IBUKIA KAARO
7 Te Aroaro Ni Maiu
AE NANONAKI IAI
Te aroaro ni maiu bon ana kaetieti te aomata i bon irouna are e na bairea iai aroni maiuna. N te katoto, ko kakorakorako ni bwabwaina te koaua ni bwaai ni kabane? Tao ko na kani karina naba te aroaro ni maiu ae riai aei irouia natim.
E nanonaki naba n te aroaro ni maiu katei aika riai. N te katoto, te aomata ae bwaina te katei ae riai, e taningamarau, e bwaina te eti, ao e tabeakinia aomata. Akanne aroaro aika kai reke iroun ae ataei riki.
TE BOTO N REIREI MAN TE BAIBARA: “Reireina te teei ni kataneia n te kawai ae riai n nako iai, ao e na bon aki kitanna e ngae ngkana e a kara.”—Taeka N Rabakau 22:6.
BUKINA NGKAI E KAKAWAKI REIREINAIA ATAEI TE AROARO NI MAIU AE RIAI
E a kakawaki riki ngkai te aroaro ni maiu ae riai n te roro ae e a kakabonganaaki iai kukune aika boou. E taku te tina ae Karyn: “A kai noraki baika bubuaka i aon te tablet ke mobwaao. A kona n tekateka natira i rarikira, ao ngaia a mataku ni baika bubuaka!”
TE BOTO N REIREI MAN TE BAIBARA: “Aomata aika ikawai . . . a kakabongana aia atatai ao a kataneiaaki iai bwa a na ataa ae eti ao ae kairua.”—Ebera 5:14.
E kakawaki naba te katei ae riai. E irekereke naba iai taeka aika kaota te karinerine (n aron taekinan “taiaoka” ao “ko rabwa”) ao tabeakinaia aomata, ae te aroaro ae e a aki rangi ni kakaraoaki, bwa n taraana a a tabe riki aomata ma aia tablet ao aia mobwaao.
TE BOTO N REIREI MAN TE BAIBARA: “Bwaai ake kam tangiriia aomata bwa a na karaoi nakoimi, karaoi naba nakoia.”—Ruka 6:31.
TE BWAI AE KO KONA NI KARAOIA
Taekini kaetieti aika ko kakairi iai ibukin te aroaro ni maiu ae riai. N te katoto, e oti n te kakaae bwa a kona n rarawa rooro n rikirake nakon te wene ni bure imwain te mare ngkana a reireinaki raoi bwa e kairua te aroaro aei.
TE IBUOBUOKI: Kabongana te bwai ae e a bon tibwa riki ni maroroakina iai taekan te aroaro ni maiu. N te katoto, ngkana e nako n te rongorongo taekan te kakeru, ko kona ni kangai: “E buakaka aroia te koraki aei ni kaota unia nakoia naake te korakina. N am iango e kangaa n riki aei?”
“E kangaanga riki rinean ae eti ao ae kairua irouia ataei ngkana a aki ataa ae eti ao ae kairua.”—Brandon.
Reireinia te katei ae riai. A kona naba n rabakau ataei aika uarereke n taekina “taiaoka” ao “ko rabwa,” ao ni kaota tabeakinaia tabemwaang. E taku te boki ae Parenting Without Borders: “Ngkana a a ota riki ataei bwa boni kaain te rabwata ae bubura ngaiia, n aron te utu, te reirei, te kaawa, ao bon tiaki tii ngaiia, a na kai kaotiota riki te akoi ae a na kakabwaiaaki iai aomata nako, ao tiaki tii ngaiia.”
TE IBUOBUOKI: Katoaia natim ma tabeia n te mwenga bwa a aonga n ataa kakawakin te beku ibukia tabemwaang.
“Ngkana a kakaraoi ngkai tabeia natira, a na aki rotakibuaka ngkana a a reke oini mwengaia. E na riki kakaraoan tabeia bwa iteran naba maiuia teuana.”—Tara.