Arom ni Buokaki Man te Tataro

E taku Pamela: “I rangi ni maaku ngke I a toka i aon au bwainnaoraki. Ma ngke I tataro nakon Iehova ae te Atua, I a namakina naba te raunnano ao te nanomwaaka i aan rawawatau. E tuai man toki te maraki aei, ma e buokai te tataro n teimatoa n iangoi baika kakukurei. Ngkana a tuangai aomata bwa I uara, I a kangai naba, ‘I aki marurung, ma I boni kukurei!’”

Eng, ti aki riai n taningaa rotakira ni kangaanga aika a na ruanikai iai maiura ao ti a tibwa tataro. Ti bane n aitara ma kangaanga, aika bubura ao aika uarereke naba, ao n angin te tai ti kainnanoa te ibuobuoki bwa ti na nanomwaaka i aani kangaanga akanne. E kona ni buokira te tataro?

E taku te Baibara: “Kaaki rawawatam i aon Iehova ao e na kateimatoako. E aki kona ni kariaia bwa e na bwaka ane e raoiroi.” (Taian Areru 55:22) Ai karaunanora taeka aikai! Ngaia are e na kangaa te tataro ni buokiko? Ngkana ko tataro nakon te Atua n te aro ae boraoi ma nanona, e na boni buokiko n nanomwaaka i aan am kangaanga.​—Nora te bwaoki ae “Te Bae Kona n Reke Iroum Man te Tataro.”