MWAKORO 2

Te Ieka ni Karokoa te Otinako mai Aikubita

Tii waniman aomata ake a maiu man te Ieka, ma e a manga boni birirake naba mwaitiia aomata nakon ngaa ma ngaa. Imwina, ngke ai 352 te ririki imwin te Ieka, ao e a bungiaki Aberaam. Ti reiakina iai aron te Atua ni kawakina ana berita, ngke e angan Aberaam natina are arana Itaaka. Imwina e a manga rineaki Iakoba iroun te Atua mai buakoia natin Itaaka aika uoman.

E bati natin Iakoba bwa 12 te mwaane ao aine tabeman. A riribaa tariia are uarereke riki are Ioteba natin Iakoba ake 10, ao a kaboonakoa bwa e na riki bwa te toro i Aikubita. Imwina riki ao e a riki Ioteba bwa te tia tautaeka ae kakannato i Aikubita. Ngke e a roko te rongo ae korakora, e a kataiia tarina Ioteba n noria bwa e a tia ni bitaki nanoia are e buakaka ngkoa ke e tuai. N tokina ao a a bane ana utu Iakoba ake tibun Iteraera ni mwaing nako Aikubita. E riki aei 290 te ririki imwin bungiakin Aberaam.

A kabanea 215 te ririki tibun Iteraera ni maeka i Aikubita. Imwin maten Ioteba ao a a riki bwa tooro ikekei. N te taina ao e a bungiaki Mote, are e a rineia te Atua bwa e na kaotinakoia tibun Iteraera mai Aikubita. Rongorongon rimoa aikai aika a karakinaki ni Mwakoro UOUA, a riki i nanon 857 te ririki.