Bukin Tera Bwa Ti Riai ni Mutiakina Ana Tautaeka n Uea te Atua?

A kabotoi aia kantaninga aomata aika mirion ma mirion mwaitiia ni katobibia te aonnaba i aon Ana Tautaeka n Uea te Atua. A kakairi n ana banna ni katoto Iesu are e reireinia taan rimwina bwa a na tataro ni kangai: “Ke e roko Ueam, ke e iraki nanom i aon te aba.”​—Mataio 6:10, Te Baibara ni Katorika.

Ma e kananokawaki bwa e ngae ngke a bati aomata aika rangi ni mutiakina Ana Tautaeka n Uea te Atua, ma angiia Aaro a aki kan tabe iai. Ni kaineti ma aio, e taekinaki iroun te tia korea rongorongon rimoa ae H. G. Wells bwa e kamimi aron Iesu ngke e anga “n te aro ae rangi n rianako . . . te reirei n te baere e atoatongnga bwa te Tautaeka n Uea i Karawa” ma e ngae n anne, e taekinna teuanne bwa e “kauarerekeaki manenan . . . aia reirei angiia Aaro ni Kristian” n te angareirei aei.

A kaokoro aroia Aaro akanne ma Ana Tia Kakoaua Iehova bwa a rangi ni kaatuua iaiangoan Ana Tautaeka n Uea te Atua. Iangoa aei: E boreetiaki ara maekatin ae kakawaki ae ko tabe ni warekia n taetae aika 220 mwaitiia. E kaania 46 te mirion katotoni kaongora ni kabane aika boreetiaki, n te aro are e a rangi ni butanako n te aonnaba. Ao tera te boto n iango n te maekatin aei? Nora atuna ae kangai: Te Taua-n-Tantani Ae Tataekina Ana Tautaeka n Uea Iehova.a

Bukin tera bwa a rangi ni kakorakoraia Ana Tia Kakoaua Iehova ni katanoataa ke ni kaotiota taekan Ana Tautaeka n Uea te Atua? Bukina teuana, ti kakoauaa bwa Ana Tautaeka n Uea te Atua bon te boto n iango n te boki ae moan te kakawaki n te aonnaba ae te Baibara. Irarikin anne, ti kakoauaa raoi bwa tii Ana Tautaeka n Uea te Atua ae kona ni katoki kangaanga ake a aitara ma ngaai aomata ni boong aikai.

A kakorakoraia Ana Tia Kakoaua Iehova ni kakairi n ana katoto Iesu n aroia ni kairiia aomata bwa a na mutiakina Ana Tautaeka n Uea te Atua. Ni menana i aon te aba, te bwai ae rangi ni kakawaki ni maiuna ao n ana mwakuri ni minita bon Ana Tautaeka n Uea te Atua. (Ruka 4:43) Bukin tera bwa e rangi ni kakawaki iroun Iesu te Tautaeka n Uea? E kakawaki naba iroum? Ti kaungako bwa ko na rinanoi kaekaaia man te Baibara ni kabwarabwaraaia ni kaongora aika imwina.