Ti Riai n Tataro Nakoia Santo ke Santa?

ANTAI ae tuai n raraoma ao ni kainnanoa buokana mairoun temanna? Ni kaineti ma te bwai ae karika raraomara, ti na bae n rinea te rao ae nanoanga ao are e a tia naba n rinanon te kangaanga ae ti kaaitara ma ngaia. Ngkana e nanoanga ao n tia n rinanon naba aei, e a riki iai bwa te rao ni koaua ae tangiraki.

A bae n namakina naba anne tabeman ngkana a tataro. N oneani mwin are a na butiia te Atua ae taraa n rangi n rietata ao ni kakannato irouia, a a iangoia bwa a kukurei riki ni butiia te santo ke te santa temanna. A iangoia bwa a nanoanga riki santo ke santa bwa a a tia n rinanoni kataaki ao kangaanga aika riiriki naba nakoia aomata. N te katoto, ngkana iai aia bwai aomata aika bua aika rangi ni kakawaki, a bae ni kukurei ni kawara te “Santo” ae Anthony mai Padual are aongkoa tabena bwaai aika bua ke n iraeaki. Ngkana a tataro ibukin te man ae aoraki, a bae n rinea te “Santo” ae Francis mai Assisi ke tao te “Santo” ae Jude Thaddeus ngkana a rotaki n te rawawata.

Ti na kanga ni koaua raoi bwa e riai te tataro nakoia santo ke santa ao e boraoi ma ana reirei te Baibara? Ngkai ara tataro bon ara taetaenikawai nakon te Atua, ni koauana ti rangi ni kan ataa aei: A ongoraeaki ara tataro irouna? Ao tiaki ti riai naba n titiraki ni kangai: Tera ana namakin te Atua ibukin te tataro nakoia santo ke santa?

ANA REIREI TE BAIBARA IBUKIN TE TATARO NAKOIA SANTO KE SANTAW

E boto te tatataro nakoia santo ke santa n te reirei man te Aro ni Katorika ibukini karokoan te bubutii rinanoia santo. E taekinaki n te boki ae te New Catholic Encyclopedia te boto n iango ae “e riai te aomata ae kainnanoa buokana ni bubutii rinanon te santo ke te santa, bwa e aonga ni karekea nanoangaana iroun te Atua.” Ngaia are te aomata ae tatataro nakoia santo ke santa, e kantaningaia bwa e na reke akoana ae okoro rinanoia ibukina bwa a kakabwaiaaki iroun te Atua.

E nako te aeka n reirei anne man te Baibara? A taekinna tabeman bwa e katea aan te tataro nakoia santo ke santa te abotoro Bauro n ana koroboki. N te katoto, e korea ae kangai nakoia Kristian ake i Rom: “I kaungaingkami taari, rinanon ara Uea ae Iesu Kristo ao n te tangira ae reke rinanon te taamnei, bwa kam na kakorakoraingkami ma ngai n tataro nakon te Atua ibukiu.” (I-Rom 15:30) E tuangia raona ni Kristian Bauro bwa a na riki bwa taan raoi ibukina nakon te Atua? E bon aki. Ma ngkana a tangira te bwai teuana, a na tuanga Bauro are ana abotoro te Kristo bwa e na bubutii ibukia. E kaotia Bauro bwa e riai ni butiaki te rao ni Kristian temanna bwa e na tataro ibukira nakon te Atua. Ma e rangi ni kaokoro te tataro nakon te temanna are e kakoauaaki bwa e mena i karawa bwa e na bubutii ibukira nakon te Atua. Bukin tera?

E kamataata Iesu n te Euangkerio are e koreia te abotoro Ioane ni kangai: “Boni ngai te kawai ao te koaua ao te maiu. Akea ae e na nakon te Tama ma tii ane rirou.” (Ioane 14:6) E taekina naba aei: “Kam na anganaki bai ni kabane akana kam butia Tamau n arau.” (Ioane 15:​16, Te Baibara ni Katorika) E aki taekinna Iesu bwa ti riai ni kaineti ara tataro nakoina ao ngkanne e na taetae nakon te Atua ibukira. Ma ngkana a na ongoraeaki ara tataro, e riai ni kaineti nakon te Atua rinanon Iesu ao akea riki.

Ngke a butiia Iesu taan rimwina bwa e na reireinia n tataro, e kaekaia ni kangai: “Ngkana kam tataro ao kangai, ‘Tamara, e bia katabuaki aram.’ ” (Ruka 11:2) Eng, “ngkana” ke ni katoaa te tai are ti tataro iai, ti aki riai ni kainetia nakon Iesu ke tao temanna riki ma bon tii nakon te Atua. N taraan ana angareirei Iesu aika mataata aikai, e aki ngkanne riai bwa ti na iangoia bwa a riai ni kainetaki ara tataro nakon te Atua rinanon Iesu Kristo ao tiaki rinanoia taan raoi riki tabeman ke “santo ke santa”?

Te tataro bon iteran naba ara taromauri ae rangi ni kakawaki ao ngkana ti na taromauria temanna riki irarikin te Atua, e mataata raoi n anne bwa e aki boraoi ma te reirei man te Baibara. (Ioane 4:​23, 24; Te Kaotioti 19:​9, 10) Anne bukina ngkai ti riai ni kaineti ara tataro tii nakon te Atua.

KO RIAI NI MAAKU NI BUTIIA TE ATUA?

N ana Kabwarabwara i aon te Maunga Iesu ao e anga te katoto ni kaineti ma te tama are e butiaki iroun natina te bwai ae na kanna. E kona te tama n angan natina te atibu n oneani mwin te kariki? Ke te naeta ae boitin n oneani mwin te ika? (Mataio 7:​9, 10) E rangi ni kangaanga iangoan te karo ae tatangira bwa e na karaoa anne!

Iangoa te kabotau teuana ae titeboo ma anne n aia taratara kaaro. Aongkoa iai ana bubutii natim ae kakawaki ae e na tuangko. Ko a tia ni karikirakea raoi am reitaki ma ngaia ao ni kaotia bwa ko kai kawaraki n taai nako. Ma ibukini maakuna ae akea bukina n arom ni kaekaa, e a manga tuanga temanna bwa e na karokoa ana bubutii iroum. Tera am namakin iai? Ao tera arom ngkana e a kakaraoa reitakina ma ngkoe rinanon te aomata aei ao ko noria bwa e na bon teimatoa ni kakaraoia? Ko na kukurei n te babaire anne? Ni koauana ko na bon aki! A tangiria kaaro aika tatangira bwa a na bubutii natiia nakoia ao a na aki maaku n tuatua baika a kainnanoi.

Ni kabonganaan ana kaikonaki aei ibukin te ataei are e bubutii te amwarake, e taetae Iesu nakoia aomata aika bati ni kangai: “Mangaia are e ngae ngke kam buakaka ma kam ataa te angania natimi bwaintangira aika raraoi, ao ai batira riki ngkanne nanon Tamami are i karawa ni kan anga bwaintangira aika raraoi nakoia akana butiia!” (Mataio 7:11) Ni koauana, e korakora nanon te karo ni kan angan natina baika raraoi, ma e a korakora riki nanon Tamara are i karawa ni kan ongoraei ao ni kaekai ara tataro.

E tangirira te Atua bwa ti na butiia n ara tataro e ngae naba ngkana ti taonakinako n ara bure. E aki mwiokoia tabeman bwa a na ongoraei ara tataro. E kaumakira te Baibara ni kangai: “Angani Iawe rawawatam, ao e na buokiko.” (Taian Areru 55:​22, BK) N oneani mwin are ti na onimakina karokoan ara bubutii rinanon te santo ke tao temanna riki, ti riai ni karikirakea ara iango ae raoiroi ibukin Iehova ae te Atua.

E tabeakinira n tatabemanira nako Tamara are i karawa. E kani buokira ma ara kangaanga ao e kaoira bwa ti na kaania. (Iakobo 4:8) Ai kukureira ngaira ngkai iai ara tai ni butiia Atuara ae Tamara ae te ‘Tia Ongoraei tataro’!​—Taian Areru 65:​2, BG.