E bitaki maiu n te berita ibukin te aonnaba ae bwaretaiti!

AROU RIMOA:

I bungiaki i Riga, ae kautun Latvia. I uaia ni kaikawaaki ma tariu iroun tinara. E ngae ngke boni kaain te Aro ni Katorika tinara, ma ti irira te taromauri tii ni boong ni motirawa ibukin te Aro. I kakoauaa n taai nako bwa iai te mwaaka ae rietata riki, ma kioina ngkai bon te roro n rikirake ngai e a katabetabeaki au iango ni bwaai aika bati aika I tangiri.

Ngke I a tabe n ikawai, e a kunea tinau bwa iai au tarena ni kamaenakoi bwaai ao ni manga kaoki nakon aroia. E raraoma n taai nako ngkana e kitanai n tii ngai ibukina bwa a bati bwaai aika kona ni kamaenakoaki n te auti. Ai ngaia are e a anganai au bwai n takaakaro ae karaoaki man te biti ae te mwakuri ni kateitei, ao I rangi ni kani kateia ao imwina I a manga kamaenakoa. Te bwai teuana riki ae mamate nanou iai bon te kabuti rebwerebwe. E karina arau tinau n te kauaia n te rebwerebwe ae uarereke ae ko kona ni bwatika naba iai ae te Zelta Mopēds (The Golden Moped). I moanna man te kauaia rebwerebwe aika uarereke ao imwina ai bon te rebwerebwe.

I baitii n reiakina kabutan te rebwerebwe ao n te tai ae waekoa I a rang ni mwaatai n te takaakaro aei ae te kabuubuti are e karuanikai naba. I riki bwa te tiambion tenua te tai n taiani kauaia n aekaia nako n rebwerebwe aika kakaokoro, ao uatai au tai ni moanna n te Baltic States Superbike Championship.

ARONI BITAKINI MAIU MAN TE BAIBARA:

N te tai are I a rangi ni mwaatai iai n au takaakaro aei ao e a kaitiboo ma Ana Tia Kakoaua Iehova raou ae Nei Evija (are e a riki rimwi riki bwa kaainnabau). E boni kunei aia boki tabeua, ae iai i nanona te booma ae katauraoaki ibukin te kororeta ni bubutii ibukin te reirei n te Baibara. E kanoaa te booma anne ao ni kanakoa n te meeri. A kawara neiei n te tai ae waekoa uoman taani Kakoaua, ao ni moana te reirei n te Baibara ma ngaia. N au iango, e raoiroi anne ma bon akea tangiran te Aro irou n taai akanne.

Imwina riki, a a tuangai taani Kakoaua aikai bwa N na ongora ngkana e reirei n te Baibara Evija. I karaoa are a tuangai ao I kukurei ni baike I ongoraei. Te bwai teuana ae rotaki riki iai nanou, bon te berita n te Baibara ibukin te aonnaba ae bwaretaiti. N te katoto, e kaotaki nakoiu te kibu ae Taian Areru 37:10, 11 (BG) ae kangai taekana: “Ai ti teutana riki, ao akea naba te aomata ae buakaka: Eng, ko na tarataraa raoi ana tabo, ao akea naba. Ma a na abana te aba akana nimamanei; ao a na kukurei ni kabatian te raoi.” E rangi n rotaki nanou n te berita anne.

E teimatoa n rikirake tangirani bwaai n taamnei irou, ao I a moanna n ataia ae a bati aia kewe Aaro. Ibukin anne, e a rangi n rotaki nanou n reirei aika n te Baibara bwa n etina, I a mataata iai.

Ngke I a waakinaanako au reirei n te Baibara, I a ataia ae moan te kakawaki te maiu iroun Iehova, ao boni mairouna koburaken te maiu. (Taian Areru 36:9) E rotaki naba iai arou ni kauaia rebwerebwe n te aro are I aikoa kani karuanikaia maiu. N oneani mwin anne, I a kani kamanena maiu n neboa Iehova. Ai ngaia are, e aikoa kakawaki irou tanoatan taekau, kamoamoaau ao ingaingan nanou n te kauaia rebwerebwe.

N 1996, I a ira aia bwabwaro Ana Tia Kakoaua Iehova ibukin aaba aika kakaokoro i Tallinn i Estonia, ae aki raroa man te tabo ni kauaia rebwerebwe aika uarereke are I aki toki n iriria. I noria aomata man aaba aika bati aika kakaokoro ake a bobotaki ma te rau ao te boonnano n te bwabwaro anne. N te katoto, ngke e bua ana bwauti ni mwane temanna te tia Kakoaua, n au iango e na aki kona ni manga reke. Ma imwin te tai ae aki maan, e a kuneaki te bwauti ni mwane anne iroun temanna te tari te aine ao e kaokia n akea te bwai ae bua mai iai. I bon rangi ni mimi n aei! I a ataia ngkai bwa a kaboraoi maiuia taani Kakoaua ma tuua man te Baibara aika kakawaki. E teimatoa n rikirake ara atatai n ara reirei n te Baibara ngai ma Evija ao n 1997 ti a bwabetitoaki ao n riki bwa Ana Tia Kakoaua Iehova.

AROU NI KAKABWAIAAKI:

A a tia ni mate raoraou tabeman aika ataeinimwaane ibukina bwa a aki kawakini maiuia ni kaineti ma kabutan aia rebwerebwe. I a ataia man reiakinan te Baibara bwa N na boni kaekaa bukinau i matan te tia Anga te maiu ae Iehova. I boni kamaiuaki man te atatai aei.

I kakabwaiaaki ma Evija bwa ti beku ni kabwanina ara tai n aia aobiti n tararua Ana Tia Kakoaua Iehova i Riga i nanon aua te ririki. Ao ngkai ti a kimwareirei ni kaikawaa natira te aine ae Alise, ao ni buokia bwa e na karikirakea tangiran Iehova. I mwiokoaki naba bwa N na kabanea teuana te bong ni katoa wiki n te aobiti n raitaeka ni karaoi uruakini kaa ao bwaai riki tabeua. I rangi ni kukurei ni kamanenai rabakau ake I reiakini ngke I uarereke! Eng, I teimatoa ni kamaenakoi bwaai ao ni manga kaoki nakon aroia.

E rangi ni kakawaki irou au tai n uarongorongoa taekan te Atua ae koaua ma au utu, ao I kakaitau riki ibukini baika I a tia n reiakini man te Baibara. Ni koauana, e bitaki maiu n te berita ibukin te aonnaba ae bwaretaiti!