Ko Riai ni Moantaai n Oki Ngkana Ko Uarongorongo?
N uataboan te mwakuri ni minita, ao a aki toki tabeman taan uarongorongo ni moantaai n oki n te tai ae a baireia, tao n tawanou. Ni koauana, ibukini baika riiriki nakoia tabeman ao a kona iai ni waekoa n oki man te uarongorongo n te tai ae a baireia. Ma tera arom, ko riai ni moantaai n oki man te uarongorongo ibukina bwa a kakaraoia tabeman n am kurubu, ke ibukina bwa a tataneiai kaain am aono ni moantaai n oki man te uarongorongo n te tai ae a baireia? Ko kona ni kaananaua am tai ibukin te mwakuri ni minita tabeua riki te miniti, ao n uataboia n aanga n uarongorongo riki tabeua n ana tabo te botannaomata n aron te uarongorongo i rarikin te kawai? Ko kona ni manga okiriia aomata tao temanna ke uoman ngkana ko nang okira mwengam? Iangoa te ibuobuoki ae bati ae ko kona n uataboia ngkana ko a manga kunea riki tii temanna ae kan ongora ni mwengana, ke ngkana ko angan te aomata ae rirarikim te maekatin teuana! Te anga ae bebete ibukini kabatiaan ara “karea ni karaoiroi” bon uataboan te uarongorongo ibukin tabeua riki te miniti, ngkana ti aki kani moantaai n oki man te uarongorongo.—Ebera 13:15.