A Riai ni Bane ni ‘Butimwaea te Taeka ma Nanoia’!
1 Mirion ma mirion aomata aika tabe n reiakina te Baibara ma Ana Tia Kakoaua Iehova. Ngkana a na tau ibukin te maiu are aki toki, a riai ni ‘butimwaea te taeka ma nanoia’ n aroia naba naake 3,000 ake a rairi nanoia ao ni bwabetitoaki ni Bentekota 33 C.E. (Mwa. 2:41) Tera mwiokoara ni boong aikai ibukin aei?
2 Ti riai ni buokiia ara reirei n te Baibara bwa a na karikirakea tangiran Iehova. (1Tim. 4:7-10) Ibukin anne, e taekinaki aei n te reirei ae karinaki n Ara Mwakuri ni Minita ae bwain Tun 1996-E, barakirabe 20: “I nanon te tai n reirei, kakaaei aanga ni kaineti ma karikirakean riki ataakin ao tangiran aroaron Iehova. Kaota raoi tangiran te Atua iroum. Buoka te aomata ae reirei n te Baibara bwa e na rabakau naba ni karikirakea ana iraorao ae kaan ma Iehova.”
3 Te Kangaanga ae Ti Kaitaraa: A bati aomata aika a tia ni kairaraangaki n Aaro aika kewe ao ni kukurei n te aeka n taromauri ae aki kabanetai ao e aki kainnanoa te kakorakora, are e aki tangiraki iai karaoan te bitaki ni koaua nakoni maiuia. (2Tim. 3:5) Te kangaanga ae ti kaitaraaki iai bon buokaia ara reirei n te Baibara bwa a na ataia ae e bati riki ae kainnanoaki ibukin te taromauri ni koaua, nakon tii te riki bwa taan ongora n ana taeka te Atua. A riai ni maiuakini baike a reiakin. (Iak. 1:22-25) Ngkana iai aroaroia ae aki boraoi ma nanon te Atua, a riai n ataia ae bon tabeia bwa a na ‘bitii aroaroia’ ao ni karaoa ae riai ibukini kakukureiana. (Mwa. 3:19) A riai ni ‘kakorakoraia’ ao n tei ibukin te koaua ngkana a na karekea te maiu n aki toki.—Ruka 13:24, 25.
4 Ni maroroakinan iteran nako te aroaro ni maiu ae riai, titirakina am reirei n te Baibara bwa tera raoi ae e iangoia ni baikai ao tera ae riai ni karaoia ngkana e noria bwa iai bitaki aika e na karaoi ni maiuna. Kaira ana iango nakon ana botaki te Atua are e tabe n reiakina iai te koaua ao kaungaa bwa e na katoatai ni kakaaei bobotaki.—Ebera 10:25.
5 Ti bia kateia bwa tiara, rotakin nanon te aomata ae reirei n te Baibara n ara angareirei. Ti na kimwareirei ngkai ti kaungaia aika boou bwa a na butimwaea ana taeka te Atua ma nanoia ao ni bwabetitoaki!—1Tet. 2:13.