KARAKI 23

Miin Barao

UOUA te ririki imwina, ao e bon teimatoa naba ni mena n te karabuti Ioteba. E tuai n uringaki iroun te tia taraa niman te uea. N te tairiki teuana ao e mii Barao uoua te tai ao a rangi n okoro miina aikai, ao e kan ataia bwa tera nanoia. Ko noria ni matu ikai? N te ingabong are imwina ao e a weteia ana tia rabakau bwa a na kabwaraa nanon miina. Ma a aki kona ni kabwaraa.

E a tibwa uringa Ioteba te tia taraa niman te uea n te tai aei. E taku nakon Barao: ‘Ngke I mena ngkoa n te karabuti, ao iai te aomata iai ae bwaati ni kabwara mii.’ E waekoa ni kaotinakoaki Ioteba man te karabuti iroun Barao n te tai naba arei.

E taku Barao nakon Ioteba ngke e kaota miina nakoina: ‘I noriia kaao aika itiman aika marikarika aika raraoi taraaia. Imwina I a manga noriia itiman naba kaao aika rangi ni kairariki ma ni ngengenri taraaia. Ao a kanaki ake a marikarika irouia ake a kairariki.

‘Ni miiu are te kauoua ao I nori amwi n uita aika itua aika maiuraoi i aoni kaina ae tii teaina. Imwina I a manga nori, itua amwi n uita aika uaamate i aon teaina naba kaina. Ao e a moanna ni kabwautaki te uita are maiuraoi are itua i aoni kaina, iroun are uaamate.’

E taku Ioteba nakon Barao: ‘Titeboo nanon mii akana uoua. Te bwai ae nanonaki ni kaao ake itiman ake a marikarika ma uita ake a maiuraoi, bon itua te ririki, ao kaao ake itiman ake a kairariki ma uita ake a uaamate, bon itua riki te ririki. E na iai itua te ririki are e na bati iai n rikirake te amwarake man te ununiki i aon Aikubita, ao iai itua te ririki are e na rangi n uarereke iai te amwarake man te ununiki.’

Mangaia are e taku Ioteba nakon Barao: ‘Rinea te aomata ae rabakau ao mwiokoia bwa e na kaikoa te amwarake i nanon itua te ririki ni mari. Ngkanne a na aki baki aomata, ngkana e a roko te ririki are itua are te tai are e na rangi n uarereke iai te amwarake.’

E kukurei Barao n te iango arei. Ao e a rinea Ioteba bwa e na rikoi amwarake ma ni kaikoi. E a riki Ioteba bwa te kauoman ni kakannato i aon Aikubita i aan Barao.

Wanua te ririki imwina, n tain te rongo ao e a noriia mwaane tabeman Ioteba n roko. Ko ataia bwa antai ake a roko? Bon tarina ake a ikawai riki nakoina ake 10! E kanakoia tamaia are Iakoba nako Aikubita ibukina bwa e a bane kanaia ni mwengaia i Kanaan. E kinaia tarina aikai Ioteba ma a aki kinaa. Ko ataa bukina? Ibukina bwa e a ikawai riki Ioteba, ao e a kunnikaia n te aeka ni kunnikai ae kaokoro.

E uringa naba miina Ioteba ngke e uarereke, are e miia tarina bwa a bobaraki nakoina. Ko uringa ngkoa anne are ko a tia ni warekia kee? Mangaia are e a ataia Ioteba bwa bon te Atua ae karekea nakona nako Aikubita ni kaineti ma bukina ae riai. N am iango tera are e karaoia Ioteba? Ti na noria.

Karikani Bwaai 41:​1-57; 42:​1-8; 50:20.