“Te Tia Karekei Kaniwangaia te Koraki Ake A Kakorakoraia n Ukoukoria”

E koaua bwa a kakawaki iroun Iehova baika a karaoi taan taromauria ibukini kakukureiana? A kona ni kangai tabeman, e bon aki ibukina bwa a iangoia ae e aki tabeakinira te Atua. Ma te aeka n iango anne, e a karikirakea te iango ae rangi ni kairua ibukin te Atua. E kaetaki raoi te rongorongo anne n Ana Taeka ae te Baibara. E kakoauaaki nakoira iai taekan Iehova bwa e kakawaki irouna aia kakorakora taan taromauria aika kakaonimaki ao ni maiuakinna. Iangoi ana taeka te abotoro Bauro aika n I-Ebera 11:6.

Tera ae ti riai ni karaoia ngkana ti na kakukureia Iehova? E korea ae kangai Bauro: “Ngkana akea te onimaki ao e aki kona ni kakukureiaki te Atua.” Noria bwa e aki taekinna Bauro ae e kangaanga kakukureian te Atua ngkana akea te onimaki. Ma e taekinna te abotoro bwa e aki kona ni kakukureiaki te Atua. N taeka riki tabeua, te aroaro teuana ae kakawaki ibukini kakukureian te Atua bon te onimaki.

Tera aron te onimaki ae e kakukureia Iehova? E riai n irekereke ara onimaki ma baika uoua. Te moan, ti “riai ni kakoauaa bwa bon iai ngaia.” Ti na kanga ni kona ni kakukureia te Atua ngkana ti nanououa bwa iai ngaia? E bon irekereke te onimaki ni koaua ma ae bati riki bwa a boni kakoauaa naba taimonio bwa iai Iehova. (Iakobo 2:19) Ngkana ti kakoauaa bwa bon iai te Atua, ti a riai ngkanne ni kaungaaki ni mwakuria, ae nanona bwa ti na kaotiota koauan ara onimaki ni maiuakinan ae e na kukurei iai.​—Iakobo 2:​20, 26.

Te kauoua, ti “riai ni kakoauaa bwa” te Atua bon ‘te tia karekei kaniwanga.’ E kakoauaa ma nanona ni kabane te aomata ae onimaki ni koaua bwa e aki matebuaka ana kakorakora ni maiuakina ae e kukurei iai te Atua. (1 I-Korinto 15:58) Ti na kanga ni kakukureia Iehova ngkana ti nanououa ibukin ana konabwai ke nanona ni kan anganira kaniwangara? (Iakobo 1:17; 1 Betero 5:7) Ngkana e iangoia te aomata bwa e ribuaka te Atua, e aki tabeakinira ao e kakeai bongara, e bon aki kinaa ngkanne te Atua are ana boki te Baibara.

Antai aika a na karekeaki kaniwangaia iroun Iehova? E taku Bauro: “Te koraki ake a kakorakoraia n ukoukoria.” E taekinaki n te boki teuana ibukia taan raira te Baibara bwa te taetae ni Kuriiti ae rairaki nakoni “kakorakoraia n ukoukoria,” e aki nanonaki n “ukeran taekana” ma e nanonaki iai kaatuuan “taromaurian” te Atua. E kabwarabwaraaki n te boki teuana riki bwa te taetae ni Kuriiti aei bon te anga teuana ae iangoaki iai korakoran ao kaatuuan te mwakuri. Eng, e karekei kaniwangaia akana kaungaaki n aia onimaki Iehova bwa a na taromauria ma n tangiria ma nanoia ni kabane ma te ingaingannano.​—Mataio 22:37.

Tera aron Iehova ni karekei kaniwangaia taan taromauria aika kakaonimaki? E a tia ni beritana te kaniwanga ae rangi ni kakawaki nakon taai aika imwaira ae kaotaki iai korakoran ana akoi ma ana tangira, ae te maiu n aki toki n te aonnaba ae te Bwaretaiti. (Te Kaotioti 21:​3, 4) A boni karekei naba kakabwaia aika rangi ni bati akana kakorakoraia n ukoukora Iehova ni boong aikai. Ibukina bwa a buokaki iroun te taamnei ae raoiroi ma te wanawana ae n ana Taeka, a a karekei iai maiuia aika rangi ni manena ao ni kakukurei.​—Taian Areru 144:15; Mataio 5:3.

Ni koauana, bon te Atua ae nanoanga Iehova ae a kakawaki irouna aia beku taan taromauria ma nanoia ni kabane. Ko kaungaaki bwa ko na kaaniko riki ma ngaia man ataakin anne? Ngkana ngaia anne, e aera ko aki reiakina ae bati riki ibukin arom ni karikirakea ao ni kaotiota te aeka n onimaki ae a na rangi ni bati iai kakabwaiaam mairoun Iehova?