Tera Aron Rotakim ni Karan te Bwai Teuana?
Ngkana ko taratara nako, a kaai ni mwakuri matam ao kaburorom ni katauraoa am iango n te bwai ae ko noria. Ko nora mwakoron te uaanikai teuana ae uakaan ao ko iangoia bwa ko kani kanna ke ko aki. Ko tararake n taraa karawa ao ko iangoia bwa e na aki bwaka te karau n te bong aei. Ko nori taeka akana ko wareki ngkai ao n iangoi nanoia. Ni koauana, ko bon rotaki ni karaia. E koaua anne?
E kairiko karan te uaanikai are ko noria bwa ko na iangoa tawaana ao kani kanakina. Ko buokaki naba ni karani karawa ao taian nang bwa ko na ataa iai kanoan te bong. Ngkai ko wareki taeka aika n te kaongora aei, a bon aki maraki matam ni kaokoroni karan te koroboki ao te beeba ae koreaki i aona. Eng, tao n akean ataakin anne, ko teimatoa ni kamanena karan te bwai teuana bwa e na buokiko ni katauraoa am iango ni kaineti ma te aonnaba ae otabwaniniko. Ma a bon rotaki naba am namakin ni karan te bwai teuana.
ROTAKIN ARA NAMAKIN NI KARAN TE BWAI TEUANA
Ngkana ko nakonako i marenani baike a katokaaki iai bwain te titooa, ko a otabwaniniaki ni bwaoki, tiin, baeki aika kakaokoro ao a a bati riki ake a a tia ni baireaki ao ni karaoaki bwa a na katika matam. Ngkana tao ko ataia ke ko aki, ma a a tia taani katanoata ni karauia raoi n rinei karani bwaai ke kaara aika irengarengan ibukin anaakin nanom ni baike ko tangiri, tao te mwaane ke te aine ngkoe ao ai am ririki ni maiu. A atai naba karani bwaai aika kona ni kauekea tangiran te bwai teuana, taani katamaroai auti, taani korei taamneini kunnikai n aekaia nako ao taani korobanna.
A kona aomata ni kabwarabwarai taiani kara n aaro aika kakaokoro ni kaineti ma abaia ao kateina. N te katoto, i Atia ao a kairekerekea te uraura ma te tekeraoi ao te bongi ni botaki aomata tabeman, ma n iteran Aberika tabeua e tei te kara ae uraura bwa te nanokawaki. Ma n aki ongea aroni kaikawaaia, bon titeboo aia namakin aomata nako ni kaineti ma karani bwaai tabeua. Ti na maroroakini karani bwaai aika tenua ao arom ni kona n rotaki iai.
TE URAURA. E rangi ni kai noraki te kara aei. E aki toki ni kairekerekeaki te uraura ma te korakora, te buaka ao te kabuanibwai. E korakora rotakin aia namakin aomata n te kara aei, e kona ni kanakoraoa mwakurian amwarake aika n te rabwata, e karakaa te ikeike, ao e karakaa butin te raraa i nanon te ia.
N te Baibara ao te taetae n Ebera ibukin te “uraura,” e reke man te taeka ae nanona te “raraa.” E kabonganaaki te kara ae turu uraurana ke ae uraroo n te Baibara ibukini kabwarabwaraan te taamnei ae na ururingaki ni kaineti ma te kabekaau ae tiritiri ae kunnikainna n te beboo ma te uraroo are tekateka i aon “te man ae tiritiri ae uraroo . . . ae onrake n aara aika kabuakakaa te Atua.”—Te Kaotioti 17:1-6.
TE KIRIIN. Te namakin ae reke n te kara aei boni kaitaraan are reke n te uraura bwa e kawaeremwea mwakurian amwarake aika kanaki i nanon te rabwata ao e karekea naba te rau. Te kara ae te kiriin e karekea te kukurei n angiin te tai ao raun te iango. Ti namakina te kukurei ngkana ti nori onnaroka ao raaben tabuki aika kiriin. E taekinaki n te rongorongo ni Karikani Bwaai bwa e kariki uteute ma aroka aika mawawa te Atua ibukia aomata.—Karikani Bwaai 1:11, 12, 30.
TE MAINAINA. E aki toki ni kairekerekeaki te kara aei ma te oota, te mano raoi ao te itiaki. E kairekerekeaki naba ma aroaro aika te raoiroi, akean te bure ao te itiwewe. Te mainaina bon te kara ae aki toki ni mwaneweaki n te Baibara. A kaotaki aomata ao anera n taiani miitara bwa a kunnikainia n te mainaina, ae katereaki iai te raoiroi ao itiakin aia onimaki. (Ioane 20:12; Te Kaotioti 3:4; 7:9, 13, 14) A tei aoti aika mainaina ao taan toka i aoia aika a kunnikainia n te rinen ae mainaina man itiaki ibukin te buaka ae raoiroi. (Te Kaotioti 19:14) E kamanena te kara ae te mainaina te Atua ni katerea iai bwa e tauraoi ni kabwarai buure: “Ngkana tao ai aroni kunnikai aika uraura ami bure, ao a na riki ni mainaina n ai aron te tinoo.”—Itaia 1:18, BG.
BON TE BWAI NI KAURING KARAN TE BWAI TEUANAE kaotiotaki wanawanan te Atua ni kaineti ma aia namakin aomata ni kamanenaani karan te bwai teuana n te Baibara. N te katoto, ni bokin te Baibara ae Te Kaotioti ao e a kaman taekinaki iai te bwai ae ti a rinanona ngkai, n ikotaki naba ma te buaka, te rongo ao te mate ae aki kantaningaaki man akean te amwarake ao aoraki aika kamamate. Ibukini buokara bwa ti na ururinga aei, e a kairaki ara iango n te miitara ae anainano nakoia taan toka i aon aoti bwa tiaki aoti aika ti taneiai ma ngaai ma a kaokoro bwa iai karaia aika a tei ibukini bwaai ke mwakuri aika kakaokoro.
Te moan, iai te aoti ae rangi ni mainaina ae tei ibukin ana buaka ae raoiroi Kristo Iesu. Imwina, ti nora te aoti ae uraura ae tei ibukin te buaka i marenaia natannaomata. E taorimwiaki te aoti aei n te aoti ae kakamaaku ae roroo ae tei ibukin te rongo. Imwin anne, ti nora “te aoti ae maii, ao aran teuare toka i aona, te Mate.” (Te Kaotioti 6:1-8) E kona n ueke ara namakin ae boraoi ma kabwarabwaraani karan aoti aikai. Ti kona ni kai uringi aoti aika kakaokoro karaia aikai ao reireiara naba mai iai ibukin ara bong aikai.
A bati katoto n te Baibara ae kamanenaaki iai karan te bwai teuana ibukini kabwarabwaraani kaikonaki n te aro ae mataata. Eng, e wanawana te tia Karika te ota, te kara ao mataia aomata ni kamanena karan te bwai teuana bwa te bwai ni kauring ae tei ibukin taamnei aika ota raoi ao n ururingaki irouia taani wareware. Ti buokaki ni karan te bwai teuana bwa ti na katauraoa ara iango ao ni kaotinakoi ara reke iai. A rotaki naba ara namakin ni karan te bwai teuana. E kona naba ni buokira karan te bwai teuana bwa ti na ururing koaua aika kakawaki. Bon te bwaintituaraoi mairoun ara tia Karikiriki karan te bwai teuana bwa e buokira bwa ti na maiu ni kukurei.