2 E Ibuobuoki ni Katoki Kangaanga

TE RARAOMA AE RIAO

E taku Rosie: “I rararaomaeakini bwaai n te aro are e a kakaiaki riki n au iango nakon are e bon riki.” Baikara kiibu aika buokia? Teuana boni Mataio 6:34, ae kangai: “Tai iango n raraoma ngkanne ibukin ningabong, bwa ko na bon raraomaeakinna ningabong. E bon tannako te bong ma kangaangana.” E taku Rosie ngkai bwa a buokia ana taeka Iesu akanne ni katoka raraomaeakinan te bong are imwina. E reitia ni kangai, “E bon tau raraomau ae reke, ao I a aki manga raraomaeakini baika tuai n riki ao tao a na bon aki riki.”

E noria naba Yasmine bwa e taonakinako n tabeaiangana. “I taatang tabebong n te wiki, ao e aki rereke matuu n tairiki tabeua. I namakinna bwa I a rotakibuaka n au iango aika aki raraoi.” Tera te kibu ae e buokia? Bon 1 Betero 5:7, ae kangai: “Kabanei ami iango n raraoma ni kaaki i [aon te Atua], ibukina bwa e mumutiakiningkami.” E taku Yasmine: “Ni waakinakon te tai ao I tatataro nakon Iehova, ao e kaekai au tataro. I namakinna bwa e a nako te bae rangi n rawawata mai aon angau. Bon iai naba taai ake I a manga iaiangoi iai baika bubuaka, ma ngkai I a ataa arou iai.”

TE KAKABANETAI

E kangai temanna te ateiaine ae Isabella: “I taku bwa e ewewe te kakabanetai n te utu bwa anne naba aron tamau. I kakatikui baika kakawaki bwa e aonga n akea te bae I karaoia, bwa N na bon tii aoaorai ke ni mataku n te TV. E karuanikai te anua aei ibukina bwa e karikirakea te rawawata ao e kona n aki nakoraoi iai ana mwakuri te aomata.” E buokaki neiei n te boto n reirei ae oti n 2 Timoteo 2:15, ae kangai: “Kakorakorako ni kaotiko bwa ko tau i matan te Atua bwa te tia mwakuri ngkoe ae akea kamaamaeam n te bwai teuana.” E taku Isabella, “I aki kani kamaamaea Iehova n au mwakuri tii ibukina bwa I kakabanetai.” E a nakoraoi riki ngkai arona.

E kangai naba Kelsey: “I kakatuka taekan au mwakuri ae tainaki, ni karokoa ae ai te kabanea ni miniti. I kona n tang iai, n aki mamatu, ao n raraoma. E aki raoiroi nakoiu.” E buokaki Kelsey n Taeka N Rabakau 13:16, ae kangai: “E mwamwakuri ma te atatai te aomata ae ataibwai, ma e kaotaraea oin nanobabana te aomata ae nanobaba.” E kabwarabwaraa reireiana ngke e kananoa ana iango i aon te kibu aei ni kangai: “Ko wanawana riki ngkana ko karaoa te bae riai ni karaoaki ao ni moantaai ni babaire. E a reke au boki ae uarereke ae I a kakaraoa iai kaetietin au mwakuri, ao e buokai aei ni kairirai raoi ao n aki manga katikui bwaai nakon te kabanea ni miniti.”

TE MAROAA N URINGAABA

E taku Kirsten: “E kitanai buu ao e katukai ma natiu aika uarereke aika aman.” Tera te boto n reirei man te Baibara ae e buoka neiei? E kangai Taeka N Rabakau 17:17: “E kaotiota te tangira n taai nako te rao ni koaua, ao boni ngaia te tari ae bungiaki ibukin tain te rawawata.” E kakaaea buokana Kirsten n te ekaretia. Tera ae e karekea? “A katiteuanaaki raoraou ni buokai n aanga aika bati! Tabeman a nikiri amwarake ma uee n au auti. Iai te korakina ake a buokai ma natiu ni mwaing man te auti teuana nakon teuana tentai. E buokai temanna ni kakaaea au mwakuri. A tauraoi ni buokai n taai nako raoraou.”

E rotakibuaka naba n te maroaa n uringaaba Delphine are neiere taekinaki mai mwaina. E uringia naake a tangiraki irouna ake a bua ao e taku: “I noriia aomata tabemwaang bwa a kaai ni kukurei ni maiuia, ma ngai I bon rotaki n te maroaa ao te aki kukurei.” Te kibu ae buoka neiei bon Taian Areru 68:6 ae kangai: “E katauraoa te mwenga te Atua ibukia akana maroaa bwa a na maeka iai.” E kabwarabwaraa neiei ni kangai: “I ataia bwa e aki nanona te mwenga ni koaua te kibu aei. Ma I a ota bwa e anganira te Atua te mwenga ni kaineti ma te onimaki, ae te tabo ae mano raoi ae reke iai te reitaki ni koaua ao te itangitangiri i marenaia naake a tangira Iehova. Ma I ataia bwa I aki kona ni kaan raoi ma taari aikai ni karokoa ae I kaan riki moa ma Iehova. Ngaia are e a ibuobuoki iai Taian Areru 37:4: ‘Karekea te kimwareirei ae korakora iroun Iehova, ao e na anganiko baika e tangiri nanom.’”

E motikia neiei ni kangai: “I a ataia bwa I riai ni kamatoaa riki reitakiu ma Iehova. Bon Raoraou ae te kabanea n raoiroi. Imwina ao I korei baike I kona ni karaoi ma taari, ao ni karekea ara reitaki ae boto i aoni baika kakawaki iroun te Atua. I a rabakau riki n tarai raoiroia tabemwaang ao n tarariaoi aki kororaoia.”

Ni koauana, a bon aki kororaoi te koraki aika toro iroun te Atua. A kabokorakora naba Ana Tia Kakoaua Iehova ma kangaanga aika rinanoi aomata. Ma a kaungaaki aomata n te reirei ni kataneiai man te Baibara bwa a na buokiia tabemwaang n te tai ae angaraoi irouia. Ti wanawana ngkana ti karekeia raoraora aika kakaraoa anne. Ma a kona naba n ibuobuoki booto n reirei man te Baibara ni kangaanga ake a aki kona ni katokaki ni boong aikai, n aron te aoraki ae wenemaan ao te rawawata ae rangi ni korakora?