“A bati aomata aika riribaai”

AROU RIMOA:

I ikawairake ni kautuni kaawan Chile ae Santiago n te tabo ae a bati iai taian drug, taiani kaeng ao te iowawa. E bon tiringaki tamau ngke nimaua au ririki. Imwin anne, e tekateka n taanga tinau ma te mwaane ae iowawa. E katoatai n oreai ma tinau. Bon iai naba ngkai rawawatan nanou ma au iango man ririki akanne.

Ngke I a ikawai, ao I a riki bwa te aomata ae rangi n iowawa imwini karaoani mwakuri aika bubuaka nakoiu. I tatangiri katangitang aika rangi ni karongoa mani kaungai baika bubuaka, I manging n te aro ae riao ao n tabetai I kamanenai taian drug. I aki toki n irekereke ma te un i nanon te kawai ma taani kaboonakoi taian drug, ake a kataia n tiringai n taai tabetai. N te taina, a a kabooa temanna te mwaane ae rangi n ataaki mani buakaka kaain te kaeng ake aiau bwa e na tiringai, ao e ewarai teuana te tai ma e a reke naba angau ni birinako. N te tai teuana riki, a taua atu ma te katii aia kaeng teuana taani kaboonakoi drug ao a kataia ni katineai i aon te kai.

N 1996, I a tangira ma Nei Carolina ao ti mareaki n 1998. Imwini bungian ara karimoa ae te mwaane, e a moanna n nako nanou ibukina bwa I rangi ni kakaiun ao e aki ngkoa ao I a katotonga tamau are te kauaei ni karaoi mwakuri n iowawa n te aro ae riao nakoia kaain au utu. Mangaia are I a ukera buokau man te botaki teuana ae tabe ma kanakoraoan aroia aomata aika bubuaka. I anganaki au bwainnaoraki ao buokan au iango ma bon akea bitakiu iai. I bon teimatoa naba n un ni kairua aika uarereke ao n aki kona n taona nanou iai. I kakorakoraai ni katoka arou ae kammarakaia kaain au utu ae bon te iango ae raoiroi, ma I a karaoia n te aro ae kairua ngke I kataia ni bakabureai. I tekeraoi bwa I aki mate.

I a bon tia ni kakewea ae iai te Atua i nanon ririki aika bati, ma ngkai I a tangiria ni kakoauaa ae iai te Atua. Mangaia are I a bobotaki ma kaain te Aro ae te Evangelic i nanon te tai ae aki maan. Imwin anne, e a reirei n te Baibara kaainnabau ma Ana Tia Kakoaua Iehova. I riribaiia taani Kakoaua ao a bati au tai ake I takarua n taekin taeka aika kamatauninga nakoia. Ma a kaekaa ma te rau n taai nako ae te aro ae I aki kantaningaia.

N te bong teuana, e a tuangai Carolina bwa N na nora Taian Areru 83:18 n au Baibara. E kamatataaki n te kibu anne aran te Atua ae Iehova. I boni mimi ngke I a ataia ae I a tia n reiakina taekan te atua temanna n au Aro, ma tiaki Iehova. Ni moan te ririki 2000, I a moana naba au reirei n te Baibara ma taani Kakoaua.

ARONI BITAKINI MAIU MAN TE BAIBARA:

Ngke e a tabe n rikirake otau, I a namakina kabebeteau n ataakin ae Iehova bon te Atua ae nanoanga ao ni kabwarai buure. N te katoto, n Te Otinako 34:​6, 7 (BG), e kabwarabwaraaki iai Iehova bwa ‘te Atua ae on n te atataiaomata, ae akoi, ae iremwe n un, ae e bati te nanoanga ma te koaua irouna; ae e kawakina te nanoanga imwaia nga, ma ni kabwarai buakaka ma riaoan tuua ma buure.’

Ma e ngae n anne, e boni kangaanga maiuakinani baike I tabe n reiakin. I kakoauaa bwa N na bon aki kona n tokanikai i aon anuau ae te iowawa. E kaungaai ma te akoi Carolina ni katoaa te tai are I kabwaka iai. E kauringai naba bwa e bon nora au kakorakora Iehova. I boni kakorakoraaki n ana boutoka neiei bwa N na teimatoa ni kekeiaki ni kakukureia Iehova, e ngae naba ngkana I namakinna n taai nako bwa ai akea uaau.

N te taina, e a tuangai Alejandro are e reirei ma ngai n te Baibara bwa N na wareka I-Karatia 5:​22, 23. E taekinaki ni kiibu akanne bwa uaan taamnein te Atua bon “te tangira, te kimwareirei, te rau, te taotaonakinnano, te akoi, te raoiroi, te onimaki, te nimamannei, ao te taubaang.” E kabwarabwaraa nakoiu Alejandro bwa e aki boto karikirakean aroaro akanne i aoni korakorau, ma e boto i aon te taamnei ae raoiroi mairoun te Atua. A boni bitaki au iango ni kabane man te koaua anne!

Imwin anne, I a ira aia bwabwaro ae bubura Ana Tia Kakoaua Iehova. Ibukin norani baireana raoi, itiakina ao te itangitangiri iai, I a ataia bwa I a kunea te Aro ae koaua. (Ioane 13:​34, 35) I boni bwabetitoaki ni Beberuare 2001.

AROU NI KAKABWAIAAKI:

E a tia ni bita aroarou Iehova man te aomata ae iowawa nakon ae rau. I namakinna bwa e a tia n tabekairake mai buakon te bokaboka ae nimtai. A bati aomata ake a riribaai, ao I aki bukinia bwa a buakaka. Ma I kukurei ngkai bwa I a beku ibukin Iehova ma kaainnabau ao natira mwaane aika uoman.

A aki kona ni kakoauaa korakorani bitakini maiu au utu ao raoraou rimoa. Ao n tokina, a a kan reiakina te koaua man te Baibara tabeman mai buakoia. I boni kakabwaiaaki naba bwa e reke au tai ni buokiia aomata bwa a na kinaa Iehova. Ai boni kakukureira norakia aomata ni bitii maiuia man te koaua ae n te Baibara!