Karekeani Korakorau n Au Tai n Aoraki

Ngkana I iaiangoa arou ngke I uarereke ao I a uringi iai boong aika kakukurei ni menau ngkoa n aia auti au karo i buakonikai i Buranti n te itera maiaki. E karaoa tieu tamau ao I kani biribiri ni katomimia te onnaroka. N 1966, a kawarira Ana Tia Kakoaua Iehova ao a rangi ni maan ni maroro ma tamau. Tii itiua te namwakaina imwina ao e a motinnanoia bwa e na riki bwa te tia Kakoaua. N te tai ae waekoa, e a kakairi tinau iroun tamau ao I a kaikawaaki i nanon te utu ae akoi man tatangira.

A a moanna n reke au kangaanga tabeua te tai imwin okira mai Tibein are abaia au karo. I moan namakina te maraki ae korakora ni baiu ao n toma ni waeu. Imwini kakawaraia taokita aika bati i nanon uoua te ririki, e a reke ara taokita ae rangi ni mwaatai ibukin te ri are e a taetae ma te nanokawaki ni kangai: “Kam a rangi n oimwi,” ao e tang iai tinau. I ongongo taeka aika boou ake a taekinaki i nanon te ruu ae mwaitoro ma n roo nanona aika te “autoimmune chronic illness” ao te “juvenile polyarthritis.”a E ngae ngke e karako au atatai ngkai bon te teinnaine ae ai tibwa tebwina au ririki ma I ataia bwa e aki raoiroi aorakiu.

E iangoia te taokita bwa N na bwainnaorakiaki n aia onnaoraki ataei. N rokou n te tabo anne ao I aki kukurei bwa e aki toronibwai te onnaoraki. E matoa te kairiri iai: A korea irau tiina ake iai ao ni karina au kaboraoi ae bwabwainaki rimoa. I tang ao n iango ni kangai: ‘N na kanga n nanomwaaka ni kaaitara te maiu ikai?’

I NAMAKINA ANA MWAMWANNANO IEHOVA

Ibukina bwa a a tia au karo n reireinai bwa N na beku ibukin Iehova, I rawa n irekereke ma aia bukamaru Katorika n te onnaoraki. E kangaanga irouia tiina bwa a na oota bwa e aera ngke I rawa. I bubutiia Iehova bwa e na aki kitanai ao I waekoa n namakinna bwa e mwaneai ni baina kaanga aron te karo ae tatangira are e mwanokaa raoi natina ma te tangira.

A kariaiakaki au karo bwa a na kakawarai i nanon te tai ae kimototo ni katoa Kaonobong. A uotii booki ake aanaki man te Baibara ao I wawareki bwa e aonga n teimatoa korakoran au onimaki. A aki kariaiakaki angiia ataei ni kawakin aia boki ma a kariaia tiina bwa N na kawakin au boki n ikotaki naba ma au Baibara are I wawarekia ni katoabong. I mamaroro naba ma ataeinnaine tabeman ibukini kantaningaan te maiu n aki toki i aon te aba ae Bwaretaiti ike a nang akea ae na aoraki iai. (Te Kaotioti 21:3, 4) N aki ongea namakinan te nanokawaki ao te maroaa n taai tabetai, ma I kukurei bwa e rikirake ni korakora riki au onimaki ao tangiran Iehova.

Onoua te namwakaina imwina, a a kaotinakoai au taokita. E a aki rangi ni kakaiaki aorakiu ma I kukurei bwa I a manga okiria au karo. A rikirake ni bwaoua toman riiu ao e a korakora riki marakiu. E moan reke irou te aoraki aei ngke tebwi tabun au ririki. E ngae n anne, I a bwabetitoaki ngke ai 14 au ririki, ao I motinnanoia bwa N na karaoa au kabanea n tamaroa ni beku ibukin Tamau are i karawa. Ma n tabetai, I a namakinna bwa I a manga un irouna. I tataro ni kangai: “Bukin tera bwa e riki aei nakoiu? Taiaoka ma katoka aorakiu. Ko aki nora korakorani kainnanou?”

Bon au tai n roro n rikirake ae I aitara iai ma korakoran aorakiu. I riai ni butimwaea ae I a aki kona ni marurung man aorakiu. I aki toki ni kabotaua maiu ma raoraou ake a marurung ao n rangi ni kukukurei. I namakinna bwa I mangori ao I maamaa. E ngae n anne, a boni boutokaai au utu ao raoraou. I ururinga Alicia ae 20 te ririki rakana i aou ae I tatangiria are e a riki bwa raoraou ni koaua. E buokai bwa N na iaiangoi kakabwaia ake imwaiu n aki iangoa aorakiu ao ni buokiia aomata n oneani mwin are N na kaatuua iangoan au kangaanga.

UKERAN AANGA AKE E NA UAANA IAI MAIU

Ngke ai 18 au ririki, I a rotakibuaka n okiokin aorakiu are e a kakaiaki riki ao I boni kua naba imwini kakaaean bobotaki ni Kristian. E ngae n anne, I kamanena raoi au “tai aika mwaawa” ni kabane n te auti n ukeuke n reirei man te Baibara. I buokaki ni booki aika Iobi ao Taian Areru bwa N na ota n te tai aei bwa e aki kona Iehova ni kamanoira man taian aoraki n taai nako, ma e anganira taeka ni kaungaunga ake ti kainnanoi ibukin te onimaki. Ibukini batin au tataro, e a anganai “te korakora ae riaoni korakoraia aomata” ao “te rau are mairoun te Atua ae riaon aia iango aomata.”—2 I-Korinto 4:7; I-Biribi 4:6, 7.

Ngkai ai 22 au ririki, I a riai ni butimwaea maiu ae I a bon titiku naba n aia kaa mwauku ae kokokaki. I tabeaianga irouia aomata bwa a nang aki kona n tabeakinai ma a na tii nora te aine ae rangi n aoraki n aia kaa mwauku ae kokokaki. E ngae n anne, I a inaomata ni karaoi bwaai tabeua mani kabonganaan aia kaa mwauku aei ao e a riki te baere I iangoia bwa “te tekebuaka” bwa te kakabwaia. E kaungaai raoraou temanna ae Isabel bwa N na katea tiau ibukini kabanean 60 te aoa n uarongorongo ma ngaia i nanon teuana te namwakaina.

I taku ngai bwa bon te iango ae akea uaana n te moan tai. Ma I butiia Iehova buokau ao man aia boutoka au utu ao raoraou I a boni karaoia. Ti aki namakina banen te namwakaina ae ti rangi n tabetabe iai ao I a kunea bwa I a tia n tokanikai i aon tabeaiangau ao maamaau. I rangi ni kukurei ni karaoa anne ao I a motinnanoia n 1996 bwa N na regular bwaiania are e baireaki iai mwaitin te aoa ni katoa namwakaina n te mwakuri ni minita. Bon teuana mai buakon au motinnano aika raraoi are I a kaaniaki riki iai nakon te Atua ao e kakorakoraaki naba rabwatau. E reke au tai n tibwaa au onimaki nakoia aomata aika bati mani uataboan te mwakuri ni minita ao ni buokiia naba tabeman bwa a na riki bwa raoraon te Atua.

E TEIMATOA IEHOVA NI KAWAKINAI

N tain te kabuebue n 2001, I a kurati n te kaa ao a mwaoto rangau ni kauaai. Ngke I wene n te onnaoraki ma te maraki ae rangi ni korakora, I korakai n tataro i nanou ni kangai: “Taiaoka Iehova, tai kitanai!” Imwin anne, e a titirakinai te aine ae I uakaan ma ana kainiwene ni kangai: “Ngkoe naba temanna Ana Tia Kakoaua Iehova?” Bon akea korakorau ni kaekaa ngaia are I a tii katoua naba atu. E taku: “I boni kinaingkami! I aki toki ni wawareki ami maekatin.” E korakora kabebetean nanou n ana taeka akanne. E ngae ngkai I rinanon te maraki ma I boni kona naba n uarongorongo ibukin Iehova. Ai boni kakawakira aei!

Ngke e a reke marurungiu teutana, I iangoia bwa N na uarongorongo nakoia tabeman riki. E kokokai tinau i nanon autin te onnaoraki are I mena iai ma rangau ni kauaai ake a timantiaki. Ti katoabong ni kawariia aoraki tabeman ao n titirakinia bwa a uara ao ti katikui tabeua booki ake aanaki man te Baibara irouia. I kua imwini kawaraia aoraki ma e a tia Iehova n anganai te korakora ae I kainnanoia.

N ririki tabeua ake a a tia n nako ao e rikirake ni korakora marakiu, ao e a kauaataoaki riki rawawatau ni maten tamau. Ma I kataia ni kateimatoa au iango ae raoiroi. N te aro raa? Ngkana e angaraoi irou, I kataia ni mena i rarikia raoraou ao au koraki ao anne are e a buokai bwa N na aki kaatuua iangoan au kangaanga. Ao ngkana I tiku n tii ngai, I wareware, I reiakina te Baibara ke n uarongorongo nakoia tabemwaang n te tareboon.

I kataia naba ni kakukureiai ni baika uarereke n aron namakinan te ang ae aamwaitoro i aon ubu ke arokan uee aika boiarara. I anganaki te iango mani baikai bwa I riai ni kakaitau. E mwakuri naba n te aro ae kamimi bwainan te moangare. N te tai teuana ngke I nako n uarongorongo ao e a kokokai raoraou n au kaa ni mwauku ao e motirawa teutana bwa e na koroboki. E a tii karina naba n buti rikaaki au kaa ao I a okinakoa te kaa ae tei. Ti kaai ni kubanako ma ngke ti noria bwa akea te kangaanga ae kakaiaki, ti a boni kaai ni ngare.

A bati bwaai aika I aki kona ni karaoi ni maiu ma I arani bwa bwaai aika I rangi n tangiri aika i aoni kawaia ni kakoroaki nanoia. I aki toki ni kamaki matau ao ni kauka au “winto” are titeboo iai ma I a nora te aonnaba ae boou are e beritanna te Atua. (2 Betero 3:13) I iangoia bwa aongkoa I rangi ni marurung, I ririaki n aki akaka ao ni karekea te maiu ae rangi ni kakukurei. I ururingi ana taeka te Uea are Tawita aikai: “Kaantaninga Iehova: Ko na korakora, ao kabebetea nanom.” (Taian Areru 27:14, BG) E ngae ngke e ririkirake mamaaran rabwatau ma e a tia Iehova ni kakorakoraai. I teimatoa ni karekea korakorau n au tai n aoraki.