ATUN TE MAEKATIN | KEEWE AIKA KAIRIRI NAKON IANGOAN AE E AKI TATANGIRA TE ATUA
Te Kabokorakora Ibukin Tangiran te Atua
“ ‘Ko riai n tangira Iehova ae Atuam ma nanom ni kabanea, maium ni kabanea ao am iango ni kabanea.’ Te tua aio bon te kabanea ni kakannato, ao te moan tua.”—Iesu Kristo, 33 C.E.a
A iangoia tabeman bwa e kangaanga karekean tangiran te Atua. E taraa ni kangaanga irouia kabwarabwaraan te Atua, ao e aki tabeakinira ke e bon ribuaka naba. Iangoi aia taeka aomata aikai:
“I tataroa buokau mairoun te Atua ao n te tai naba anne, I a namakinna bwa e aki tabeakinai ike e a kangaanga iai au itoman ma ngaia. I iangoia bwa bon akea rabwatan te Atua ao akea ana namakin naba.”—Marco mai Itare.
“E ngae ngke I kani beku ibukin te Atua ma nanou ni kabane, ma e taraa n aki tabeakinai. I iangoia bwa te Atua ae iowawa ao e tii kakatuuaaeira. I aki kakoauaa ae e tatangira.”—Rosa mai Guatemala.
“Ngke I uarereke, ao I kakoauaa ae e ukoukori ara bure te Atua, ao n tauraoi ni katuuaaeira ngkana e riai. Imwina riki, I a ataia bwa e bon aki tabeakinai. Titeboo te Atua ma te buraaim minitita ae bairei taekaia aomata ake e tautaekania ao e bon aki tabeakinia.”—Raymonde mai Kanata.
Tera ngkoe am iango? E kangaanga karekean tangiran te Atua? A a tia ni mamaroroakina te titiraki anne Kristian i nanon tienture aika bati. Ni koauana, n 500 A.D. nakon 1500 A.D., a aki tatataro nakon te Atua ae Moan te Mwaaka angiia kaain Aaro ake aongkoa Kristian ngaiia. Bukin tera? A rangi ni maaka te Atua. E taekinna n te aro aei te tia Kororongorongo ae Will Durant: “E na kanga te tia bure n tataro nakon te Atua ae rangi ni kakamaaku ao n aki tabeakinira?”
E kanga n iangoaki te Atua bwa e “rangi ni kakamaaku ao n aki tabeakinira”? Tera ana reirei ni koaua te Baibara ibukin te Atua? Ko kona ni buokaki bwa ko na tangira te Atua man reiakinan te koaua ibukina?