Te Mangauti​—E Kona n Riki Rinanon te Kaboomwi

E reke ara tai ae tamaroa n tain te Kauring bwa ti na iaiangoi kakabwaia n taai aika a na roko ake a na kakoroaki bukia rinanon te kaboomwi, n aron te mangauti. E aki kantaningaia Iehova bwa a na mate aomata. Anne bukina teuana ae moan te kammaraki iroura ngkana e mate temanna ae tangiraki iroura. (1Ko 15:26) E maraki Iesu n noraia taan rimwina ngke a tang ni maten Rataro. (Io 11:33-35) Kioina ngkai boni katotongan raoi Tamana Iesu, ti aki nanokokoraki ngkanne bwa e maraki naba Iehova ngkana e norira n tang ngkana e mate temanna ae ti tangiria. (Io 14:7) E ingainga nanon Iehova nakon te tai are e na kautiia iai ana toro man te mate, ao ti riai naba n namakina anne.​—Iob 14:14, 15.

Kioina ngkai Iehova bon te Atua ae babaire raoi, ti bon riai ni kakoauaa bwa e na karaoaki te mangauti n te aro ae baireaki raoi. (1Ko 14:33, 40) A na karaoaki botaki ibukini butimwaeaia naake a na kautaki man te mate ao ai tiaki karaoan taian taunimate. Ko iaiangoa te mangauti, riki n taai ni karawawata? (2Ko 4:17, 18) Ko kaitaua Iehova ngkae e katauraoa te kaboomwi ao ni kaotia n te Koroboki ae Tabu bwa a na manga maiu maate?​—Kor 3:15.

• Antai irouia raoraom ao am koraki ae ko ingainga riki ni kani manga noria?

• Antai man te Baibara ae ko kani kaitiboo riki ma ngaia ao ni kataetaea?