Titiraki Mairouia Taani Wareware

Tera “ana taeka te Atua” ae taekinaki n Ebera 4:12 bwa “e maiu . . . ao e mwaaka”?

E kaotaki ni bwaninin te rongorongo te bae e nanonna te abotoro Bauro bwa bon rongorongon ke taekan ana kantaninga te Atua, ae ti warekia n te Baibara.

E aki toki ni kabonganaaki Ebera 4:12 n ara boki ni kaotaki iai mwaakan te Baibara ni bitii maiuia aomata, ao e bon eti anne. Ma e ibuobuoki iangoan Ebera 4:12 ngkana e kabwaninaki ni warekaki. E kaumakiia Kristian ake taian Ebera Bauro bwa a na boutokai ana kantaninga te Atua. A bati mai buakoni baikanne aika koreaki taekaia n te koroboki ae tabu. E katea ana katoto Bauro ibukia tibun Iteraera ake a kamaiuaki mai Aikubita. A kantaningaia naakai bwa a na rin n te aba ni berita “ae raanga iai rannimamman te man ma aia karewe manibeeru,” ike a na karekea iai te motirawa ni koaua.​—TeOti. 3:8; TuaKau. 12:9, 10.

Bon anne ana kantaninga te Atua ae kaotaki. Ma rimwi riki, a kamatoai nanoia tibun Iteraera ao a aki kaotiota aia onimaki, ngaia are angia i buakoia a aikoa ibuokanibwai n te motirawa anne. (WarIte. 14:30; Iot. 14:6-10) Ma e reitia Bauro bwa e teimatoa “te berita ibukia ana aomata te Atua bwa a na ibuokanibwai n ana motirawa.” (Ebera 3:16-19; 4:1) E teretere bwa te “berita” anne boni kanoan naba ana kantaninga te Atua ae kaotaki. N aroia Kristian aika taian Ebera, ti kona naba ni wareka te kantaninga anne ao ni boutokaia. Ni kamatataan ae e boto te berita anne man te Baibara, e mwanewea Bauro kanoani Karikani Bwaai 2:2 ao Taian Areru 95:11.

Ni koauana, a riai n ringaki nanora ngkai e teimatoa n “iai te berita ibukia ana aomata te Atua bwa a na ibuokanibwai n ana motirawa.” Ti kakoauaa ae e na reke te kantaninga ae boto man te Baibara ibukin te ibuokanibwai n ana motirawa te Atua, ao ti a tia ni karaoi mwaneka ibukin anne. Ti aki karaoa anne rinanon te kakorakora ni kawakina te Tua Rinanoni Mote ke ni karekea akoara iroun Iehova rinanoni mwakuri riki tabeua. Ma ibukin ara onimaki, ti kukurei ni boutokaa ana kantaninga te Atua ae kaotaki ao n teimatoa iai. Irarikina, n aron ae taekinaki ni moan te kaongora aei, a a tia nga ma nga aomata ni katobibia te aonnaba ni moana reiakinan te Baibara ao n ataa ana kantaninga te Atua ae kaotaki. A bati mai buakoia ake a kaungaaki bwa a na bitii maiuia, a na kaotiota aia onimaki, ao n riki bwa Kristian. Aron rotakia anne, e a kakoauaaki raoi iai ae “e maiu ana taeka te Atua ao e mwaaka.” A a kaman rotaki maiura n ana kantaninga te Atua ae kaotaki n aron ae kabwarabwaraaki n te Baibara, ao e na teimatoa ni mwaaka ni maiura.