KARAKI 64

E Katea Te Tembora Toromon

IMWAIN maten Tawita ao e angan Toromon taamnein aroni katean ana tembora Iehova. N ana kaaua n ririki Toromon n uea, ao e a moana katean te tembora. E kabanea itua ao te iterana te ririki katiaana. A buoka katean te tembora mwaane aika tebubua tabun tengaa mwaitiia, ao e rangi ni korakora naba te mwane ae kabaneaki i aon te kateitei. E riki aei ibukina bwa e rangi ni bati te koora ma te tirewa ae e kabonganaki.

Iai ruu aika uoua aika kakawaki n te tembora, n aron naba are n te umwa-n-rianna ae tabu. Ma a bubura riki aikai, bwa uoua te tai okiokin buburan ruu ake n te umwa-n-rianna. E katuka te ati ni berita Toromon n ruun te tembora teuana ae mena i kabikabi riki, ao a katukaki bwaai tabeua ake a kawakinaki ngkoa n ruun te umwa-n-rianna ae tabu, n te ruu are teuana.

Ngke e a tia te tembora, ao e a karaoaki te bukamaru ae bubura. E katorobubua Toromon i matan te tembora ao e tataro, n aron ae ko noria n te taamnei. E taku Toromon nakon Iehova: ‘E aki kona ni kamwaneauako karawa ae buburakaei, ao ai karako ra riki mwaneauam n te tembora aei. Ma e ngae n anne Atuau, I butiiko bwa ko na ongo n aia tataro am aomata ngkana a tataro n tan nakon te tabo aei.’

Ngke e a toki ana tataro Toromon, ao e a bwaka te ai mai karawa. E kabueka te karea are te man are e a tia ni karaoaki. E kaonaki naba te tembora n te oota mairoun Iehova. E kaotaki n aei bwa e kakauongo Iehova, ao e kukurei n ana tataro Toromon ao e kukurei naba n te tembora. E a riki ngkai te tembora bwa nneia aomata n taromauria Iehova, n onea mwin te umwa-n-rianna ae tabu.

E tautaeka Toromon ma te wanawana i nanon te tai ae maan, ao a kukurei aomata iai. Ma e mare Toromon ma aine aika bati man aaba tabeua ake a aki taromauria Iehova. Ko nora temanna mai buakoia ane e taromauria te bouannanti anne? N tokina ao e a kairarangaki Toromon irouia buuna, bwa e na taromauriia atua ake tabeua. Ko ataia bwa tera ae e riki ngke e karaoa aei Toromon? E a toki ana akoi. E a iowawa, ao a aikoa kukurei aomata.

E un Iehova iroun Toromon n te baei, ao e tuangnga ni kangai: ‘N na anaa te tautaeka mai iroum, ao N na angan te aomata temanna. Ma N na aki karaoa aei n am tai ni maiu, ma n ana tai n uea natim. Ma N na aki anaia aomata ni kabane mai aan ana tautaeka natim.’ Ti na noria bwa e kanga n riki aei.

1 Rongorongo 28:​9-21; 29:​1-9; 1 Uea 5:​1-18; 2 Rongorongo 6:​12-42; 7:​1-5; 1 Uea 11:​9-13.