Te Moan Titiraki: Iai Manenani Maiu?
E IKAWAIRAKE Rosalind i Engiran, ao e rangi ni korakora te kan atatai irouna. E kani buokiia naba aomata. Imwini banen ana reirei, e a reke nakoana ae rietata are e irekereke ma buokaia te koraki ake akea mwengaia, ma ake a toabuaka rabwataia ao n a aki kona naba ni wareware. E ngae ngke e kukurei neiei n ana mwakuri ao ni maiuraoi iai, ma e taku: “Inanon ririki aika bati, ao I aki toki n iango ni kangai: ‘Tera bukini menara ikai?’ ao ‘Tera manenan te maiu?’”
Tera bukin tabekan te titiraki anne? Iai kaokoroia maan ma aomata bwa ti kona ni kabwarabwarai bwaai tabeua. Iai ara kona n reiakini bwaai rimoa, ni karaoi ara babaire ibukin taai aika imwaira ao n ukoukora manenani maiura.
Tera aia kaeka tabeman iai? A bati aika a iangoia bwa te bwai ae moanibwai ni maiuia, boni karekean te kaubwai ke te nakoa ae rietata ike a a kukukurei iai.
Tera ae kaotaraeaki n te kaeka anne? Ti moanibwai ni maiura baike ti tangiri. E mwinibwai nanon te Atua nakon nanora.
Tera ana reirei te Baibara? E karekei kaubwaina aika rangi ni bati te Uea are Toromon ao n ukoukora te kakukurei ma e noria bwa bon akea manenaia. E kaota te bwai are e karekea manenan raoi te maiu ngke e korea ae kangai: “Aio kabaneani baikai; e a tia n ongo te aba baikai ni kabane: maka te Atua, ao tou mwin ana tua; ba bon anne kabanean te aro ae riai irouia aomata.” (Te Minita 12:13, BG) Tera ae irekereke ma touani mwin ana tua te Atua?
Aei iteran ana kantaninga te Atua ibukira bwa ti na maiu ni kukurei. E korea ae kangai Toromon: “Akea ae raoiroi riki iroun te aomata nakon te amamarake ma te momoi, ma te kakukureia tamneina n te raoiroi i buakon ana makuri. Ao I nora naba te baei, ba e reke mai bain te Atua.”—Te Minita 2:24, BG.
E tangirira naba te Atua bwa ti na tangiriia ao n tabeakinia ara utu. Nora te kairiri ae manena ao ni mataata are a anganaki kaain te utu.
“A riai naba buumwaane n tangiriia buuia n aron tangiran oin rabwataia.”—I-Ebeto 5:28.
“E riai te buu te aine ni korakora karineani buuna irouna.”—I-Ebeto 5:33.
“Ataei, kam na ongeaba irouia ami karo.”—I-Ebeto 6:1.
Ti na karekea te kukurei ae bati ao te raunnano, ngkana ti maiuakini booto n reirei n te Baibara akanne. Ma te bwai ae moan te kakawaki ae ti kona ni karaoia, boni kabanean ara kona n reiakina taekan ara tia Karikiriki ao ni kaania bwa kaanga Raoraora. Ni koauana, ti kaungaaki n te Baibara bwa ti na “kaania te Atua.” Imwin anne, e a karaoa te berita ae kamimi aei: “Ane e na kaaningkami.” (Iakobo 4:8) E na rangi ni manena raoi maium ngkana ko butimwaea te kaungaunga anne.
Ibukini kan ataan riki arom ni kakukureia te Atua, nora mwakoro 12 n te boki ae Tera Ana Reirei ni Koaua te Baibara? E kona n reke n te atureti ae www.pr418.com
[Te Bwaoki n iteraniba 5]
Tera Are E Taekinna Iesu Ibukini Manenan te Maiu?
E aki nanokokoraki Iesu ibukini manenani maiuna. E taku: “Bon aio bukini bungiakiu, ao bukin naba rokou nako buakoia kaain te aonnaba, bwa N na kaotioti ibukin te koaua.” (Ioane 18:37) E kabanea maiuna Iesu n reiakinia aomata te koaua ibukin te Atua ao Ana kantaninga.
E na rangi ni manena maiura ngkana ti kakairi n ana katoto Iesu. Ni koauana, e kaoira Iesu bwa ti na reiakinaki irouna. (Mataio 11:29) Iangoi aanga aika tii uoua moa ake ti kona iai ni karaoa anne.
E reireinira Iesu bwa ngkana ti kani kukurei, ti riai n “ataia bwa [ti] kainnanoa te Atua.” (Mataio 5:3) A kona ni karauaki nanora ni kaineti ma kainnanoan te Atua, ngkana ti karekea iroura ataakin ae “tii [ngaia] te Atua ae koaua, ao n ataa naba teuare [e] kanakomaia ae Iesu Kristo.”—Ioane 17:3.
E tua Iesu nakoia taan rimwina bwa a na reireinia aomata nako baike a a tia n reiakinna. E taku: “Mangaia are naako, reireinia aomata mai buakoia botannaomata nako bwa a na riki bwa taan rimwiu ao bwabetitoiia n aran te Tama, ao te Nati, ao te taamnei ae raoiroi. Ao reireinia bwa a na kakairi ni bwaai ni kabane ake I tua nakoimi.”—Mataio 28:19, 20.
A noria naake a rauaki nanoia ibukini kainnanoan te Atua bwa e korakora bitakini maiuia nakon ae raoiroi riki, man reiakinan te Baibara ao maiuakinana. Ni moani buokaia aomata bwa a na reiakina taekan te Atua, a a kakoauaa raoi iai ae e manena maiuia.