KARAKI 22

E A Karabutinaki Ioteba

AI TIBWA 17 ana ririki Ioteba ngke e uotaki nako Aikubita. Ikekei are e a manga kabooaki iroun te mwaane ae Botiba. Botiba bon ana tia mwakuri uean Aikubita are Barao.

E mwakuri korakora Ioteba iroun ana mataniwi ae Botiba. Ngaia are ngke e a ikawai riki Ioteba, ao e a onimakinaki iroun Botiba bwa e na mataniwi i aon ana bwai nako. Ma e aera ngkai e a mena n te karabuti Ioteba? E riki aei mairoun buun Botiba.

Ngke e a tabe n ikawairake Ioteba ao e rikirake naba botonimwaanena, ao buun Botiba e a tangiria ni kani wene ma ngaia. Ma e ataia Ioteba bwa e bure te baei, ao e aki riai ni karaoia. E rangi n un buun Botiba. Mangaia are ngke e a oki buuna, ao e a kewe nakoina ni kangai: ‘E kataia ni kani wene ma ngai Ioteba ae te aomata ae buakaka!’ E kakoauaa buuna Botiba, ao e rangi n un iroun Ioteba. Mangaia are e a karinna n te karabuti.

E waekoa n noria te tia tararuaa te karabuti bwa bon te aomata ae raoiroi Ioteba. Mangaia are e a karikia bwa te mataniwi i aoia buure. Imwina riki ao e a un Barao iroun te tia taraa nimana ao ana tia umum, ao e a karinia n te karabuti. N te tairiki teuana ao a uaia ni miia te mii ae okoro, ma a aki ataa nanon miia. N te bong are imwina ao e taku Ioteba: ‘Tuangai bwa tera ae kam miia.’ Ao ngke a kaota miia, ao e a kabwarabwaraa nanon te mii Ioteba nakoia, bwa e buokaki iroun te Atua.

E taku Ioteba nakon te tia taraa niman te uea: ‘Tenibong imwin ngkai ao ko na otinako man te karabuti, ao ko na manga riki bwa te tia taraa niman Barao.’ Mangaia are e taku Ioteba nakoina: ‘Ngkana ko otinako, tuanga Barao taekau, ao buokai ni kaotinakoai man te tabo aei.’ Ma e taku Ioteba nakon te tia umum: ‘Tenibong imwin ngkai ao e na kabakuaki roroam iroun Barao.’

Tenibong imwina ao a a riki baikekei n aron taekaia iroun Ioteba. E tua Barao bwa e na kabakuaki roroan te tia umum, ao te tia taraa niman te uea e a kaotinakoaki man te karabuti ao ni manga moana naba ana mwakuri iroun te uea. Ma e mwaninga nako taekan Ioteba te tia taraa niman te uea! E aki tuanga Barao taekana, ao e teimatoa n tiku n te karabuti Ioteba.

Karikani Bwaai 39:​1-23; 40:​1-23.