Baika Bubuaka Aika Rangi ni Bati!

E rangi ni kinaaki Nei Smitaa ae 35 ana ririki i Dhaka, i Bangladesh bwa e tatangira man tabeakinia aomata. A rangi ni kinaa neiei aomata bwa te buu te aine ae mwakuri korakora ma ni kukurei, are e kani buokiia tabemwaang bwa a na atai baike e reiakin ibukin te Atua. Ai korakorara nanokawakia ana utu ao raoraon Smita, ngke e a karina naba n ituaki n te aoraki are e a mate iai tii i nanon teuana te wiki!

A rangi ni kinaaki naba te taanga n ataei ae James ma buuna, aika 30 tabun aia ririki bwa titeboo aroaroia ma Smita. Ni moan iteran te ririki ao a nako ni kawariia raoraoia i Maeaon te United States. A bon aki manga okira mwengaia i New York. N tikuia ikanne, e a reke te kabuanibwai nakoia bwa a kurati n te kaa ao ni mate, ike a a tiku imwia naake a tangiraki irouia ao raoia ni mwakuri ma te rawawatannano ae korakora ao ururingaia.

A rangi ni bati baika buakaka ao karawawata aika a kai noraki ni boong aikai. A boni mate kaain te aba ao tautia naba n taiani buaka. A karawawataaki aomata aika raoiroi n te iowawa ao te tiritiri. A riki kabuanibwai aika kamamate ao aoraki aika kakaiaki n aki ongea ana ririki te aomata ke nakoana. A kamaunaaki n aki akaka aomata nako ni kabuanibwai aika karina. E taabangaki te inanonano ao te ribuaka. Ko bae n tia ni karawawataaki naba iai.

A kai tabekaki titiraki aika aron aikai:

• E aera ngkai a riiriki baika bubuaka nakoia aomata aika raoiroi?

• E na bukinaki te Atua ni baika bubuaka akanne?

• A burenibwai rikini kabuanibwai ke a riiriki mairouia aomata?

• E na bukinaki iai te Karma ae nanonaki iai norani mwin ana mwakuri rimoa temanna are e karekea rawawatana iai ngkai?

• Ngkana iai te Atua ae moan te mwaaka, e aera e aki kamanoia aomata aika raoiroi mani kangaanga?

• A kona ni kainaomataaki aomata man te buakaka ao te rawawata?

Ibukini kaekaan titiraki akanne, ti riai ni mataata ni kaekaan titiraki aika kakawaki aika uoua aikai: E aera ngkai a riiriki baika bubuaka nakoia aomata nako, ao tera ae na karaoia te Atua?