E Tabeakiniko te Atua
TE BAIBARA bon ana boki te Atua ae iai i nanona te reirei ni kairiri ae te kabanea n tamaroa ibukira. Bon tiaki te boki ibukin te bwainnaoraki, ma e kona ni buokira n aanga aika manena ni kaaitarai baika riki aika karawawata, tabetaben ara iango, namakin aika kammaraki, ao ai aorakin ara iango ke rabwatara.
Ae moan te kakawaki riki, e karaui nanora te Baibara bwa Iehova ae te Atua ae ara tia Karikiriki,a e ota riki n ara iango ao ara namakin, nakon temanna riki. E bon ingainga ni kani buokira bwa ti na kaaitarai ara kangaanga. N te katoto, iangoi katoto man te Baibara aika uoua aika kabebetea te nano:
“E kaan Iehova ma akana uruaki nanoia. E kamaiuia akana rawawata nanoia.”—TAIAN ARERU 34:18.
“I rawea baim ae te atai ngai ae Iehova ae Atuam, are Teuare kangai, nakoim, ‘Tai maaku. N na buokiko.’”—ITAIA 41:13.
Ma e kangaa Iehova ni buokira ni kaaitarai ara kangaanga ni kaineti ma aorakin ara iango? N aron ae ko na noria ni kaongora aika imwina, e kaotia Iehova bwa e rangi n tabeakinira, n aanga n ibuobuoki aika bati.
a Iehova bon aran te Atua.—Taian Areru 83:18.