KO URINGNGA?

Tera te bibliomancy, ao tera aia iango Kristian iai?

Nanon te taeka ae bibliomancy bon tii kaukan te Baibara ao te kibu ane e moan noria te aomata anne, ai boni ngaia naba te ibuobuoki ae kainnanoia. A aki kataia Kristian ni koaua n ukeri kanikina aika aongkoa a kaotii baika tuai n riki, ma a ukeuke n reirei n te Baibara bwa a na karekea te atatai ae eti ao ana kairiri te Atua.​—15/12-E, iteraniba 3.

Tera “te aonnaba” ae tabe ni maunanako?

“Te aonnaba” ae tabe ni maunanako bon taekaia botannaomata ni kabane ake a aki kaboraoi maiuia ma ana kantaninga te Atua. (1 Ioane 2:17) A na kamaiuaki aomata aika kakaonimaki ao e na aki kamaunaaki te aonnaba.​—1/1, iteraniba 5-7.

E ngae ngke e a tia ni mate Abera, ma e kanga n ae e bon taetae naba nakoira? (I-Ebera 11:4)

E boni karaoa anne rinanon ana onimaki. Ti kona ni karekei reireiara mairouna ao ni kakorakoraira ni katotonga ana onimaki. E bon teimatoa naba ni maiu ana katoto ao ni manena.​—1/1, iteraniba 12.

Baikara bwaai ake ti riai n taratarai raoi bwa a na aki karaurenakoira ma te Atua?

Aikai tabeua: ara mwakuri ni kareketianti ke nakoara ae teimatoa, te kaakibotu ao te kaokirii aika ti rinei, te reitaki ma ara koraki ae kabaneaki man te ekaretia, kamanenaani kukune aika boou, tabeaiangara ni marurungin rabwatara, iaiangoan te mwane n te aro ae kairua ao n iangoira bwa a raoiroi riki ara iango ke nakoara.​—15/1, iteraniba 12-21.

Tera reireiara man nanorinanon Mote?

N oneani mwin are e na kariaia Mote bwa e na kainikatonga ibukin te mwaaka ni kairiri are e anganaki, e aki tii onimakinna ma e onimakina te Atua. Ti na bon aki naba kariaia te mwaaka, te kairiri ke te konabwai ae ti anganaki bwa ti na kainikatonga iai, ma ti riai n onimakina Iehova. (Taeka N Rabakau 3:​5, 6)​—1/2, iteraniba 5.

A na maeka ia akana a kautaki?

E tianaki mwaitiia naake a na maeka i karawa nakon​—144,000. Ma angiia ake a na kautaki, a na kaokaki bwa a na maiu i aon te aba ma kantaningaan te maiu n aki toki iai.​—1/3, iteraniba 6. 

Tera ae nanonaki n ‘aki korotobibian nanoia’ tibun Iteraera? (Ieremia 9:​26, BG)

A karitei ao a rawa ni bitii maiuia ao a riai ni kanakoi baike a tangiri ao aia iango, aika a kairiia bwa a na kakeaa bongan ana tua te Atua. (Ieremia 5:​23, 24)​—15/3, iteraniba 9-10.

N te aro raa are e riki Iesu bwa te banna ni katoto ibukin te maiu ae rangi manena?

Iai manenani maiuna bwa e kakaraoa nanon te Atua. E korakora tangiran Tamana ao e tangiriia naba aomata. Ibukin anne, e ataia Iesu bwa e tangiraki ao n akoaki iroun Tamana. Akanne aanga aika kakawaki ake e kona n reke iai te maiu ae rangi ni manena.​—1/4, iteraniba 4-5.

Tera kanoan ana botaki te Atua n te aonnaba?

Bon te Rabwata n Tautaeka, komete ibukin aobiti n tararua, mataniwi aika mwamwananga, rabwata n unimwaane, taian ekaretia ao ai taani Kakoaua n tatabemania nako.​—15/4, iteraniba 29.

E aera ngkai ti kona n taekinna bwa e aki ribuaka te Atua ni karaoan ana motikitaeka?

E aki kukurei Iehova ni maten te aomata ae buakaka. (Etekiera 33:11) E kaotaki mani baike e karaoi ngkoa bwa e tatangira ao e kauringia aomata rokon ana motikitaeka. Ibukin aei, ti a kona ni kantaningaa kamaiuara ni motikitaeka aika imwaira.​—1/5, iteraniba 5-6.

A tiringaki kamwarua ni katineaki i aon te kai irouia tibun Iteraera?

A bon aki. A karaoa anne natannaomata ake tabeua riki rimoa ma tiaki tibun Iteraera. N taini korean te Koroboki ae Tabu n te Taetae n Ebera ao a tiringaki taani kakaraoa ae buakaka ni karebanaaki moa n atibu. (Nakoaia Ibonga 20:​2, 27) Imwina, e katineaki rabwatan te aomata are e mate i aon te kai bwa te kauring nakoia tabemwaang.​—15/5, iteraniba 13.

Bukin tera bwa e rangi ni kangaanga reken te rau n te aonnaba?

E ngae ngke a rangi ni bati baika a mwaatai iai aomata ma a bon aki kona ni kaeti eueutakia. (Ieremia 10:23) E tautaekana te aonnaba Tatan, ngaia are a aki kona aomata ni karekea te rau. (1 Ioane 5:19)​—1/6, iteraniba 16.