E Koaua Bwa E Boni Kona n Reke te Maiu ae Rangi ni Manena?

AI BONI koauara taeka akanne! E irianaki te maiu n te aonnaba aei n taai nako n “te kainnano ma te rawawata” ae moan te bati. Ko bae n tia n iango ni kangai: ‘E koaua bwa e boni kona n reke te maiu ae rangi ni manena n taai aikai?’

Iangoa ana katoto Maria. E rangi ni mwamwakuri neiei ma e aki kona n nakonako n tii ngaia ngkai ai 84 ana ririki. E rangi ni marurung ana iango ma e aki kona rabwatana ni karaoi baike e tangiri. E na kanga ngkanne neiei ni kona n namakinna bwa e rangi ni manena maiuna ngkai?

Ao ngkoe tera arom? Ko bae n tia n titirakiniko bwa e rangi ni manena maium ke e aki. Tao a okioki baika ko karaoi, a kakua, ao a kabotu. Tao a bati naba aika a aki ataia ke n tabeakina aron am mwakuri korakora. E ngae ngkana e nakoraoi maium ngkai, ma ko kona naba n teimatoa n raraoma bwa baikara bwaai aika kona n riki n taai aika imwaim. Ao n tabetai, ko kona naba n namakina te maroaa ao te rawawatannano. Tao e noraki ni maiuia am utu bwa a unun ao a kairiribai. Tao e a tia naba ni mate te aomata ae ko rangi n tangiria. E rangi ni kaan ana iraorao te mwaane ae Andre ma tamana are e a karina naba n aoraki ao ni mate. E taonaki n te rawawata ae rangi ni korakora Andre ao e iangoia bwa e aki kona n tokanikai i aon te uruakinnano ao te nanokawaki.

N aki ongeia bwa tera te kangaanga ae ti aitara ma ngaia, ma aio te bwai ae ti rangi ni kan ataia: E koaua bwa e boni kona n reke te maiu ae rangi ni manena? Ti kona n nora kaekaan aei ni maiun te mwaane are e a tia ni maiu i aon te aba tao 2,000 te ririki n nako ae Iesu Kristo. E ngae ngke e kaaitara Iesu ma bwaai n tutuki aika bati ma e bon rangi ni manena maiuna. Ai ngaia are, ti boni kona naba ni kakairi irouna.