU 150: 6.

1. Taekina aron temanna te mwaane are uaiakina tiana ae manena ni maiuna.

“I RIN n te kuura n taokita ngkoa ibukina bwa I kani kamanenaa maiu ni buokia aomata. N au iango, N na kukurei n nakoau ao au karekemwane ni boou n taokita,” aei ana ururing Seung Jin, are e kaikawaki i Korea.a “Ngke I a ataia ae e kona ni karako ae e na karaoia te taokita ibukin kainnanoia aomata, e a rikirake bwaran nanou iai. Ngaia are I a manga reiakina te koro taamnei, ma tii teutana naba buokaia aomata iai, ao I a namakinna bwa I bangaomata iai. I a manga riki bwa te tia reirei ao n te tai ae waekoa, I a noria bwa I tii kona ni tibwai nako rongorongon baika a a tia n riki, ma tiaki reirei aika kona ni kairiri nakon te tia ae manena n te maiu.” Titeboo Seung Jin ma aomata aika bati aika uaiakin tiaia aika manena ni maiuia.

2. (a) Tera ae nanonaki ni karekean te kaantaninga ni maiura? (b) Ti na kanga n ataia bwa iai ana kaantaninga te tia Karikiriki ni kamaekaara i aon te aba?

² E nanonaki karekean te kaantaninga ni koaua ni maiura bwa e na iai aana, tiara ae teretere raoi ao ni kakawaki ake ti kakorakoraira n uaiakin. A kona aomata ni karekea te aeka ni kaantaninga anne? Eng! Ni koauana, ti karikaki ma te ataibwai, ma mataniwin nanora ao te kona n iango, ae kaotaki iai ana kaantaninga ae manena te tia Karikiriki ngkai e kamaekaira i aon te aba. N etina, ti kona ni kunea ao ni karaoa nanon ara kaantaninga ni koaua, tii man kaboraoan maiura ma ana kaantaninga te tia Karikiriki.

3. Tera ae irekereke ma ana kaantaninga te Atua ibukia aomata?

³ E kaotaraeaki n te Baibara bwa e irekereke ana kaantaninga te Atua ibukira ma baika bati. N te katoto, karikara ae kamimi boni kaotan ana tangira te Atua ae boto i aon te atataiaomata. (Taian Areru 40:5; 139:14) Ngaia are kaboraoan maiura ma ana kaantaninga te Atua, e nanonaki iai ae ti na atataiaomata n tangiriia aomata n aron are e karaoia te Atua. (1 Ioane 4:7-​11) E nanonaki naba iai te ongeaba n ana tua te Atua, ake a buokira ni kaboraoi maiura ma ana kaantaninga ae tatangira.​—Te Minita 12:13; 1 Ioane 5: 3.

4. (a) Tera ae kainnanoaki ibukin karekean te kaantaninga ae manena ni maiura? (b) Tera te kaantaninga ae moan te rietata ae a kona n uaiakinna aomata ni kabane?

⁴ Ana kaantaninga naba te Atua bwa a na maeka ni kukurei ao n rau aomata tatabemania nako ma nikiran baika a karikaki. (Karikani Bwaai 1:26; 2:15) Ma tera ae ti kainnanoia bwa ti aonga ni kukurei, ni kamanoaki raoi ao n rau? N aron te tei ae kainnanoa namakinan menaia ana karo irarikina bwa e aonga ni kukurei ao n namakina kamanoana raoi, ti kainnanoa naba te iraorao ae kaan ma Tamara are i karawa ngkana ti kan uaiakin tiara aika manena ni maiura. (Ebera 12: 9) E karekea te aro n iraorao ma ngaia aei te Atua, ngke e kariaira bwa ti na kaania ao n ongorana n ara tataro. (Iakobo 4:8; 1 Ioane 5:14, 15) Ti kona ni karekea kimwareirein ao kamoamoan Tamara are i karawa ngkana ti ‘nakonako ma te Atua’ n te onimaki ao n riki bwa raoraona. (Karikani Bwaai 6:9; Taeka N Rabakau 23:15, 16; Iakobo 2:23) Anne te kaantaninga ae moan te rietata ae a kona n uaiakinna aomata ni kabane. E korea ae kangai te tia areru: “Ke a bane ni kamoamoa Iehova akana iai ikeikeia.”​—Taian Areru 150: 6.

Tera Am Kaantaninga ni Maium?

5. E aera bwa ti aki wanawana ngkana ti karimoai bwaikorakin te maiu aei?

⁵ Iteran ana kaantaninga te Atua ibukira bon kawakinara raoi ao kaain ara utu. E nanonaki naba iai tabeakinan marurungin rabwatara ao ara onimaki. Ma e kainnanoaki te kabaeranti raoi, bwa e aonga n aki kakawaki riki tangiran te mwakuri ni kareketianti nakon maiuakinan te onimaki ni koaua. (Mataio 4:4; 6:33) E kananokawaki bwa a mwaiti aika kabotoi riki maiuia ni karekean bwaikorakin te maiu aei. Ma boni kaotan te aro ae aki wanawana ngkana ti kataia ni katoki nanora ni bwaikorakin te maiu aei. E kaotaki n te kakaae ae e a tibwa tia ni karaoaki bwa a mwaiti mai buakoia mirioneea i Atia aika “namakinna bwa a aki kamanoaki raoi ao a karawawataki, e ngae ngke a bwakuaku ao ni kona ni karekei baika bati ma ni kaubwaia.”​—Te Minita 5:11, BK.

6. Tera ana reirei Iesu are e anga ibukin uaiakinan te kaubwai?

⁶ E taekina naba te “mamanaki n te kaubwai,” Iesu. (Mareko 4:19) Ti na kanga ni mwamwanaki n te kaubwai? A kona n iangoia aomata bwa e na reke kukureia man te kaubwai, ma e bon aki. E taku te Uea ae wanawana ae Toromon: “Ane tangira te tirewa ao e na aki ngae n te tirewa.” (Te Minita 5:10) Ma te koaua bwa ti kona n uaiakin tiia ibukin bwaikorakin te maiu ao n teimatoa n toro iroun te Atua ma nanora ni kabane? Tiaki ngaia anne. E kabwarabwaraa Iesu ni kangai: “Akea te aomata ae e kona n toro irouia toka aika uoman, ba ane e na riba temanna ao e na tangira temanna. E na kakaonimaki nakon temanna ao e na aki kubara are temanna. Kam aki kona n toro iroun te Atua ngkana kam toronaki n te kani kaubai.” E kaumakiia taan rimwina Iesu bwa a na aki kaikoi aia bwai i aon te aba, ma a na ‘kaiko aia bwai nako karawa,’ ae nanona karekean araia ae raoiroi iroun te Atua, are ‘E atai baika a riai n anganaki ngkana a tuai ni butiia.’​—Mataio 6:8, 19-25, BK.

7. Ti na kanga ni kona n “taua te maiu ni koaua”?

⁷ Ngke e koroboki te abotoro Bauro nakon raona ni mwakuri are Timoteo, ao e anga ana taeka n reirei tabeua aika matoatoa ni kaineti ma aei. E kangai nakon Timoteo: “Tuangia akana kaubwai . . . ba a na tai onimakina te kaubwai ae aki teimatoa, ma a na onimakina te Atua, ae kabane bwaai n anganira ba ti na kabatia te kukurei iai . . . , a na tituaraoi n angabwai, ao a na bareka te tibai aia bwai ma raoia nako; ao a na kaiko aaia aika raraoi i mwaini boong aika nangi roko, ba a aonga n taua te maiu ni koaua.”​—1 Timoteo 6:17-19.

Tera “te Maiu ni Koaua”?

8. (a) E aera ngkai a mwaiti aika kakorakoraia ni karekea kaubwaia ao kakannatoia? (b) Tera ae a kabwaka n iangoia aeka n aomata akanne?

⁸ Irouia angiia aomata, te taeka ae “te maiu ni koaua” e kateaki iai n aia iango bannan te maiu raoi ao te kimwareirei ae bati. E taekinaki ae kangai n te maekatin teuana mai Atia: “A karikirakei tangiran baike a nori ni matakuia ni birim ke n te TV ao a miiakin baika a kona ni karekei.” Karekean te kaubwai ao te kakannato bon oin aia kaantaninga aomata aika mwaiti ni maiuia. A mwaiti aika a a tia ni kabanebuakai aia tai n rorobuaka, marurungia, maiuia n aia utu ao baika kakawaki ni kaineti ma aia onimaki ibukin uaiakinan baikai. E karako mwaitiia aika tei moa n iangoia bwa kaongora ibukin te maiuraoi ao te kimwareirei, bon tii kaotiotan “nanon aon te aba,” ae moanibwaiaki irouia aomata, ike a a kairarangaki iai aomata aika birion ma birion bwa a na karitei nakon ana kaantaninga te Atua ibukira. (1 I-Korinto 2:12; I-Ebeto 2: 2) Maroaka ae a a rangi ni mwaiti aomata aika aki kukurei ni boong aikai!​—Taeka N Rabakau 18:11; 23:4, 5.

9. Tera ae a aki kona ni kakororaoa nanona aomata, ao bukin tera?

⁹ Ao tera aroia ake a mwakuri ma te atataiaomata ibukin marurungia aomata, a kakorakoraia ni kamauna te baki, te aoraki ao te ribuaka? A aki toki ni kakabwaiaki aomata aika bati man aia kakorakora n anga ngaiia. Ma e ngae ngke a kabanei korakoraia, a aki kona ni bita te waaki i aon te aba nakon te kaetitaeka ae riai ao n raoiroi. Bukin tera? Ibukina bwa ni koauana “a bane kaain aonaba ni wene i nanon teuare buakaka” ae Tatan, ao e aki kani bitaki.​—1 Ioane 5:19.

10. A na karekea n ningai te “maiu ni koaua” te koraki aika kakaonimaki?

¹⁰ Ai kananokawakira ngkana iai ae akea riki te bwai ae e kaantaningaia irarikin ae tii iangoan maiuna n te waaki ae ngkai! “Ngkana ti onimakina Kristo ti i bukin te maiu aei, ao moan te kananoanga ngaira i buakoia aomata ni kabaneia,” aikai ana koroboki Bauro. “Ti na amarake ma ni moi; ba ti na mate ningabong,” aei aroaroia te koraki ake a kakoauaa bwa tii aio aron te maiu aei. (1 I-Korinto 15:19, 32, BK) Ma ‘n ai aron ana taeka n akoi te Atua iai kaantaningan karawa nabangkai ma aonaba nabangkai, ake e mena iai te raoiroi.’ (2 Betero 3:13) Ao n te tai anne, a a kona iai Kristian ni karekea “te maiu ni koaua,” ae te, “maiu are aki toki” ma te kororaoi, tao i karawa ke i aon te aba i aan ana kairiri Ana Tautaeka n Uea te Atua!​—1 Timoteo 6:12.

11. E aera ngkai e manena boutokan Ana Tautaeka n Uea te Atua?

¹¹ Bon tii Ana Tautaeka n Uea te Atua ae na tokanikai ni katokan aia kangaanga botannaomata. Mangaia are ara kakorakora ni mwakuri ibukin boutokaan Ana Tautaeka n Uea te Atua, bon te mwakuri ae manena ae riai n uaiakinaki. (Ioane 4:34) Ngkai ti tabe ni karaoa anne, ti a kona ngkanne ni karekea ara iraorao ae kakawaki ma Tamara are i karawa. Ti kukurei naba ni beku irarikia taari aika mirion ma mirion mwaitiia ake a ukoukora te kaantaninga ae titeboo ma anne ni maiuia.

Karaoan Anganano Aika Riai

12. Taekina kaokoron te maiu n te waaki i aon te aba ae ngkai ma “te maiu ni koaua.”

¹² E taku te Baibara: “E kume ni mauna aon te aba ma kaibabaruna.” Akea iteran ana waaki ae ngkai Tatan, n ikotaki naba ma kakannatona ao kaubwaina, ae e na aki kamaunaki, “ma ane kakaraoa ae E tangiria te Atua, ao e teimatoa n aki toki.” (1 Ioane 2:15-17) Ni kaitaran te kaubwai ae aki teimatoa, te kamoamoaki ae kai toki ao te kakukurei ae kai mauna n te waaki ae ngkai, e manena ao n teimatoa “te maiu ni koaua” ae nanonaki iai te maiu n aki toki i aan Ana Tautaeka n Uea te Atua. Tiaki e koaua ngkanne bwa ti riai n angakarea ibukin karekean te maiu aei, ma e boto i aon angakarea aika riai.

13. A kanga te taanga teuana ni karaoi anganano aika riai?

¹³ Iangoa Henry ao Suzanne. A onimakina raoi ana berita te Atua ae a na karekea buokaia aomata ni kabane, ake a moanibwaia te Tautaeka n Uea ni maiuia man ana ibuobuoki te Atua. (Mataio 6:33) Ngaia are a a rineia bwa a na maeka n te auti ae boraoi, bwa a aonga ni kabanea aia tai ae bati riki n te mwakuri ae irekereke raoi ma aia onimaki ma natia aine aika uoman, n onean mwin are a na kaai ni mwakuri ni kareketianti ibukin te auti ae bobuaka. (Ebera 13:15, 16) E aki kona n ota raoi n aia motinnano aei temanna raoraoia ae taraa ni kan ibuobuoki ma ni koauana e bon aki, ngke e taku: “Suzanne, ngkana ko kani maeka n te auti ae tamaroa riki, ko riai n taona nanom nakon te bwai teuana.” Ma a ataia Henry ao Suzanne, bwa ane e moanibwaia Iehova ao “bon ana bwai te maiu aei, ao te maiu are e na roko.” (1 Timoteo 4:8; Tito 2:12) A rikirake natia aika aine bwa taan tataekina te euangkerio aika ingainga nanoia. A namakinna bwa akea te bwai teuana ae kakawaki ae a kabuaa n aia utu; ma a bati kakabwaiaaia man uaiakinan tiaia ae “te maiu ni koaua.”​—I-Biribi 3:8; 1 Timoteo 6:6-8.

Tai ‘Kabatiai Bwainan Bwain Aon te Aba’

14. Baikara kabuanibwai aika ti kona ni kaaitarai ngkana ti kabuaa ara kaantaninga ni koaua?

¹⁴ Mangaia are iai te kabuanibwai ngkana ti mwaninga ara kaantaninga ni koaua n te aro are ti a aki taua “te maiu ni koaua.” Ti kona n ruanikai ngkana a ‘karibwaki ara iango n raraomaeakinan bwain aon te aba, ma bwaikorakina ma mwaiena.’ (Ruka 8:14) Ti kona ni kairaki nakon kabatiaan te irekereke ma te waaki ae ngkai ngkana ti aki taubaang nakon tangiran bwaai ao “raraomaeakinan bwain te maiu aei.” (Ruka 21:34 ) E kananokawaki bwa a a tia tabeman n irekereke ma tangiran te kaubwai ae e a taabangaki ni boong aikai ike a a “kitana te onimaki iai, ao a ewariia i bon i rouia ni maraki aika bati,” ao n tokina a a kabuaa aia iraorao ae kakawaki ma Iehova. Ai kananokawakira te bwai ae ti na taia ngkana ti aki teimatoa n “taua te maiu ni koaua”!​—1 Timoteo 6:9, 10, 12; Taeka N Rabakau 28: 20.

15. E kanga ni kakabwaiaki te utu teuana man ‘aki kabatiaan bwainan bwain aon te aba’?

¹⁵ E reireinia Bauro “akana bwaini bwain aon te aba, n [riki n] ai aroia ngke tao a aki kabatiai bwainani bwaina.” (1 I-Korinto 7:31) A mutiakina te reirei anne Keith ao Bonnie. E taku Keith: “I riki bwa Ana Tia Kakoaua Iehova ngke e nang bane au kataneiai n te kuura ni karaowi. I riai ni karaoa au motinnano. I kona ni butimwaia aoraki aika bati ma ni karekea au mwane ae moan te bati, ma e kona n tukai aei man karaoan au beku iroun Iehova. I motinnanoia bwa N na kauarerekea mwaitiia aomata ake N na karaoi wiia, bwa e aonga ni bati riki au tai ibukin karikirakean aia onimaki kaain au utu ao raun nanoia, n ikotaki naba ma natira ataeinnaine aika niman. E ngae ngke e burenibwai reken ara mwane n raka, ma ti a rabakau n rautikona ara mwane, ao a kona n reke baika ti kainnanoi n taai nako. E a rangi ni kaan ara iraorao i marenara n ara utu, ti itangitangiri ao ti rangi ni kimwareirei. N tokina, ti a bane ni kabwanini ara tai n te mwakuri ni minita. Ao ngkai, a a tia n tekateka n taanga natira aine ma te kukurei, ao a a tia ni kariki teniman mai buakoia. A teimatoa ni kukurei n aia utu ibukina bwa a a tia ni waakinaanako moanibwaian ana kaantaninga Iehova.”

Moanibwaian Ana Kaantaninga te Atua ni Maium

16, 17. Baikara katoto aika taekinaki n te Baibara ibukia aomata aika mwaatai, ma tera bukin uringaia iai?

¹⁶ A taekinaki n te Baibara aia katoto te koraki ake a maiuakina ana kaantaninga te Atua ao ake a aki naba. A kaineti reirei man katoto aikai nakoia aomata ni kabane, aika kakaokoro aia ririki, kateiia ao aroaroia. (I-Rom 15:4; 1 I-Korinto 10:6, 11) E katei kaawa aika rangi ni bubura Nimrota, ma e karitei nakon Iehova ni karaoan aei. (Karikani Bwaai 10:8, 9, NW) Ma a mwaiti riki ake a riki bwa banna ni katoto aika raraoi. N te katoto, e rawa Mote ni moanibwaia ni maiuna arona ni bwakuaku i buakoia kaain Aikubita. Ma e karinei mwiokoana mairoun te Atua “ba [a] kakawaki riki nakoni kaubain Aikubita.” (Ebera 11:26, BK) E bae ni buoka aorakia Bauro ao aomata tabeman te taokita are Ruka. Ma e karaoa naba tibwangana ae rangi ni kakawaki ibukia aomata Ruka, ngke e riki bwa te tia tataekina te rongorongo ao te tia korea te Baibara. Ao Bauro, e aki kinaaki ibukina bwa te Rooia ae mwaatai ngaia, ma bon ibukina bwa te mitinare ae “aia tia tuatua Tientaire” ngaia.​—I-Rom 11: 13.

¹⁷ E aki korakora uringan Tawita ibukina ngkai te mataniwi irouia tautia, ke ibukin ae te tia katangitang ao te tia ototo ngaia, ma e ururingaki riki n arona n riki bwa ‘ana aomata ae ai aron nanon te Atua.’ (1 Tamuera 13:14) Ti aki kinaa Taniera ibukin ana mwakuri are e bwakuaku iai n te tautaeka ni Baburon, ma bon ibukina ngke ana burabeti Iehova ae kakaonimaki; ti aki kinaa naba Etita ibukina ngke te uea n aine ngaia i Botia, ma bon ibukin ana katoto ni kaineti ma ninikoriana ao ana onimaki; ti aki kinaia naba Betero, Anterea, Iakobo ao Ioane, ibukina bwa taan akawa ngaiia aika kokona, ma ibukina bwa bon ana abotoro Iesu ngaiia. Ao te katoto ae te kabanea n tamaroa, ti uringa Iesu tiaki ibukina bwa “te kaamta,” ngaia, ma ibukina ngkai bon “te Kristo.” (Mareko 6:3; Mataio 16:16) A bane ni mataata ni baikai, bwa e ngae ngke tao tera aron wanawanaia, mwaitin aia bwai ke kakannatoia, ma a riai ni kabotoi maiuia n aia beku iroun te Atua ma tiaki n aia mwakuri ni kareketianti. A ataia bwa te kakabwaia ae te kabanea ni kakawaki, bon rikia bwa aine ke mwaane aika ana aomata te Atua.

18. Tera ana iango temanna te Kristian ae ataei riki ni kaineti ma kamanenan maiuna, ao tera are e a tibwa ataia imwina?

¹⁸ E a ataa naba aei Seung Jin, are e taekinaki mai moa. E taku teuaei: “N onean mwin are N na kabanea korakorau n reiakina te mwakuri ni kuakua, te koro taamnei, ke te tia reirei, I a ukoukora arou ni kamanenaa maiu ni kaboraoia ma au katabu nakon te Atua. I a beku ngkai n te tabo are e a korakora iai kainnanoaia taan reirei n te Baibara, ni buokiia aomata bwa a na nakonako n te kawai nakon te maiu ae aki toki. I aki toki n iangoia ngkoa bwa e a aki kainnanoa te kakorakora kabwaninan te tai n te mwakuri ni minita, ao ngkanne n na botu iai. Ma I a noria bwa e kainnanoaki iai te kakorakora ae bati ngkai I a kataia ni karaoiroa aroarou ao au konabwai n reireinia aomata aika kakaokoro kateia. I a ataia bwa uaiakinan ana kaantaninga Iehova, bon tii te aroaro ni maiu ae manena.”

19. Ti na kanga ni karekea te kaantaninga ni koaua ni maiura?

¹⁹ Ngkai Kristian ngaira, ti a tia n anganaki te atatai ibukin kamaiuaia aomata ao te kaantaninga ibukin kamaiuara. (Ioane 17: 3) Ti bia aki ‘kamatebuakaa anganakira te akoaki mairoun te Atua.’ (2 I-Korinto 6: 1) Ma ti bia kamanenai ara bong ao ririki aika kakawaki aikai ibukin kamoamoaan Iehova. Ti na kataabangaka te atatai ae karekea te kakukurei ni koaua ae kairiri nakon te maiu n aki toki. Ni karaoan aei, ti a kona n nora iai koauan ana taeka Iesu aikai: “E kakabaia riki te anga nakon te anganaki.” (Mwakuri 20:35) Ao ti na kunea iai te kaantaninga ni koaua ibukin te maiu.

[Kabwarabwara ae nano]

Ko Kona ni Kabwarabwaraa?

• Tera te kaantaninga ae moan te rietata ae ti kona ni karekea ni maiura?

• E aera ngkai ti aki wanawana ngkana ti maiu tii ibukin bwaikorakin te maiu aei?

• Tera “te maiu ni koaua” are e beritanna te Atua?

• Ti na kanga ni kona ni kamanenai maiura ibukin ana kaantaninga te Atua?