KARAKI 24
E Kataiia Tarina Ioteba
E KAN ataia Ioteba bwa a bon teimatoa naba ni bangaaomata ao n aki akoi tarina ake 10, ke a a bitaki. Mangaia are e taku: ‘Bon tibwaai ngkami. Kam nakomai n noria bwa e korakora abara ke e aki.’
A kaeka ni kangai, ‘Ti aki roko n tibwaai, bwa bon aomata aika raoiroi ngaira. Taari ngaira ni kabaneira. Bon 12 mwaitira, ma ai akea ngkai tarira temanna, ao te bina are e tiku iroun tamara ni mwengara.’
E bakaaea te aki kakoauaia Ioteba. E karabutina temanna irouia ae Timeon, ao e kariaia ake nikiraia bwa a na okira mwengaia ma kanaia. Ma e kangai nakoia: ‘Ngkana kam oki, ao kam riai ni kaira tarimi are te bina.’
Ngke a okira mwengaia i Kanaan, ao a a tuanga tamaia are Iakoba bwaai ni kabane ake a riki. E rangi n nanokawaki Iakoba ao e tang ni kangai. ‘Akea Ioteba, ao ai manga akea ngkai Timeon. I aki kariaia bwa kam na manga kaira nako Beniamin.’ Ma ngke e a moanna ni bane kanaia, ao e a kariaia Iakoba bwa e na kairaki Beniamin nako Aikubita, bwa e aonga ni manga reke kanaia.
Ngke e noriia tarina Ioteba ake a a manga roko, ao e rangi ni kukurei n nora karimwina are Beniamin. Ni koauana, akea i buakoia ae ataia bwa te aomata ae kakannato aei bon Ioteba. E a kataiia ngkai tarina aika 10 aikai, Ioteba.
E tuatua nakoia ana toro bwa a na kanoai aia buua n te amwarake. E tuangia naba ana toro Ioteba bwa a na karaba ni karina ana mwangko te tirewa i nanon ana bua Beniamina. Ngke a a nako ao n tuai n rangi n raroa, ao e a kanakoia naba ana touati Ioteba bwa a na rimwiaki. Ngke a a reke, ao a taku touati nakoia: ‘Bukin tera ngkai kam iraea ana mwangko ara toka ae tirewa?’
A kaeka taari aikai ni kangai: ‘Ti aki iraea ana mwangko. Ngkana kam kunea te mwangko anne i nanon ana bua temanna, ao ke e tiringaki.’
Mangaia are a a tuoi buua ni kabane touati akekei, ao a a kunea te mwangko n ana bua Beniamin, n aron ae ko noria ikai. A taku touati akekei: ‘Kam kona n nako ngkami, ma e na irira Beniamin.’ Tera ae a a karaoia ngkai taari aika 10 aikai?
A a manga bane n ira Beniamin n oki nakon ana auti Ioteba. E tuangia tarina Ioteba ni kangai: ‘Kam kona ni bane n okiri mwengami, ma e riai n tiku ikai Beniamin bwa au toro.’
E kaeka Iuta n te tai aei ao e taku: ‘Ngkana I okira mwengau n akea te teinimwaane aei, ao e na mate tamau ibukina bwa e rangi n tangiria. Mangaia are taiaoka, tauai bwa am toro, ma kaoka te teinimwaane aei nakon mwengana.’
E a noria ngkai Ioteba bwa a a bitaki tarina aikai. A aikoa bangaaomata ao a a bwaina te akoi. Ti na noria bwa tera ae nang karaoia ngkai Ioteba.
Karikani Bwaai 42:9-38; 43:1-34; 44:1-34.