Karikirakean Rabakaura n te Mwakuri ni Minita—n Arora ni Kaotiota Tabeakinaia Aomata

Bukini Kakawakina: E atai aroaroia aomata n tatabemania nako Iesu ao e kaotiota tangiraia n arona n tabeakinia. N te katoto, n te tai teuana ao e bae n ataia Iesu bwa iai te maamaa iroun te aomata ae bonotaninga, ngaia are ngke e katoka aorakina, ao e karaoa anne ni karabaa mai i mataia aomata aika bati. (Mareko 7:31-35) E kaota naba tabeakinaia taan rimwina n ataakin tian aia konabwai n aki kabatiai baika e na taekin nakoia. (Ioa. 16:12) E ngae ngkai e a tautaeka Iesu i karawa, e boni kaotiota naba tabeakinaia aomata. (2 Tim. 4:17) Ngkai ngaira taan rimwini Kristo, ti riai ni kakairi irouna. (1 Bet. 2:21; 1 Ioa. 3:16, 18) Irarikin anne, e na bon uaana ara mwakuri ni minita ngkana ti kaotiota tabeakinani kaain te auti ao n atai baika kakaokoro aika riki nakoina, baika e tatangiri ao baika e iaiangoi. E na boni kan ongora ngkana e ataia ae ti aki roko ibukini karokoan te rongorongo ke ni katuka te boki, n oneani mwin anne, ti boni kaota tabeakinana.