A Kukurei N Anga Ngaiia​—N Aononi Micronesia

E KAIKAWAAKI Katherine n te United States ao e bwabetitoaki ngke 16 ana ririki ike e a riki iai bwa temanna Ana Tia Kakoaua Iehova. E mwakuri korakora neiei n ana mwakuri ni minita ma a karako ake a kan ongora taekan te Tautaeka n Uea n te tabo are e uarongorongo iai. E taku neiei: “I wareki rongorongoia aomata ake a tataro nakon te Atua bwa e na kanakoa temanna ae e na buokiia bwa a na kinaa. I aki toki n iangoia bwa e bia reke irou te aeka n aomata anne ma e tuai n reke.”

Imwin tataekinan te rongorongo irouni Katherine i nanon ririki aika bati n te aono anne, e a iangoia bwa e nangi mwaing nakon te tabo ae a kan ongora riki kaaina n rongorongon te Tautaeka n Uea. Ma e a manga iangoia bwa e kona ni karaoia ke e aki. Ai bon tibwa teuana ana tai ni kitania ana utu tii i nanon uoua te wiki ao e bon ururingia ni katoa bong. Ma e ngae n anne, e tokanikai riki nanona ae korakora ni kan nora aroni kimwareireina imwini buokaia aomata aika ukoukora Iehova. Imwin iaiangoan taabo tabeua are e kona ni mwaing nako iai, e a kororeta nakon te aobiti n tararua i Guam ao e a karekei rongorongo ake e kainnanoi. N Turai 2007, e a mwaing Katherine ngke ai 26 ana ririki n nako Saipan, ae te aba ae mena ni Marawan te Betebeke ae tao 10,000 te kiromita raroana mai abana. Baikara baike a riki nakoina?

TE KAEKA NAKON TATARO AIKA UOUA

Teutana te tai imwin rokon Katherine n te ekaretia ae boou ao e a kaitiboo ma Doris ae te aine ae 40 tabun ana ririki are e butimwaea te reirei n te Baibara. Imwin reiakinani moani mwakoro aika tenua n te boki ae Tera Ana Reirei ni Koaua te Baibara?, e a moanna n tabeaianga Katherine. E taku: “Bon te aomata ae rangi n nanona ana reirei Doris ao I aki kani kamangaoa ana iango. I tuai ni kaira te reirei n te Baibara mai mwaina ae katoatai ao I namakinna bwa e riai n reirei neiei ma te tari te aine ae mwaatai riki, ae tao bon ana roro.” E butiia Iehova Katherine n ana tataro bwa e na buokia ni kakaaea te tari te aine ae tau bwa e aonga n reirei n te Baibara ma neiei. Imwina, e a iangoia bwa e na kaongoa Doris bitakin ana tia reirei.

E taku Katherine: “Imwain are N na maroroakina aei, e a tuangai Doris bwa e kani maroroakina ana kangaanga teuana. Ngke I a tia n ongora, I a tuangnga aroni buokau iroun Iehova ngke I rinanon naba te aeka ni kangaanga anne ni maiu. Ao e boni karabwaai.” Imwina, e taku Doris nakon Katherine: “E kabonganako Iehova bwa ko na buokai. I a tia ni wawareka au Baibara i nanon te tai ae abwabwaki mani moan rokom n au auti. I bon tang ao I butiia te Atua bwa e na kanakoa temanna nakoiu ae e na buokai bwa N na ota raoi n te Baibara. Imwin anne, ko a karebwerebwe naba n te mataroa. E a bon tia ni kaekaa au tataro Iehova!” A tiinako rannimatan Katherine ngke e ongora te karaki ae ringa nanona aei ao e taku: “Boni kaekaan au tataro ana taeka Doris aikai. E a tia Iehova ni kaotia nakoiu bwa I boni kona ni waakinaanako te reirei ma neiei.”

E bwabetitoaki Doris n 2010 ao ni boong aikai e a kairi reirei man te Baibara ma tabeman aomata n tii ngaia. E taku Katherine: “Ai kakaitaura ngai bwa e a koro bukin te bwai are I rangi ni kariariaa rekena i nanon te tai ae maan, ae buokan te aomata ae raoiroi nanona ae e na riki bwa ana toro Iehova!” E rangi ni kukurei ni beku bwa te special bwaiania ni boong aikai Katherine n aban te Betebeke ae Kosrae.

ARONI KAITARAANI KANGAANGA AIKA TENUA

E raka i aon tebubua mwaitiia taari mwaane ao aine aika roko mai abatera (aika mena aia ririki i marenan 19 ma 79) aika a a tia ni beku n taabo ake e korakora riki iai kainnanoan te ibuobuoki n aononi Micronesia. E kaotaki raoi aia namakin taani mwakuri aika ingainga nanoia aikai iroun Erica are e mwaing nako Guam n 2006 ngke 19 ana ririki. E taku neiei: “E rangi ni kaunga te bwaiania n te aono ae a bwatakataka iai aomata n tangira te koaua. I rangi ni kakaitau bwa e a tia ni buokai Iehova bwa N na karaoa te aeka ni mwakuri aei. Bon aei te maiu ae te kabanea n tamaroa!” Ni boong aikai, ao e kukurei Erica ni beku bwa te special bwaiania i aon Ebeye n Aononi Mwatiare. Ni koauana, iai kangaanga aika ti na aitara ma ngaai n te beku n aaba aika ti ianena iai. Ti na rinanoi tenua mai buakon akanne ao n nora aroia naake a a tia ni mwaing nakon aononi Micronesia ni kaaitarai.

Te Aroaro ni Maiu. Imwin rokon Simon ae 22 ana ririki ni maiu n te aba ae Palau n 2007 e a waekoa n ataia bwa ngkana e mwakuri, e tii kona n reke kaamwakoron are e taneiai ni karekea n ana mwakuri ni kareketianti i abana ae Engiran. E taku: “I riai n reireinai te aki kabooi bwaai nako aika I tangiri. I karau n rinei amwarake aika I riai ni kabooi ngkai ao ni mamataku n titooa bwa I aonga ni kabooi bwaai aika moan te bebete booia. Ngkana iai te bwai ae uruaki, I kakaaea oneani mwina n te tuutaraa ao ni kataia ni kakaaea temanna ae kona ni buokai ni karaoia.” Tera aron rotakina n noran riaina ni kabebetea maiuna? E taku Simon: “I buokaki iai bwa N na atai baika a boni kainnanoaki ibukin te maiu ao arou ni kona ni karekei bwaai n te boo ae bebete. N taai tabetai, I a bon tia n namakina raoi bain Iehova ae mwamwannano. Inanon ririki aika itiua ake I beku iai ikai, e bon rereke kanau ao au tabo ae N na matu iai.” Ni koauana, e boni boutokaia Iehova naake a kabebetei maiuia ibukina bwa a kan ukera moa te Tautaeka n Uea.—Mataio 6:32, 33.

Te Uringaaba. E taku Erica: “E rangi ni kaan au iraorao ma au utu, ao I tabeaianga bwa rimwi ao e na rotakibuaka au mwakuri ni minita n uringaabau.” Tera are e karaoia neiei ibukini katauraoana? E taku: “Imwaini mwaingiu, I boni wareki kaongora man te Taua-n-Tantani ibukin te uringaaba. E bon tauraoi nanou ni kaitaraa te kangaanga anne man aei. N te kaongora teuana ao e karaua nanon natina temanna te tina bwa e tabeakinna Iehova ngke e kangai, ‘E kona Iehova n tararuaiko n te aro ae raoiroi riki nakoiu.’ I boni kakorakoraaki man te taeka ni karaunano anne.” A beku naba Hannah ma buuna ae Patrick i Majuro n Aononi Mwatiare. E tokanikai Hannah i aon te uringaaba bwa e kaatuua iaiangoaia taari mwaane ma aine n aia ekaretia. E taku neiei: “I kaitaua Iehova n taai nako ngkai a a riki naba kaain ara botaki n itaritari ni katobibia te aonnaba bwa au utu. N na boni aki kona ni beku n taabo ake e korakora riki iai kainnanoan te ibuobuoki ngke arona bwa a aki boutokaai ma te tangira.”

Rekeia Raoraou. E taku Simon: “Ngkana ko roko n te aba ae tiaki abam, a boni kaokoro bwaai ni kabane iai. N tabetai, I nanokawaki bwa I aki kona ni maroro ni kangare ao a na ota raoi iai.” E taku Erica: “N te moantai, I namakina te maroaa ma e reke buokau iai bwa N na iaiangoia bwa tera raoi bukini mwaingiu. I aki mwaing ibukini kakabwaiaau ma bon ibukini karaoan nanon Iehova.” E reitia ni kangai: “Inanon te tai ae kimototo, e a moanna n reke au iraorao ae rangi n raoiroi ae te bwai ae rangi ni kakawaki irou.” E mwakuri korakora Simon n reiakina te taetae ni Palau ike e a kona iai ni ‘kamwawaa nanona’ nakoia taari n te tabo anne. (2 I-Korinto 6:13) E a rangi n tatangiraki irouia taari ibukin ana kakorakora n reiakina aia taetae. Eng, ngkana a kaai ni mwakuri taari aika tibwa roko ma taari n te tabo anne, a na kaai kurubu akanne n taia te kaniwanga ae te iraorao ae kaan n te ekaretia. Baikara kaniwanga riki tabeua aika reke nakoia naake a kukurei n anga ngaiia bwa a na beku n taabo ake e kainnanoaki riki iai te ibuobuoki?

‘TAIA AE BATI’

E taku te abotoro Bauro: “Ane unika ae karako, e na taia ae karako, ao ane unika ae bati, e na taia naba ae bati.” (2 I-Korinto 9:6) E boni kaineti te boto n reirei ae taekinaki aei nakoia naake a karaababai nako aia mwakuri ni minita. Baikara uaa ake a a tia n ‘taia iai ae bati’ n aononi Micronesia?

A bon teimatoa naba ni bati taai ibukini moanakin te reirei n te Baibara n aononi Micronesia ao noran aron rikiraken aia onimaki aomata nako ake a reiakina te koaua man Ana Taeka te Atua. A uarongorongo naba Patrick ma Hannah i Angaur ae te aba ae uarereke ma kaaina ae 320 mwaitiia. Imwin aia uarongorongo ikanne i nanon uoua te namwakaina, a a kaitiboo ma te tina ae akea buuna. E waekoa naba neiei ni butimwaea te reirei n te Baibara, e ingainga ni karekea te koaua ao e karaoi bitaki aika korakora ni maiuna. E taku Hannah: “Ni katoaa banen te reirei, ti okiri mwengara n ara bwatika ao ti itaramata ao ni kangai: ‘E rabwa Iehova!’” E reitia riki ni kangai Hannah: “I ataia bwa e a tia Iehova ni katika te aine aei ni bon nakoina n te aro teuana ma teuana, ao ibukina bwa ti beku n te tabo ae korakora riki iai kainnanoan te ibuobuoki, ti a kona ni kuneia ao ni buokiia aomata aika ai aroia tiibu bwa a na ataa Iehova. Aio kakabwaiaara ae moan te kakukurei ae ti namakinna i nanoni maiura ni kabane!” E taekinna Erica bwa “ngkana ko buoka temanna bwa e na ataa Iehova, ko na bon taia te kimwareirei ae rangi ni bati!”

KO KONA N IBUOBUOKI?

A kainnanoaki riki taan uarongorongoa te Tautaeka n Uea n aaba aika bati. Ko kona naba ni mwaing nakon taabo ake e kainnanoaki riki iai te ibuobuoki? Butiia Iehova n am tataro bwa e na kakorakoraa nanom ni kani karababaa am mwakuri ni minita. Maroroakina am iango anne ma unimwaane n te ekaretia, te mataniwi n te aono ae uarereke ke naake a a tia ni mwiokoaki ni beku n te aba ae kainnanoaki iai te ibuobuoki. Ngkana ko a moanna ni karaoi am babaire, korea am reta nakon te aobiti n tararua ae mena i aana te aono are ko kani beku iai ao titiraki ibukin rongorongona riki.a Ko bae ni kona naba n raonia taari mwaane ao aine aika nga ma nga aika rooro n rikirake, kaara, taanga ke aika akea buuia ake a kukurei n anga ngaiia ao n nora te kimwareirei ae reke man ‘taiakin te uaa ae bati.’