KARAKI 63
Te Uea Ae Wanawana Ae Toromon
AI TEBWI tabun ana ririki Toromon ngke e a riki bwa te uea. E tangira Iehova, ao e toua raoi mwin ana reirei tamana are Tawita are e tuangnga. E kukurei Iehova iroun Toromon, ngaia are e a tuangnga n te mii n te tairiki teuana ni kangai: ‘Toromon, tera ae ko tangiria bwa N na anganiko?’
E kaeka Toromon ao e taku: ‘Iehova ae Atuau, I rangi n uarereke ao I aki ataa aron te kairiri. Ngaia are anganai te rabakau bwa I aonga n tautaekania am aomata n te aro ae riai.’
E kukurei Iehova n ana bubutii Toromon, mangaia are E taku: ‘Ibukina bwa ko tangira te rabakau ao ko aki bubutii ibukin abwabwakin maium ke te kaubwai, ao N na anganiko te rabakau ae akea kabotauana i buakoia aomata aika maiu. Ao N na anganiko naba baike ko aki tuatua are te kaubwai ma te karineaki.’
Tabeua te tai imwina ao a kawara Toromon uoman aine ma aia kangaanga ae matoatoa iangoana. E kabwarabwara temanna mai buakoia ni kangai: ‘Ti uaia ni maeka n te auti ae tii teuana, ngai ma te aine aei. I bungia natiu te mwaane ao uabong imwina ao e a manga bungia natina te mwaane neiei. N te tairiki teuana ao e mate natina. Ma ngke I tabe ni matu, ao e kawenea natina are e mate i rarikiu ao e anaa natiu. Ngke I a uti ma n nora te merimeri ao bon tiaki natiu are i rarikiu.’
E a manga taku te aine are temanna: ‘Tiaki! Bwa bon natiu ae maiu, ao ngaia natina are e mate!’ E kaeka te moan aine ao e taku: ‘Tiaki! Bwa bon natim are e mate, ao ngai natiu ae maiu!’ Aio aroia aine aikai ni kauntaeka. Tera ngkanne ae e nang karaoia Toromon?
E tua uotakin te kabaang ao e taku: ‘Bwenaua te merimeri anne, ao angania aine akanne natia kaka te iterana.’
E takarua are bon te tina raoi ni kangai: ‘Taiaoka tai tiringa te merimeri. Angan neienne!’ Ma e taku te aine are temanna: ‘Tai anganira ni kauoman ma bwenauaia.’
N tokina ao e a taku Toromon: ‘Tai tiringa te merimeri! Angan te aine are te moan bwa boni ngaia raoi te tina.’ E ataa aei Toromon ibukina bwa e rangi n tangira te nati are bon te tina n te aro are e a kukurei n angan neiere raona bwa e aonga n aki kamateaki te merimeri. Ngke a ongo aomata aron Toromon ni katoka te kangaanga, ao a rangi ni kukurei ngkai e a reke aia uea ae rabakau.
I nanon ana tai Toromon n tautaeka, ao e kakabwaiaia aomata te Atua ni katamaroaa te tano ibukin te ununiki, ao a maiu raoi uita, baare, kureebe, biiku ao amwarake riki aika kaokoro. A bwabwairaraoi aomata ao a maeka n auti aika raraoi. A koro rawatan baika raraoi ibukia aomata ni kabane.