Ko A Tia N Ibuokan Ibwai N Ana Motirawa Te Atua?

“E maiu ana taeka te Atua ao e mwaaka.”​—I-EBERA 4:12.

1. Ti na kanga n ibuokanibwai n ana motirawa te Atua ni boong aikai? E aera ngkai e kona ni kangaanga te ongeaba?

TI A tia n ataia bwa ti na ibuokanibwai n ana motirawa te Atua ngkana ti ongeaba iroun Iehova ao ni kaai ni mwakuri ma ana botaki. Ti kaotia n ongeabara bwa ti tangira kakoroani bukin ana kantaninga. Ma n tabetai, e kona ni kangaanga te ongeaba. N te katoto, e kona ni kangaanga te ongeaba ngkana ti ataia bwa e tangiria Iehova bwa ti na katoka karaoan te bwai ae ti kani kakaraoia n te tai naba anne. Ngkana e riki aei nakoira, ti riai n reireinira te “tauraoi n ongeaba.” (Iakobo 3:17) N te kaongora aei, ti na maroroakini aaro tabeua ake a na reke iai ara tai ni kaotia ae ti a tauraoi raoi n ongeaba n taai nako.

2, 3. Tera ae ti riai n teimatoa ni kakaraoia ibukini kakukureian Iehova?

² Ko tauraoi n ongeaba ngkana ko a reiakinna n te Baibara bwa ko riai ni bita maium? Iangoa aei: E taekinaki n te Baibara bwa e tangiria Iehova bwa e na karinia n ana botaki “bwaai aika tatangiraki aika aia bwai botannaomata ni kabaneia.” (Akai 2:7, BG) E nanonaki n aei bwa te Atua e rineia aomata aika kakawaki irouna ibukina bwa a tatangira karaoan ae eti. E boni koaua bwa ni moan reiakinan te Baibara iroura, ao ti aki toki ni kakaraoi mwakuri aika kairua. Ma ibukin tangiran te Atua ma Natina iroura ao kani kakukureian nanon te Atua, ti kukurei ni karaoi bitaki aika a kakawaki n arora n iango ao ni mwakuri. Ti tataro ao ni bubutii ana ibuobuoki Iehova ao ni kekeiaki ni karaoi bitaki nakoni maiura. N tokina, ti a kona ni bwabetitoaki ao ni karekea akoara iroun Iehova.​—Wareka I-Korote 1:9, 10.

³ Ti bon teimatoa n aki kororaoi. Ti riai n teimatoa ni karaoi bitaki i nanoni maiura ao ni kakorakoraira ni karaoa ae eti. Ma e berita Iehova bwa e na buokira ngkana ti teimatoa ni karaoa ara kabanea ni kona ni kakukureia.

Te Tai ae Kainnanoaki Iai te Reirei ni Kairiri

4. Baikara aanga aika tenua ake e kabonganai Iehova ni kaotia iai nakoira bwa ti riai ni karaoi bitaki?

⁴ Imwaini karaoani bitaki ni maiura, ti riai n atai aroarora aika ti riai ni bitii. E buokira Iehova ni karaoa aei n aanga aika kakaokoro. E kona n tuangira rinanoni kabwarabwara n te Tabo n Taromauri ke n te kaongora teuana n ara maekatin ike e kaotia iai bwa iai te bwai teuana ae kairua n ara iango ke n ara mwakuri. N tabetai ti aki ota raoi bwa ngaia ti riai ni karaoi bitaki tabeua imwin ongoraean te kabwarabwara teuana ke warekan te boki ae boto man te Baibara, ngaia are e kona Iehova ni kabongana te tari te mwaane ke te aine temanna n te ekaretia bwa e na kaetiira ma te akoi.​—Wareka I-Karatia 6:1.

5.Baikara arora aika ti kaotiotii n tabetai ngkana ti kaetaki iroun temanna? E aera ngkai a riai unimwaane aika Kristian n teimatoa ni kataia ni buokira?

⁵ E kona n rangi ni kangaanga iroura butimwaean ana taeka temanna ae aki kororaoi ngkana e kaetiira, e ngae naba ngkana e kataetaeira ma te bwanaa n akoi. Ma e anga ana kaetieti Iehova nakoia unimwaane n te ekaretia bwa a na ‘kataia ni kaetiira’ n ‘te nano ae nimamannei,’ ae nanonaki iai kaetakira ma te akoi. (I-Karatia 6:1) Ti na rikirake n “tatangiraki” riki ke ni kakawaki iroun Iehova, ngkana ti butimwaei aia ibuobuoki. Ni koauana, ti aki toki n taekinna n ara tataro nakon Iehova bwa ti aki kororaoi ao a bati ara kairua. Ma ngkana e tuangira te unimwaane bwa ti kairua, n tabetai e a manga kaokoro arora ni butimwaea kaetakira. Ti kataia ni kabwarabwaraa bukini karaoan anne, ke tao ti taekinna bwa e aki rangi ni buakaka ara bure. Tao ti kona naba n taekinna bwa e aki tangirira te aomata are e kaetiira, ke e aki kataetaeira raoi ma te akoi. (2 Uea 5:11) Ke tao ti kona n rangi n un ngkana ti tuangaki irouia unimwaane te bwai ae ti aki rangi ni kukurei iai. N te katoto, a kona n tuangira bwa iai kaain ara utu ae e karaoa te bwai ae bure ke e aki riai aroni kunnikaira. Tao a tuangira bwa ti riai ni kateimatoa itiakin riki rabwatara, ke e aki kukurei Iehova ma arora ni kaakibotu ae ti kakaraoia. Ngkana ti un, ti a kona n taekin taeka aika ti riai n aki atong. Ti kona n nanokawaki iai ao te tari naba are e kataia ni buokira e na bon nanokawaki naba. Ma imwina riki, ngkana e a toki unra, n angiin te tai ti kakoauaa bwa ti buokaki n ana taeka.

6. E na kanga ana taeka te Atua ni “kona n atai baike e iangoi te nano ma baike e kantaningai”?

⁶ Ti tuangaki n te boto n iango n te kaongora aei n I-Ebera 4:12 bwa e “mwaaka” ana taeka te Atua. Nanon aei bwa iai mwaakan ana taeka te Atua ni buokiia aomata ni bitii maiuia. E buokira te Baibara ni karaoi bitaki aika ti riai ni karaoi imwaini bwabetitoakira. Ao e kona naba ni buokira ni karaoi bitaki ni maiura imwini bwabetitoakira. E koreia naba Bauro n ana reta nakoia Kristian aika I-Ebera bwa ana taeka te Atua e “ewaewa ni kaota kaokoron taraan te aomata ma are i nanona” ao e “kona n atai baike e iangoi te nano ma baike e kantaningai.” (I-Ebera 4:12) Nanon te taeka ae “te aomata” ikai bon taraakira mai tinanikura are a kona n noria aomata ngkana a taraira. Nanon te taeka ae “are i nanona” bon anuara raoi ae raba i nanora ae a aki kona n noria aomata ngkana a taraira. Ngaia are e taekinna Bauro bwa ngkana ti mataata raoi man te Baibara n te bae e tangiria te Atua bwa ti na karaoia, e na kaotaraeaki ngkanne te bwai ae mena i nanora n ara mwakuri. Iai n tabetai te kaokoro i marenan te bwai ae a noria aomata iroura ma te bwai ae i nanora? (Wareka Mataio 23:27, 28.) Iangoa te bae ko na karaoia n aaro aika ti nangi maroroakini ngkai.

Teimatoa n Ririkirake ma Ana Botaki Iehova

7, 8. (a) E aera ngkai iai tabeman I-Ebera aika Kristian ake a kan teimatoa n ongeaba ni kanoan te Tua Rinanoni Mote ake tabeua? (b) E aera ngkai ti kona n taekinia aomata aikai bwa a kaitaraa ana kantaninga te Atua?

⁷ A bati i buakora aika a matenikuna raoi irouia taeka aika n Taeka N Rabakau 4:18 (BG): “Kawaiia akana raoiroi ai aron te oota ngkana e bo mainiku, Ae karaka ootana ni karokoa te tawanou.” Nanon anne bwa ni waakinakon te tai, ti a ota raoi riki n te bae e tangiria Iehova mairoura ao ti a mwaatai riki ni karaoa ae e kukurei iai.

⁸ Ti a kaman ataia bwa imwini maten Iesu, ao a bati I-Ebera aika Kristian ake a teimatoa ni kan ongeaba nakon te Tua Rinanoni Mote. (Mwakuri 21:20) E kabwarabwaraa n te aro ae mataata Bauro bwa a aikoa riai n ongeaba Kristian n te Tua Rinanoni Mote, ma a bon teimatoa naba tabeman n aki kan karaoa ae e tangiria Iehova mairouia. (I-Korote 2:13-​15) Tao a iangoia bwa ngkana a teimatoa n ongeaba ni kanoan te Tua Rinanoni Mote tabeua, a a kona iai n totokoa bwainikirinaia irouia te koraki ake a tou mwin tuua n te Aro n Iutaia. Ma e mataata raoi ana taeka Bauro ngke e tuangia Kristian ake I-Ebera bwa ngkana a teimatoa ni kaitaraa ana kantaninga te Atua, ao ana bon aki kona n ibuokanibwai iai n ana motirawa te Atua.a (I-Ebera 4:1, 2, 6; wareka I-Ebera 4:11.) Ngkana a na akoaki iroun Iehova, a riai ni butimwaea te koaua ae e bon tangiriia ngkai ana aomata Iehova bwa a na taromauria n te aro ae kaokoro.

9. Tera arora ae riai ngkana e karaoi bitaki te toro ae kakaonimaki ma ni wanawana nakon ootara n te bwai teuana man te Baibara?

⁹ Ni boong aikai, e buokira te toro ae kakaonimaki ma ni wanawana ni kaotaira n te reirei man te Baibara n te aro ae kaokoro ma otara are mai mwaina. Ti bon riai ni kukurei ni bitaki aikai. E kaotaki nakoira bwa e kamanena te toro ae kakaonimaki ma ni wanawana Iehova bwa e na reireinira te koaua. N tabetai, e kauring i aon otara ni kaineti ma koaua tabeua te Rabwata n Tautaeka are e tei ibukin te toro ae kakaonimaki ma ni wanawana. Ngkana a baireia taari aikai bwa iai bitaki aika riai ni karaoaki, a aki maaku ni kaetii reirei tabeua rimoa ke ni karaoi kabwarabwaraaia aika mataata riki. A ataia bwa iai tabeman ake a na taekini baika bubuaka ibukin te toro ae kakaonimaki ma ni wanawana ni kaineti ma bitaki aikai, ma e aki rangi ni kakawaki anne irouia. Te bwai ae rangi ni kakawaki irouia, bon aroia n aantaeka nakon ana kantaninga te Atua. Tera ae ko iangoia ngkana iai te bitaki ae e karaoia te toro ae kakaonimaki ma ni wanawana nakon ootara n te bwai teuana man te Baibara?​—Wareka Ruka 5:39.

10, 11. Tera are a karaoia Taan Reirei n te Baibara tabeman ngke a ataia are a riai ni karaoi aanga n uarongorongo aika boou? Tera reireiara man te katoto aei?

¹⁰ Ti na maroroakina te katoto teuana. Tao tebubua te ririki n nako, ao a iangoia tabeman Taan Reirei n te Baibara ake a anganga aia kabwarabwara aika rangi n ringa te nano, bwa bon anne te aro ae moan te tamaroa ibukin te uarongorongo. A kan tataetae i mataia aomata ao iai aika a kukurei ngkana a kamoamoaaki ibukin aia kabwarabwara. Ma imwina riki, a a ota raoi bwa e tangiriia ana aomata Iehova bwa a na karaoa ae bati riki nakon are a na tii anganga aia kabwarabwara nakoia aomata. E tangiriia bwa a na uarongorongo man te auti teuana ma teuana ao n aaro riki tabeua. A rawa ni karaoa anne tabeman mai buakoia ake a rangi ni mwaatai ni kabwarabwara. A kairaki aomata n aia kabwarabwara bwa a na iangoia ae a bon tangira Iehova ao n ongeaba irouna, ma e kaotaki n aia mwakuri bwa a bon aki. Ti ataia bwa e aki kukurei Iehova n aia mwakuri, bwa a kitana ana botaki.​—Mataio 10:1-6; Mwakuri 5:42; 20:20.

¹¹ A bati naba i buakoia Taan Reirei n te Baibara akana mwaatai akanne ake e kangaanga naba irouia te uarongorongo man te auti teuana ma teuana, ai moarara riki n aia moantai n auti. Ma a ongeaba ao a aantaeka nakon ana botaki Iehova. Imwin tabeua te tai, e a rikirake ni bebete riki irouia te uarongorongo man te auti teuana ma teuana. A rangi ni kakabwaiaaki iroun Iehova. Tera ae ko na karaoia ngkana e tuangko te toro ae kakaonimaki ma ni wanawana bwa ko na karaoa te anga n uarongorongo ae ko tuai ni kakaraoia mai mwaina? Ko na ongeaba e ngae ngkana e taraa n rangi ni kangaanga iroum?

Ngkana E Kitana Iehova te Aomata ae Ti Tangiria

12, 13. (a) E aera ngkai e tuangira Iehova bwa ti na “kanakoa te aomata ae buakaka” mai buakora? (b) Tera ae kona n riki bwa aia kangaanga kaaro aika Kristian?

¹² Ti boni kakoauaa bwa ngkana ti na kakukureia Iehova, ti bon riai n ongeaba n ana tua are ti na itiaki n aaro nako. (Wareka Tito 2:14.) Ma bon iai naba aanga tabeua ake e kona ni kangaanga iai iroura te ongeaba n ana tua. N te katoto, iangoa aei: Iai te taanga teuana ae tii temanna natiia te mwaane ao e a manga kitana te koaua. E tangira riki “te kimwareirei ae kai toki ae kakukurein te bure” nakon ana iraorao ma Iehova ao ana karo. Ibukin ana mwakuri aika aki raoiroi, e aikoa kona ni manga riki bwa kaain te ekaretia. Ngaia are e a kabaneaki man te ekaretia.​—I-Ebera 11:25.

¹³ A rangi n rawawata ana karo! A ataia bwa e taekinaki ae kangai n te Baibara: “Katoka te reitaki ma te aomata ae aranaki bwa te tari ma bon te tia wene ni bure ngaia, ke te aomata ae nanonrang, ke te tia taromaurii boua, ke te tia kabuakaka, ke te tia mamanging, ke te tia aonikai ni kuribwai, ao kam aki naba riai n amwarake ma te aeka n aomata anne.” E kangai naba: “Kanakoa te aomata ae buakaka mai buakomi.” (1 I-Korinto 5:11, 13) A ataia naba bwa te taeka ae “te aomata” e nanonaki naba iai kaain aia utu aika aki maeka ma ngaia n aia auti. Ma ibukina bwa a rangi n tangira natiia, a kona n iango ni kangai: Ti bon riai n teimatoa ni kataetaea natira. Ti aki kona ni buokia bwa e na okira Iehova ngkana ti aki kona n taetae ma ngaia.b

14, 15. Tera ae a riai n ururingnga kaaro ngkana a iangoia bwa a na kataetaea natiia ae kabaneaki?

¹⁴ Ti nanokawaki n noriia kaaro akanne ni karawawataaki. E kona natiia anne ni motinnanoia bwa e na bita arona, ma e bon tangira riki karaoan ae buakaka nakon are e na maeka ma ana karo ao te ekaretia. A kani buoka natiia kaaro aikai ma a aki kona ni kaeta ana baire n te bwai ae e bon kani karaoia. Ti ataa bukini karawawataaia ae korakora.

¹⁵ Tera ae a na karaoia tarira ao mwaanera aika ti rangi n tangiriia aikai? A riai n ongeaba nakon ana kaetieti aika mataata Iehova. Ni koauana, iai taai ake a kainnanoa iai kataetaean natiia anne ibukini baika irekereke ma te utu ma e riai ni burenibwai karaoana. Ma e koaua bwa a na iangoia bwa iai bukina aika bati ae a riai iai n taetae ma natiia anne? Ni karaoan aia babaire n aei, a riai n ururinga te bae e tangiriia Iehova bwa a na karaoia. A riai naba n uringnga ae e tangiriia ana aomata Iehova bwa a na teimatoa n itiaki. Anne bukina ngkai e anga ana tua ae mataata raoi are a na “kanakoa te aomata ae buakaka” man te ekaretia. E kani buoka naba te aomata ae karaoa ae bure bwa e na bitii arona ao n okira te ekaretia. A na kanga kaaro aika Kristian ni kaotiotia bwa titeboo aia iango ma Iehova?

16, 17. Tera reireiara ae ti karekea man ana katoto Aaron?

¹⁶ E kaaitara ma te kangaanga Aaron are tarin Mote n te baere a karaoia natina mwaane ake uoman. A angakarea natina aika Nataba ma Abiu n te aro ae e aki kukurei iai Iehova. E karuoa te ai mai karawa Iehova ao a a mate iai. Iangoa aroni korakoran rawawatan Aaron n aei. E a aki kona n taetae ma natina bwa a a mate. Ma iai te bwai ae e rangi ni karawawataa riki Aaron ma ana utu. E bon tuangaki Aaron ma natina ake tabeman riki irouni Mote bwa e tangiriia Iehova bwa a na aki kaotia ae a nanokawaki. E taku Mote: “A na tai bara iran atumi, ao tai raeuai kunnikaimi [ibukin tanginiweneimi]; ba kam aonga n aki mate, ao E aonga n aki un [Iehova] nakon te botaki n aomata ni kabanea.” (Nakoaia Ibonga 10:1-6, BG) E mataata te reirei aei. E riai ni korakora riki tangiran Iehova iroura nakon tangiraia kaain ara utu aika a aki kan kakaonimaki nakon Iehova.

¹⁷ N ara boong aikai, ao Iehova e aikoa kona n tiringia n te tai naba arei te koraki ake a urui ana tua. E kaotiota tangiraia ao e angania aia tai bwa a aonga ni katoki aia mwakuri aika bubuaka. Ma tera ana namakin Iehova ngkana a aki ongeaba n ana tua kaaro ao a iangoia bwa a bati bukina ae a riai iai n taetae ma natiia?

18, 19. Baikara kakabwaia aika kona n reke nakoia kaain te utu ngkana a teimatoa n kakaonimaki nakon Iehova?

¹⁸ A bati ake a taekinna bwa a okira te ekaretia man aia kakaonimaki raoraoia ma kaain aia utu nakon Iehova ao aroia naba n aki kataetaeia. N te katoto, e kaotia temanna te ateiaine nakoia unimwaane bwa te bwai teuana are e bita maiuna, bon aroni mwaanena nakoina. E kakaonimaki nakon Iehova ao e ongeaba n ana tua ngke e kabaneaki neiei. Ibukin anne, e a tangiria neiei ni kan okira te ekaretia.

¹⁹ Tera ae ti riai ni karaoia? Ti riai n ongeaba iroun Iehova ni maiura ni kabane. E kangaanga karaoan aei n tabetai ibukin aki kororaoira. Ma ti riai ni kakoauaa raoi bwa te bae e tuangira Iehova bwa ti na karaoia, bon te kabanea n tamaroa ibukira.

“E Maiu Ana Taeka te Atua”

20. Baikara aanga aika uoua ake ti kona n ota iai ni kanoan I-Ebera 4:12?

²⁰ Ngke e korea ae kangai Bauro “e maiu ana taeka te Atua” e aki nanona iai taekan te Baibara.c (I-Ebera 4:12) E kaotaki ni kiibu riki ake tabeua n te mwakoro anne bwa e taekin ana berita nako te Atua. E taekinna Bauro bwa a kokoro bukin ana berita te Atua n taai nako. E kangai ana taeka Iehova ibukin aei: “E na aki okirai ni matebuaka.” Ao e a manga taku: “ao e na reke konana n are I kanakoa nako iai.”(Itaia 55:11, BG) Ngaia are ti riai n taotaon nanora ngkana e aki kakoroi bukin ana berita nako te Atua n te tai are ti kantaningaia iai. Ti kona ni kakoauaa bwa e tabe naba ngkai Iehova ni mwakuria kakoroan bukin ana kantaninga.​—Ioane 5:17.

21. E kanga I-Ebera 4:12 ni buokiia aika kara bwa a na teimatoa ni beku iroun Iehova?

²¹ A bati mai buakon te “koraki ae uanao” ake a a tia ni beku ibukin Iehova i nanon ririki aika mwaiti. (Te Kaotioti 7:9) A aki kantaningaia bwa a na kara i nanon te waaki ae buakaka aei. Ma a bon teimatoa naba ni karaoa aia kabanea ni kona ni beku ibukin Iehova. (Taian Areru 92:14) A ataia “bwa e maiu ana taeka te Atua” ao a na boni koro bukin ana berita nako Iehova. (I-Ebera 4:12) A ataia bwa e tabe ngkai ni mwakuria kakororaoan ana kantaninga ibukin te aonnaba ao te botannaomata. Kioina ngkai e kakawaki ana kantaninga i bon irouna, ti kakukureia ngkana ti kaotiotia bwa e kakawaki naba ana kantaninga iroura. Bon akea ae kona n tuka Iehova mani kakororaoani bukin ana kantaninga n ana kaitua ni bong ni motirawa. Ao e ataia bwa a na teimatoa ana aomata ni kabane n uataboa ana kantaninga. Tera ngkoe arom? Ko a tia n ibuokanibwai n ana motirawa te Atua?

[Kabwarabwara ae nano]

Ko Uringnga?

• Tera te bwai ae ti riai ni karaoia bwa ti aonga n ibuokanibwai n ana motirawa te Atua ni boong aikai?

• Ti na kanga ni kaota kani kakukureian te Atua ngkana ti a mataata man te Baibara n te bwai ae e tangiria te Atua bwa ti na karaoia?

• Baikara aaro ake e kona ni kangaanga iai te ongeaba nakon te bae tuangira te Atua bwa ti na karaoia? Ma e aera ngkai e rangi ni kakawaki bwa ti na ongeaba irouna?

• Baikara aanga aika uoua ake ti kona n ota iai ni kanoan te boki ae I-Ebera 4:12?

[Taamnei n iteraniba 31]

A rangi n rawawata kaaro!