‘Kakororaoa Kaotiotan te Rongorongo ae Raoiroi’
1. Tera te katoto ae tamaroa are e kateia te abotoro Bauro ibukin te mwakuri ni minita?
1 “Kakororaoa raoi am mwakuri ni minita.” (2 Tim. 4:5) E aki maaku n taetaenikawai te abotoro Bauro ngke e taekina anne ni kaungaa Timoteo. Ni koauana, e karaoa mwanangana ni mitinare aika tenua Bauro, i marenan te ririki 47 ao 56 C.E. E okioki n taekinaki n te boki ae Mwakuri taekani Bauro ni ‘kakororaoa kaotiotan te rongorongo ae raoiroi.’ (Mwa. 23:11; 28:23) Ti na kanga ni karaoa anne n ara bong aikai?
2. Ti na kanga ni kakororaoa kaotiotan te rongorongo ae raoiroi ngkana ti uarongorongo man te auti teuana ma teuana?
2 Man te Auti Teuana ma Teuana: Ngkana ti kakorakoraira ni kawariia kaain te auti ake a tuai n ongoraea te rongorongo ae raoiroi, ti kona ni kawariia n taai aika kakaokoro i nanon te wiki. E kona kaain te auti ni mena ni mwengana n te moan tairiki ke n te wikeen. Ti riai ni kakorakoraira ni maroro ma te aomata n auti nako, ao ni manga okiri auti ake a nakonako kaaia. Ma tera arom ngkana e aki nakoraoi am kakorakora ni maroro ma te aomata? Tao e na nakoraoi te maroro ma te aomata n te kororeta ke n te tareboon.
3. Baikara aanga aika ko kona n uarongorongo iai n ana tabo te botannaomata ao n te tai ae e aki baireaki?
3 N Ana Tabo te Botannaomata ao n te Tai ae E Aki Baireaki: A kabutaa nako “te rabakau” ana toro Iehova ni boong aikai nakoia aomata ni kabane aika a na ongora iai. N tabetai, a karaoa aei ‘i rarikin te kawai’ ke “n te tabo ae bati ni kakawaraki.” (TaeRab. 1:20, 21, BG) Ngkana ti nang karaoi baika ti kakaraoi ni katoabong, ti ataa te anga ae ti na uarongorongo iai? Ti kona n taekinaki bwa ti ‘kakorakoraira riki n tataekina te rongorongo ae raoiroi’? (Mwa. 18:5) Ngkana ngaia anne, ti a kakororaoa ngkanne mwiokoara ae ‘kakororaoani kaotiotan te rongorongo ae raoiroi.’—Mwa. 10:42; 17:17; 20:20, 21, 24.
4. E na kanga te tataro ao kananoan am iango ni boutokaa kakororaoani kaotiotan te rongorongo ae raoiroi?
4 Ma n tabetai, ti kona n tabwarabwara n uarongorongo ibukini mamaarara ke rikiara ae te mamaamaa. Ni koauana, e atai kabwakara Iehova. (TaiAre. 103:14) Ma e ngae n anne, ngkana a riki aeka ni kangaanga aikai, ti kona n tataro nakoina ibukin te ninikoria ni moana ara maroro. (Mwa. 4:29, 31) Ngkana ti ukeuke n reirei i bon iroura ao ni kananoa ara iango n Ana Taeka te Atua, ti kona naba ni kaatuua iangoan ara kakaitau ae bati ibukin rianakoni kakawakin te rongorongo ae raoiroi. (IBir. 3:8) Ti na kairaki n aei bwa ti na uarongorongo ma te ingaingannano!
5. Ti na kanga n uataboa kakoroani bukin ana taetae ni burabeti Ioera?
5 E taetae ni burabetinna Ioera bwa imwain rokon ana bong Iehova ae kakannato ao e kakamaaku, ao a na “mananga” ana aomata te Atua ao n aki kariaia te bwai teuana bwa e na kabwarai nanoia man te uarongorongo. (Ioera 2:2, 7-9) Ti bia bane n uataboa te mwakuri n uarongorongo ae e aki okioki karaoana aei!