Titiraki Mairouia Taani Wareware

Tera ae nanonna Ieremia ngke e taekina tanginiwenein Rakera ibukia natina mwaane?

N Ieremia 31:15, (BG) ao ti wareka iai ae kangai: “E kangai ana Taeka Iehova, E ongo te aba te bwana i Rama, are te tang, ma te tanginiwenei ae bati, ba Nei Rakera ngke e kume n tangiriia natina; e rawa ni katokaki tangina i bukiia natina, ngkai [a] akea.”

A bon aki mate natin Rakera aika uoman imwaini matena. Mangaia are e taraa n aki eti te bwai are e koreia Ieremia 1,000 te ririki n nako imwini maten Rakera.

Ana moan nati te mwaane Rakera bon Ioteba. (Karikani Bwaai 30:22-24) Imwin anne, e a manga bungia natina riki temanna ae arana Beniamin. Ma e mate Rakera imwini bungian natina ane te kauoman anne. Mangaia are e a rio te titiraki aei: Bukin tera bwa e taekinaki n Ieremia 31:15 bwa e tanginiwenei neiei ibukia natina “ngkai [a] akea?”

E kakawaki ataakin ae imwin tabeua te tai, e a manga riki Ioteba bwa tamaia Manate ao Eberaim. (Karikani Bwaai 41:50-52; 48:13-20) Imwina riki, e a rangi n tanoata taekan te baronga ae Eberaim ao e taui taekan tautaeka n uea mai meang ni kabane i aon Iteraera, ao e tei ibukia ni kabane baronga aika tebwina akanne. N te itera are teuana, e riki te baronga ae kanoani Beniamin are natin Rakera bwa kaain te tautaeka n uea mai maiaki, n ikotaki naba ma te baronga ae Iuta. E teretere ngkanne bwa e kona n taekinaki Rakera n te aro ni kaikonaki bwa tinaia tibun Iteraera ni kabane, ake kaain te tautaeka n uea mai meang ao maiaki.

N taini korean te boki ae Ieremia, a a bon tia ni bwaka tautaeka n uea ni baronga aika tebwina mai meang irouia I-Aturia ao a bati kaaina ake a kairakinako bwa taenikai. Ma e ngae n anne, iai naba kanoan Eberaim ake a birinako nakon aonon I-Iutaia. N 607 B.C.E., e buakanaki irouia kaaini Baburon te tautaeka n uea ni baronga aika uoua mai maiaki i aon Iuta. E taraa n ae kanoan naba te buaka anne, a boni bati taan taenikai ake a ikoikotaki i Rama, tao 8 te kiromita i meangin Ierutarem. (Ieremia 40:1) Tao iai tabeman ake a tiringaki n aia aono kaain te baronga ae Beniamin n te tabo are e taunaki iai Rakera. (1 Tamuera 10:2) Ngaia are e kona n nanonaki tanginiwenein Rakera ibukia natina, bwa tanginiweneina n te aro ni kaikonakaki ibukin te baronga ae Beniamin ni kabane ke tii nakoia naake i Rama. Tao e kona n iangoaki te koaua teuana iai bwa a bane tiina aika ana aomata te Atua n tanginiweneia maate ke taenikaiakia tibun Iteraera.

Ma e ngae n anne, ana taeka Ieremia ibukin tanginiwenein Rakera ibukia natina bon te taetae ni burabeti ni kaineti ma te bwai are riki n tienture ake imwina, ibukin ruanikaini maiun Iesu ngke e uarereke. E tua te Uea are Erote bwa a na bane n tiringaki naati mwaane aika uoua aia ririki rikaaki i Betereem i maiakin Ierutarem. Mangaia are, ai akea naati mwaane akanne bwa a a boni mate. Ai boni kananokawakira iangoan tanginiweneia tiina ni mateia natiia mwaane! Kaanga ai aron ae e kona n ongoraeaki tangia anne ni kabutaa aon Rama, ae mena i meangin Ierutarem.—Mataio 2:16-18.

Mangaia are, e bon tonuraoi n ana tai Ieremia ao n ana tai Iesu tanginiwenein Rakera ibukia natina, are e kaotaki iai nanokawakia tiina aika I-Iutaia ni kamateaia natiia. Ni koauana, a kona te koraki ake a mate ao n nako “abaia aiaia” ni kainaomataaki mairoun te kairiribai anne ngkana a a kautaki maate.—Ieremia 31:16, BG; 1 I-Korinto 15:26.