Ataa Raoi te Koaua

Te Kangaanga

E rereke te riribai ngkana e aki tabwanin raoi te rongorongo. Iangoi katoto aikai:

Iai tabeman taani mwakuri ake a boutokaa te iango ae kairua ae a aki tau aine ni mwakuri ma baika irekereke ma te rabakau n aonnaba ke baika maiu man te kaombiuta.
I marenan 500 C.E nakon 1,500 C.E i Eurobe ao a a bukinaki I-Iutaia bwa aongkoa a kaboitini mwanibwa ao ni kabutanakoa te aoraki. Ao a a manga tiringaki n ana tai n tautaeka te Nazi. Ma n te tai aei a bukinaki bwa a karikirakea te maiu ni kainnano i Tiaman. N taai aika uoua aikai a a riki I-Iutaia bwa taan riribaaki, ao bon iai naba tabeman aika teimatoa n rinanon anne ngkai.
A bati ake a iangoiia aomata aika toabuaka bwain rabwataia, bwa aomata aika nanokawaki man rawawata.

Aomata aika kakoauai karioiango aika ai aron aikai, a kona n taekini katoto tabeua ke bwaai ni kakoaua aika aongkoa a boutokaa aia iango. Ao a iangoia naba bwa naake a aki boutokaa aei bon aomata aika aki ataibwai.

Ana Boto n Reirei te Baibara

“E aki raoiroi te aomata ae akea ana atatai.”—TAEKA N RABAKAU 19:2.

Tera ae e nanonaki iai? Ngkana ti aki ataa raoi te koaua, a na boni bubuaka ara motinnano. Ngkana ti kakoauai karioiango ao tiaki baika koaua, a na boni kairua ara iango ibukia tabemwaang.

E Ibuobuoki Ataakin Raoi te Koaua

Ngkana ti ataa raoi te koaua ibukia aomata, ti na aki kai kakoauai bukibuki ni kewe ibukia. Ao ngkana ti a ataia ae ti a tia ni kekeweaki ibukia tabeman, ti na bae n aki manga kakoauai bukibuki ibukia ake tabemwaang.

Te Rongorongo ae Koaua: Jovica (Balkan)

Jovica, are taekinaki n te kaongora are mai mwaina, e aki toki n ongongo irouia kaain abana, n te rongorongo, ao n taiani kaongora n te tv, ribooti aika bubuaka ibukia te koraki n aomata teuana ae karako mwaitiia. E taku teuaei: “I a rikirake n riribaiia te koraki aikai. Ao irou e bon riai au namakin aei.”

“Ma ngke I mena n te taanga ni buaka, ao ai bon akea au anga bwa I a riai ni maeka ao ni mwakuri ma tautia aika nako man te koraki n aomata aei. Imwina riki ao I a kinaia. I reiakina naba aia taetae ao n ongongora n aia anene. E a nakoraoi reitakiu ma ngaiia ao e a moanna ni bitaki au iango ibukia. Ma e bon roroko naba are I a manga ribaiia. Ngaia are I a katinanikui rongorongo aika kabuakakaaki iai te koraki aikai. I a aki naba mamatakuakin taamnei ke kamanga ake a bwainikirinaki iai. I a ataia bwa e kona namakinan te riribai n rikirake nakon te un ao te aki tatangira.”

Te Bwai ae Ko Kona ni Karaoia

A kona aomata n taekinia te koraki n aomata teuana bwa a buakaka, ma uringnga are a boni bati i buakoia te koraki anne aika raraoi naba aroia.
Ataia ae te rongorongo are ko karekea ibukia tabemwaang e kona n aki tabwanin raoi.
Kataia ni karekei koaua aika onimakinaki raoi.