Uaiakinan Ana Kaantaninga Te Atua Ni Boong Aikai

“E mate [Kristo] i bukiia ni kabaneia, ba a aonga n aki manga kabane maiuia akana maiu, i bukiia.”​—2 I-KORINTO 5:15.

1. Taekina rongorongon te baere e riki nakon temanna te mitinare ni karaoan mwiokoana.

“TE MOANI kaa ara kaa n roko ni kaawan Aberika ae raroa, n tokin te buaka are waakinaki i marenaia kaain te aba anne,” aikai ana taeka te mitinare ae Aaron.a “Ti a aki kona n itoman ma te ekaretia ae uarereke n te kaawa anne, ao ti roko ibukin tabeakinan kainnanoia taari iai. Irarikin amwarake, kunikai ao booki aika aanaki n te Baibara, ti uoti naba katoton birimin te viteo ae Jehovah’s Witnesses​—The Organization Behind the Name.b A rangi ni mwaiti aomata aika raraoi nanoia ake a ubara ni mataku iai n te ‘tabo n taamnei’ n te kaawa aei, ae te umwa ae bubura ae karaoaki man te uteute ao e mena te VCR ao te TV i nanona, n te aro are e a kainnanoaki kauatain kaotana. A bati reirei n te Baibara aika moanaki imwin kaotan birim aikai. E mataata iai bwa a manena ara kakorakora ni kabane.”

2. (a) E aera ngkai a motinnanoia Kristian bwa a na kamanenai maiuia ibukin ana mwakuri te Atua? (b) Baikara titiraki aika ti na rinanoi ngkai?

² E aera ngke a karaoa mwiokoaia ae kangaanga aei Aaron ma raona? Ibukin nanoia ni kakaitau n ana karea ni kaboomwi Iesu Kristo, a a tia ni katabui maiuia nakon te Atua ao a kani kaboraoi maiuia ma ana kaantaninga. N aroia naakai, a a bane n tia naba Kristian aika katabui maiuia ni motinnanoia bwa a na ‘aki manga kabane maiuia i bukia,’ ma a na karaoa aia kabanea ni konaa “i bukin te euangkerio.” (2 I-Korinto 5:15; 1 I-Korinto 9:23) A ataia bwa n tokin te waaki i aon te aba, a nang akea manenan te mwane ao te kakannato. Mangaia are a kani kamanenai maiuia ao marurungia ni kaineti ma ana kaantaninga te Atua. (Te Minita 12:1) Ti na kanga ni karaoa aei? Ti na kunea iaa te ninikoria ao te korakora ae kainnanoaki ibukin karaoan aei? Ao baikara kakabwaia ibukin te mwakuri aika tauraoi ibukira?

Rinanoan Mwaneka Aika Manena Teutana Imwin Teutana

3. Baikara moani mwaneka aika irekereke ma karaoan nanon te Atua?

³ Karaoan nanon te Atua irouia Kristian ni koaua, bon te mwakuri ae kainnanoa te kakorakora i aoni maiuia ni kabane. N angiin te tai, e moanaki man mwaneka aika karinan te ara n Te Kuura ni Kataneiai Ibukia Taan Uarongorongo, warekan te Baibara ni katoa bong, uataboan te uarongorongo ao te rikirake teutana imwin teutana ni karokoa te bwabetito. Ngkana ti nora te rikirake, ti uringa iai ana taeka te abotoro Bauro aikai: “Botumwaka ni mutiakini baikai; ko na tabe ni baikai; ba e aonga n noraki rikirakem n te raoiroi irouia aomata ni kabaneia.” (1 Timoteo 4:15) E aki nanonaki n aeka n rikirake aikai kani kamoamoan te aomata i bon irouna, ma e kaotiotaki iai nanora ae korakora ni kani karaoa nanon te Atua ma te atataiaomata. Ni maiuakinan aei, e oti iai bwa ti kariaia kairara iroun te Atua n iteran maiura ni kabane, ao e rangi n nakoraoi riki irouna nakon ae ti kona ni karaoia.​—Taian Areru 32:8.

4. Ti na kanga ni kaaki man ara iango tabeaiangara?

⁴ E kona n tuuka rikirakera n ara beku ibukin te Atua te tabwarabwara ke kabatiaan tabeakinara i bon iroura. (Te Minita 11:4) Mangaia are imwain reken te kukurei ni koaua iroura n ara beku ibukin te Atua ao aomata nako, tao ti riai n tokanikai moa i aon tabeaiangara. N te katoto, e iangoia Erik bwa e na mwakuri n te ekaretia ae kamanenaki iai te taetae ae okoro ma ana taetae. Ma e raraoma ao e taku: ‘A na butimwaeai? N na nakoraoi ma taari? A na tangirai?’ E taku teuaei: “N tokina, I a ataia bwa I riai n tabeaianga riki ibukia taari nakon ae N na tabeaianga ibukiu. I motinnanoia bwa N nang aki manga katabeaiangaai, ma N na tii kaatuua iangoan te bwai ae I kona ni buokia iai aomata. I tataroa buokau ao I a waakinako. Ngkai e a rangi ni korakora kukureiu n noran au mwakuri ikekei.” (I-Rom 4:20) Eng, ngkana ti kabatiai ara mwakuri ibukin te Atua ao aomata nako ma te atataiaomata, ti na rangi ni kukurei riki iai.

5. E aera ngkai e kainnanoaki te babaire raoi ibukin uaiakinan ana kaantaninga te Atua? Kabwarabwaraa.

⁵ E kainnanoaki naba bairean raoi aroarora ngkana ti na uaiakina ana kaantaninga te Atua. Ti wanawana ngkana ti aki kauataoi ara taarau ake a na kona ni kamwanetatira ibuakon te waaki i aon te aba, ao n tiatianaki iai inaomatara ni beku ibukin te Atua kioina ngkai ti riai ni kabwaratarau moa. E kauringira te Baibara ni kangai: “Ngkana ko tangoa ana bwai te aomata ao ko riki ba ana toro.” (Taeka N Rabakau 22:7, BK) Ti na buokaki ni kabotoi ara iango i aoni baikai ngkana ti mwiokoa Iehova ao ni moanibwaia maiuakinan te onimaki ni koaua. N te katoto, a maeka ma tinaia Ten Guoming ma mwaanena aika uoman n te tabo ae rangi n bobuaka iai auti aika tatangoaki ni maekanaki ao ni kangaanga reken te mwakuri ae teimatoa iai. Ma ibukina bwa a kamanenai raoi aia mwane ao a ibuobuoki n te kabanemwane, a a kona n reke baika a kainnanoi ibukin maiuia te koraki aei, e ngae ngke tii tabeman aika mwakuri mai buakoia. E taku Guoming: “N tabetai, ti a bane n aki bwakabwai. Ma e ngae n anne, ti bon teimatoa ni bwaiania ao n tararuaa naba tinara. Ti rangi ni kukurei ngkai e aki tangirira tinara bwa ti na kitan ara mwakuri ni bwaiania ibukin kani maiuraoina.”​—2 I-Korinto 12:14; Ebera 13:5.

6. Tera te katoto ae kaotaki iai arora ni kona ni kaboraoi maiura ma ana kaantaninga te Atua?

⁶ Ngkana ko reimaurua i buakon uaiakinan te mwakuri ni kareketianti ke bwaai riki tabeua, tao e na kainnanoaki karaoan bitaki aika kakawaki ni moanibwaian ana kaantaninga te Atua. A aki kona ni karaoaki bitaki aikai n te tai ae waekoa, ao tiaki nanona bwa ko kabwaka ngkana ko kairua n te moantai. Iangoa Koichi, are iai ana kangaanga ni kabanean ana tai ae rang ni bati n te takaakaro. E a tia Koichi n reirei n te Baibara ngke tebwi tabun ana ririki, ma i nanon ririki aika bati, ao e tautaekanaki maiuna n te keim n te viteo. N te bongina ao e iango Koichi ni kangai: ‘Tera ae I tabe ni karaoia? Ai 30 tabun au ririki, ao I tuai man karaoa te mwakuri teuana ae manena ni maiu!’ E a manga moana ana reirei n te Baibara Koichi ao ni butimwaai buokana man te ekaretia. E ngae ngke e rinanon bitaki teutana imwin teutana, ma e aki roko n te bwara nanona. E tokanikai i aon te bwai n tutuki teuaei ni kabatiaan ana tataro ni bubutii ao aia kaungaunga raona. (Ruka 11:9) E a kimwareirei Koichi ni beku bwa tabonibain te ekaretia ngkai.

Bairea Raoi Maium

7. E aera ngkai ti kainnanoa bairean raoi maiura ni karaoan ana mwakuri te Atua?

⁷ E kainnanoaki karaoan te mwakuri ma ara kabanea n raoiroi ibukin uaiakinan ana kaantaninga te Atua. Ti riai n rarawa nakon te tabwarabwara ke te taningaroti ni karaoan aei. (Ebera 6:11, 12) E teimatoa Iehova n aki tangiria bwa ti na kairoroira ni karokoa ae e a rangi ni kua rabwatara, ara iango ke tao ti a aki namakinaaba. Ngkana ti kananorinanoira ni kakoauaa ae ti aki kona ni kakororaoa ana mwakuri te Atua n tii korakorara, e na neboaki iai te Atua ao ti kaota naba te kabaeranti iai ni maiuakinan ae riai. (1 Betero 4:11) E berita Iehova bwa e na kakorakoraira n aron ae ti kainnanoia ibukin karaoan nanona, ma ti aki riai ni kairoroira n riaon ara konaa, n te aro are ti a kataia ni karaoi baika e aki kaantaningaira bwa ti na karaoi. (2 I-Korinto 4:7) Ti riai ni bairei raoi ara tai ni mwakuri ni kaineti ma korakorara, ngkana ti kan teimatoa ni beku iroun te Atua n akea namakinan te kua.

8. Tera are e riki ngke e kataia te roro n rikirake temanna ae te Kristian, ni kabanea ana konaa ibukin bwain te aonnaba ao Iehova, ao tera te bitaki are karaoia?

⁸ N te katoto, i nanon uoua te ririki ao Ji Hye are e maeka i Atia Mainiku, e kabanea te tai ao te korakora ae bati n ana mwakuri ni kareketianti ao ni bwaiania naba. E taku neiei: “I kataia ni karaoa au kabanea n raoiroi ibukin Iehova ao au mwakuri, n te aro are ai tii nimaua au aoa ni matu ni katoa tairiki. N tokina, a akea korakorau n iangoa raoi au beku, ao I a namakinna bwa tii teutana kukureiu ni maiuakina te onimaki ni koaua.” Ngaia are e a uaiakina te mwakuri ae karako iai kabanean te tai ao te korakora ae bati Ji Hye, bwa e aonga ni beku ibukin Iehova ma ‘taamneina ni kabane, ana iango ao korakorana.’ (Mareko 12:30, BK) E taku neiei: “I kakorakorai ni moanibwaia ana kaantaninga te Atua, n aki ongea kairoroau irouia kaain au utu bwa N na uaiakina nakoau ae e na bati iai au mwane. E teimatoa n reke au mwane ae tau ibukin baika I kainnanoi tao n aroni kunikaiu aika taraaraoi. Ai kakukureira namakinan te marurung imwin kabatiaan te matu! I a namakina te kimwareirei n au mwakuri ni minita, ao e a nene riki ngkai au onimaki. E riki aei ibukina bwa I a aki kabanea au tai ae bati ni baike a anainano ao ni katabetabe n te aonnaba.”​—Te Minita 4:6; Mataio 6:24, 28-30.

9. A na kanga ni kona n rotaki aomata n ara mwakuri ni minita?

⁹ A aki kona ni beku ibukin te Atua, ni kabwanina aia tai n tataekina te euangkerio aomata ni kabane. Ngkana arona bwa ko kabokorakora ma te kara, te aoraki, ke tianakin am konabwai, uringa bwa te bwai ae kakawaki iroun Iehova, boni kakaonimakim ao am beku ma nanom ni kabane ae ko kona ni karaoia. (Ruka 21:2, 3) Ngaia are akea mai buakora, ae riai n taku bwa e uarereke uaan ana kakorakora ibukin te Atua, e ngae naba ngkana a tiatianaki aia beku tabeman. N te katoto, iangoia bwa aongkoa ti kawari auti tabeua ao akea ae taraa ni kan ongora n ara rongorongo. Imwin kitanakia, ao a kona kaain te auti anne ni maroroakina rokora i nanon te tai ae rangi ni maan, e ngae naba ngke akea ae kauka te mataroa nakoira! Tiaki ara kaantaninga bwa a na butimwaea te rongorongo ae raoiroi aomata ni kabane ake a ongora, ma bon iai tabeman ake a na butimwaia. (Mataio 13:19-23) Tao tabeman a kona ni butimwaia rimwi riki ngkana e a bitaki te aroaro n te aonnaba ke maiuia. E ngae n anne, ao karaoan ae ti konaa n te mwakuri ni minita, ti a karaoa iai ana mwakuri te Atua. Bon “raao ni makuri ngaira i bukin te Atua.”​—1 I-Korinto 3:9.

10. Baikara mwioko aika tauraoi ibukia kaain te ekaretia ni kabane?

¹⁰ Irarikina, ti bane ni kona ni buokia kaain ara utu, tarira ao mwaanera n te ekaretia. (I-Karatia 6:10) A kona n rotaki nanoia aomata n ara kaungaunga aika raraoi ao n uringaki irouia i nanon te tai ae maan. (Te Minita 11:1, 6) Ni karaoan aia mwakuri ma te taningamarau unimwaane ao tabonibai n te ekaretia, a buokia iai kaain te ekaretia n teimatoa n iraorao ma Iehova, ao e a rikirake iai te mwakuri ni Kristian. A rau nanora bwa ngkana ti ‘kakorakoraira n ana makuri te Uea ni kamaiti, e bon aki matebuaka irouna,’ ara mwakuri.​—1 I-Korinto 15:58.

Uaiakinan Ana Kaantaninga te Atua n Aron te Mwioko

11. Baikara riki mwioko aika ti kona n anganaki irarikin te mwakuri ma ara ekaretia?

¹¹ Ngkai Kristian ngaira, ti tangira te maiu ao ti kani kamoamoaa te Atua ni baika ti karaoi ni kabane. (1 I-Korinto 10:31) Ngkana ti kakaonimaki n tataekina euangkerion Uean te Atua ao n reireinia aomata bwa a na tau bwaai ni kabane ake e tua Iesu, ti a kona iai n atai aanga aika mwaiti ibukin te beku iroun te Atua ake ti na kakabwaiaki iai. (Mataio 24:14; 28:19, 20) Irarikin te mwakuri ma ara ekaretia, tao iai riki mwioko ake ti na kona iai ni beku n taabo ake e korakora kainnanoaia taan uarongorongo iai, tao n te aono teuana, te taetae ae ianena, ke te aba teuana. A kona ni kaoaki unimwaane ao tabonibai n te ekaretia aika tau ake a tuai ni mare nakon te Kuura Ibukin Kataneiakiia Minita, ao imwin anne a mwakuri n ekaretia ake a kainnanoaki iai Kristian aika ikawai n te onimaki, tao i aon abaia ke n te aba teuana. A kona ni katauaki taanga ni mare aika kabwanina aia tai n te mwakuri ni minita, n ira te Kataneiai Ibukia Mitinare i Kireata ao ni mwakuri imwina n te aba ae ianena. E teimatoa naba kainnanoaia taan anganano ibukin mwakuri aika kakaokoro n te Betaera ma katean ao kateimatoan tamaroan taabo ni bobotaki ao mwangan aobiti n tararua.

12, 13. (a) Ko na kanga ni baireia bwa te aeka ni beku raa ae ko na uaiakinna? (b) Kabwarabwaraa arom ni kona ni kamanenaa rabakaum ni mwakuri ae reke man mwiokoam teuana ibukin mwioko ake tabeua riki.

¹² Te aeka ni beku raa ae ko riai n uaiakinna? Ngkai ana toro Iehova ngkoe ae ko a tia ni katabua maium, ko riai n onimakina ana botaki n taai nako ibukin kairam. E na buokiko ‘Taamneina are raoiroi’ ni karaoan am motinnano ae eti. (Neemia 9:20) N angiin te tai, te kataneiai ibukin te mwioko teuana, e a manga kauka te kawai nakon te mwioko riki teuana, ao atatai ma rabakau ni mwakuri ake a reke man te aeka ni mwakuri teuana, a kona naba ni manena ibukin mwiokoam are imwina.

¹³ N te katoto, a katoatai Dennis ma buuna ae Jenny ni boutokai mwakuri ni kateitei ibukin Taabo n Taromauri. Imwin rokon te Hurricane Katrina n te United States mai maiaki, a anga nanoia naakai bwa a na buokia ake a kainnanoa buokaia. E ribootina ae kangai Dennis: “Ti rangi ni kimwareirei ni kamanenan rabakaura ni mwakuri ake a reke ngkoa man katean Taabo n Taromauri, ni buokia iai tarira. E riingaki nanora ni kaotiotan te tangira ni koaua n aia kaitau te koraki ake ti a tia ni buokia. E tiatianaki nakoraoin te manga kateitei n angiin kurubu n ibuobuoki ake tabeua riki. A a kaman tia Ana Tia Kakoaua Iehova n onobwai ke ni manga katei mwenga aika raka i aon 5,300 mwaitiia ao Taabo n Taromauri aika mwaiti naba. A nora aei aomata, ao ngkai e a oti te nano ni kan ongora ae korakora riki nakon ara rongorongo.”

14. Tera ae ko kona ni karaoia ngkana ko kan uaiakina te mwakuri ni minita ni kabwanina am tai?

¹⁴ Ko kona n uaiakina ana kaantaninga te Atua rinanon motinnanoan, te mwakuri ni kabwanina am tai n te mwakuri ni minita bwa nakoam? Ngkana ngaia anne, kakoauaa raoi ae ko na karekei kakabwaiam aika mwaiti. Ngkana e aki kona n reke karaoana ibukin aroaroni maium ae ngkai, tao ko kona ni kaangaraoiko. Kakairi n aron Neemia ni kaotan ingaingan nanona ni kani karaoa te mwioko ae kakawaki teuana ngkoa n ana tataro ae kangai: “Te Uea [ae Iehova] I butiko, . . . katetekeraoa am toro.” (Neemia 1:11) Imwina, onimakina ‘te tia ongoraei tataro,’ ao kaboraoa arom ma am tataro. (Taian Areru 65:2) Ngkana e na kakabwaiaa am kakorakora Iehova ibukin kabwaninan am tai ni mwakuri ibukina, ko riai ni karaoi mwakuri akanne moa. N te tai are ko a tia ni motinnanoia iai bwa ko na moana am mwakuri ni kabwanina am tai n te mwakuri ni minita, teimatoa karaoa nanona. Ni waakinakon te tai, ao ane e na rikirake mwaataim ni mwakuri ao kimwareireim naba.

Te Maiu ni Koaua ae Manena

15. (a) Ti na kanga ni kakabwaiaki man marorora ke warekan rongorongoia ana toro te Atua ake a a tia ni beku ibukina, i nanon te tai ae rangi ni maan? (b) Taekina te rongorongo teuana ae ko kunea bwa e korakora ungannanom iai.

¹⁵ Baikara uaan uaiakinan ana kaantaninga te Atua aika ko kariai? Maroro ma ana toro Iehova, riki te koraki ake a a tia ni kabanei ririki aika bati ni mwakuri ni kabwanina aia tai. Ai batira kakabwaiakia ni maiuakinan te maiu ae manena! (Taeka N Rabakau 10:22) Ane a na tuangko bwa akea te tai ae e kabwaka iai Iehova ni buokiia. E ngae ngkana a rinanon aaro aika kangaanga, ma e boni karekei naba baika a rangi ni kainnanoi ao aika mwaiti riki. (I-Biribi 4:11-13) Man 1955 nakon 1961, ao a boretiaki tabeua rongorongoia aomata aika kakaonimaki akanne n Te Taua-n-Tantani i aan te atu ae, “Uaiakinan te Kaantaninga ae Manena n te Maiu Aei.” Mai imwin te tai anne, ao a a tia ni boretiaki bubua ma bubua rongorongoia aomata riki tabeman. E kaotiotaki n rongorongo aikai ni kabane te nano n ingainga ao ni kimwareirei, ike ti a kauringaki iai baika a kona n noraki ni bokin te Baibara ae Mwakuri. Ngkana ko wareki rongorongo aika karokonano aikai, ao ane ko na kaungaki bwa ko na kangai, ‘Bon anne te aeka ni maiu ae I kani maiuakinna!’

16. Tera ae e kaira maiun te Kristian bwa e na iai ana kaantaninga ni koaua ao ni kakukurei?

¹⁶ E taku Aaron, are e taekinaki ni moan te kaongora aei: “I aki toki ni kaitiboo ma rooro n rikirake aika tiotionako i aon Aberika ibukin uaiakinan maiuia aika manena. A aki kunea aei angiina mai buakoia. Ma ngaira, ti uaiakina ana kaantaninga te Atua rinanon kabutinakoan euangkerion Ueana, ao e a reke iroura te maiu ae manena ao ae kainnanoaki iai te kakorakora. Ti a tia naba n ataia ae e kakabwaia riki te anga nakon te anganaki.”​—Mwakuri 20:35.

17. E aera ngkai ti riai n uaiakina ana kaantaninga te Atua ngkai?

¹⁷ Tera ngkoe arom? Tera tiam ae ko uaiakinna? Ngkana akea tiam aika okoro ake a na buokiko n uaiakina ana kaantaninga te Atua, ane a na waekoa ni kabanea am tai ao korakoram tiia tabeua riki. E aera ko a bakataea maium ae kakawaki, ni baika e karikirakei Tatan n te aonnaba bwa a aongkoa a kakawaki? N te tai ae e a kaan roko, n rokon “te rawawata are korakora,” ao a nang akea iai manenan te kaubwai ao te kakannato n te aonnaba. Ma te bwai ae kakawaki riki, bon ara iraorao ma Iehova. Ai kimwareireira ngaira n te tai anne, ngkai ti a tia ni beku ibukin te Atua ao aomata nako, ao n tia naba n uaiakina ana kaantaninga te Atua ni maiura!​—Mataio 24:21; Te Kaotioti 7:14, 15.

[Kabwarabwara ae nano]

Ko Kona ni Kabwarabwaraa?

• Tera ana namakin Iehova ni kaineti ma ara beku ibukina?

• Ti na kanga ni buokaki n toro iroun te Atua ao aomata nako, ni bwainan te iangoraoi ao bairean raoi maiura?

• Baikara mwioko ibukin te beku aika tauraoi ibukira?

• Ti na kanga ni waakina te maiu ni koaua ae manena ngkai?