Anene Aika Boou Ibukin te Taromauri!
1 N ana botaki te Watch Tower Bible and Tract Society of Pennsylvania ae kakaraoaki ni katoa ririki are boo n Okitobwa 4, 2014 ao e katanoataaki iai te babaire ibukini manga rinanoan ara boki n anene ae ngkai. Aei te rongorongo ae rangi ni kakukurei! A bane ni kauringaki te koraki ake a roko bwa a na ataa kakawakin ara anene ibukin te Tautaeka n Uea n ara taromauri.—TaiAre. 96:2.
2 Ko bae n iango ni kangai: ‘Bukin tera ngkai e riai n rinanoaki te boki n anene?’ Iai bukina aika bati. Te moan, e teimatoa n rikirake ara atatai i aon te Baibara ao a kona naba n rotaki mwanewen anene aika n ara boki. (TaeRab. 4:18) Bukina riki teuana bwa angiin taeka aika kamanenaaki iai, a anaaki man te Baibara ae Tabu—te Rairai ae te Aonnaba ae Boou are mai imwaina. A bon riai ni bitaki mwanewen anene akanne ni kaboraoaki ma taeka aika n te Baibara are e a tia n rinanoaki. Kioina ngkai e na bati te mwakuri ni kaboouan mwanewen taian anene, e a baireaki bwa a na karinaki anene tabeua aika boou.
3 Ti riai n tataningaa otinakon te boki anne imwain ae ti kabonganai anene aika boou? Tiaki. Ti kukurei ni kaongoingkami bwa i nanon tabeua te namwakaina mangkai, a na kaotinakoaki anene tabeua n te atureti ae jw.org. N otinakon te anene ae boou ao e na rin n te kaetieti bwa te atu n reirei ae “te anene ae boou” n tokin te Botaki Ibukin te Uarongorongo.
4 Arora n Reiakini Anene Aika Boou: E kona ni kangaanga reiakinan te anene ae boou. Ti tangiria n anene ni bobotaki n te ekaretia ao “n aki kainababu,” n aron te tia areru. (TaiAre. 30:12, BG) Kakairi ni mwaneka aikai ibukin reiakinan te anene ae boou.
Teimatoa n ongongora katangitangin te anene ae raweaki are e na karinaki n ara atureti n te intanete. Ngkana ko kabatiaa ongoraean te katangitang, e na bebete iai ururingana.
Kamatenanoi mwanewena ao kataia n ururingnga.
Anenea te kuna ae iraki ma te katangitang. Karaoa anne ni karokoa e matenikuna.
Karaoa te kataneiai ibukin anene aika boou n taai tabetai n am Taromauri n Utu ni karokoa ae a kona n aneneia raoi kaain am utu.
5 Ngkana e baireaki te anene ae boou ibukini kainan te Botaki Ibukin te Uarongorongo n namwakaina aika a na roko, e riai te ekaretia n ongoraea moa te katangitang are e raweaki. Imwina, a kona n anene n irira te katangitang n aron ae ti kakaraoia n anene ake tabeua.
6 Ngkana ko iangoia, anene aika aneneaki n ara bobotaki a karekea nakoira te kimwareirei are ti a booti iai bwanara ni karaoiroa Iehova. Ngaia are ti riai n aki karekea bwa anuara te otiotinako ngkana e a waakinaki te anene n ara bobotaki.
7 Iai riki te anga teuana ae ti kona ni kaota iai te kakaitau ibukin ara katangitang aika tabu. A katangaki katangitang imwaini waakinan taian reirei n ruunga ao bwabwaro. Ni katoaa uoua te tai n te ririki, a ingainga nanoia taari mwaane ao aine n iteran nako te aonnaba ni mwananga nako Patterson i New York n oin aia kabanemwane, bwa aonga ni buoka karaoani katangitang aika tangiraoi ibukin ara taromauri. Ngaia are ngkana e kaoira te tia babaire bwa ti na kaei ara tabo n tekateka ao n ongoraei katangitang ake a tia ni katauraoaki, ti riai ni karaoa anne. E na buokira karaoan aei ni katauraoi nanora nakon reirei ake imwina.—Etira 7:10.
8 Ti na kaina ara botaki n te bong aei n te anene ae boou ae atuna “E Bia Roko te Tautaeka n Uea!” E onoti karaoan te anene aei ibukini kanikinaeani ana ka-tebubua n ririki n tei te Tautaeka n Uea, ae kaotinakoaki n te botaki are kakaraoaki ni katoa ririki ae tibwa tia n nako.
9 Boni “baika raraoi” mairoun Iehova anene aika boou. (Mat. 12:35a) Ti bia motinnanoia bwa ti na reiakin anene aika boou aikai ma n anenei n anga te karaoiroaki ao te karineaki nakon Atuara!—TaiAre. 147:1.