KARAKI 25

E Mwaing Nako Aikubita Te Utu

E A AKI kona n taona nanona Ioteba, ngaia are e a tuangia ana toro ni kabane bwa a na kitana te ruu. Ngke ai bon tii ngaia ma tarina, ao e a moana naba tangina. Ti kona n iangoa aroni mimia tarina, ngkai a aki ataa bukin tangina. N tokina ao e a taku: ‘Boni ngai Ioteba. E maiu naba ngkai tamau?’

A rangi ni kubanako tarina n te aro are a aikoa kona n taetae. A a maaku. Ma e taku Ioteba nakoia: ‘Taiaoka kaaniai riki.’ Ngke a kaania ao e a taku naba: ‘Boni ngai tarimi are kam kaboonakoa ngkoa nako Aikubita.’

E reita nako ana kabwarabwara Ioteba ma te akoi ni kangai: ‘Tai bukiningkami ngke kam kaboonakoai. Bon te Atua ae kanakomaiai nako Aikubita bwa N na kamaiuia aomata. E a tia ni karikai Barao bwa te tia tautaeka n te aba ni kabutaa. Mangaia are naako oki ao kaongoa tamau baikai. Ao tuangnga bwa e na nakomai ni maeka ikai.’

Imwina e rabwatiia tarina Ioteba, ao e inga ma ngaiia ni kaboria ma ngaiia ni kabane. Ngke e ongo Barao bwa a roko tarin Ioteba, ao e tuanga Ioteba ni kangai: ‘Tuangia bwa a na uoti kaa, ao n nako n anaa tamaia ma aia utu n nakomai. N na angania te aba ae te kabanea n tamaroa i aon Aikubita.’

Anne te bwai are a karaoia. Ko kona n nora Ioteba ikai bwa e a kaitiboo ma tamana, ngke e a roko i Aikubita ma kaain ana utu ni kabane.

E a rikirake ni bubura ana utu Iakoba. Mwaitiia ni kabane bon 70 ngke a mwaing nako Aikubita, ngkana e tii warekaki Iakoba ma natina ao tibuna. Ma iai naba buuia, ao e boni bae ni bati naba aia toro. A a bane ni maeka i Aikubita. A aranaki bwa tibun Iteraera ibukina bwa e a tia te Atua ni bita aran Iakoba nakon Iteraera. Ti na noria rimwi riki bwa a na riki tibun Iteraera bwa aomata aika kakawaki iroun te Atua.

Karikani Bwaai 45:​1-28; 46:​1-27.