Angareirei n te Aro ae Kai Ota
1. Tera mwakoron te angareirei teuana ae kakawaki bwa e aonga ni mataata ao n uaana te reirei?
1 Te angareirei n te aro ae kai ota boni ngaia kiingin te reirei ae uaana nakoia aomata. Iaiangoan aron te tia Reirei ae Kakannato ae Iesu, e na kona ni buokira ni karikirakea aron ‘rabakaura n angareirei.’—2Tim. 4:2; Ioa. 13:13.
2. Tera ae irekereke ma te angareirei n te aro ae kai ota, ao tera uaan te angareirei aei?
2 Taetae n te Aro ae Kai Ota: E kakanoa te Kabwarabwara i aon te Maunga n tabeua mai buakoni koaua aika rangi ni kakawaki ake a tuai man tataekinaki iroun te aomata temanna, ao a bane ni kabwarabwaraaki n te aro ae kai ota. (Mat., mwa. 5-7) A boni ‘miroaroa te koraki n aron Iesu n angareirei’ ngke a ongora irouna. A rotaki naba bureitiman ake a kanakoaki bwa a na taua Iesu n te aro are a a kangai: “Akea te aomata ae e a tia n taetae n aron teuaei.” (Mat. 7:28, 29; Ioa. 7:46) Ti aki riai ni kamanenai taeka aika a nano, taeka aika e kangaanga te ota iai, ke kaikonaki aika a kainnanoi kabwarabwaraaia aika bati bwa ti aonga ni katereterea te koaua nakoia tabemwaang. E kona ni mataata kabwarabwaraan te koaua ni kamanenaan taeka aika e tataneiai te aba iai.
3. A aera aomata tabeman ngkai a angania taan ongora rongorongo aika mwaiti, ao ti na kanga ni kona n rarawa nako iai?
3 Tiatiana Mwaitin te Reirei: E iaiangoiia taan ongora Iesu bwa mwaitira rongorongo are e na taekin nakoia n te tai teuana. (Ioa. 16:12) Ti bon riai naba n atai ao ni kaangaraoira nakoni baika a kainnanoi aomata ake ti maroro ma ngaiia, ai moarara riki ngkana ti uarongorongo nakoia ara koraki, aomata aika boou ake iai te kan ongora irouia, ke ataei. Ti riai n taraia raoi bwa ti na aki taekin rongorongo aika bati nakoia e ngae ngkana a rangi ni kan ongora. A na teimatoa te koraki ake a raoiroi nanoia ni karekea te atatai ibukin te Atua ae koaua ae Iehova.—Ioa. 17:3; 1Kor. 3:6.
4. E aera bwa e rangi ni kakawaki kaatuuan riki baika kakawaki nakoni kabwarabwaraani bwaai ni kabane?
4 Kaatuui Riki Baika Kakawaki: E aki angareirei Iesu n te aro ake e na kangaanga te ota ni kabwarabwaraan rongorongo aika rangi ni mwaiti. Ngke e taekina ae kangai: “Aomata ake a mena i nanon taian ruanimate, . . . a na oti nako,” e bon aki iangoa te tai anne bwa e na kabwarabwarai baika mwaiti ni kaineti ma kantaninga aika uoua ibukia te koraki ake a kautaki. (Ioa. 5:28, 29) Ngkana ti kairi reirei n te Baibara, ti riai naba ni kaatuui baika kakawaki ao n rarawa nakoni kani kabwarabwaraani baika aki kakawaki ake aki rinanoaki n te boki.
5. Tera te kakabwaia ae ti kona ni karekea ngkana ti angareirei n te aro ae kai ota?
5 Ai kakaitaura ngaira ngkai e reireinira Iehova n te aro ae kai ota ni bwaai ni kabane ake ti riai n atai! (Mat. 11:25) Ti bia karekea te rabakau n angareirei n te aro ae kai ota ao ni karekea te kimwareirei n uaan te mwakuri ni minita.