KARAKI 74
Te Mwaane Ae Aki Mamaaku
NORIIA aomata aika a bwainingarea te rorobuaka n ataei aei. Ko kinaa teuaei? Bon Ieremia. Bon ana burabeti te Atua ae rangi ni kakannato.
Imwin moanakin kamaunakin taiani bouannanti iroun te Uea are Iotia n te aba ni kabutaa, ao e a tuangaki Ieremia iroun Iehova bwa e na riki bwa Ana burabeti. Ma e ngae n anne, e taku n ana iango Ieremia bwa e rangi n uarereke ni kaineti ma te riki ni burabeti. Ma e taku Iehova bwa e na boni buokia.
E tuangia I-Iteraera Ieremia bwa a na katoka karaoan ae buakaka. E taku: ‘Taian atua ake a tataromauri aomata ma natannaomata nako, bon atua ni kewe.’ Ma a bati tibun Iteraera ake a kan taromaurii riki bouannanti nakon taromaurian Iehova ae te Atua ae koaua. Ngke e tuangia aomata Ieremia taekan are e nang katuuaia te Atua ibukin buakakaia, ao e a reke bwa kangareaia.
Ngke a a bwakanako ririki tabeua ao akea bwa e a mate Iotia, ao tenua namwakaina imwina ao e a kaueaki natina are Ieoiakim. E bon teimatoa naba Ieremia n tuangia aomata ae kangai: ‘E na kamaunaki Ierutarem ngkana kam aki bitii aromi aika bubuaka.’ E tauaki Ieremia irouia ibonga ao a takarua ni kangai: ‘Ko riai ni kamateaki ibukin taekinan baikai.’ Imwina ao a tuangia tokan Iteraera ni kangai: ‘E riai ni kamateaki Ieremia, ibukina bwa e a tia n taetae n aki akaka ibukin ara kaawa.’
Tera ae e nang karaoia ngkai Ieremia? E bon aki maaku! E taku nakoia: ‘E kanakoai Iehova bwa N na tuangingkami baikai. Ngkana kam aki bitii aromi aika bubuaka, ao e na kamaunaki Ierutarem iroun Iehova. Ma kakoauaa aei: Ngkana kam tiringai, ao kam na aranaki iai bwa kam tiringa te aomata ae akea ana bure.’
A kariaia tooka are e na aki tiringaki Ieremia, ma a aki bitii aroia tibun Iteraera aika bubuaka. Imwina riki, ao e a roko uean Baburon are Nebukaneta, bwa e na buakana Ierutarem. N tokina ao e a karikiia tibun Iteraera Nebukaneta bwa ana toro. E kairiia nako ngaa ma ngaa aomata nako Baburon. Iangoia bwa e na tera arom ngkana ko a uotaki nako man mwengam irouia ianena, nakon te aba ae ko aki ataa tabuaiakana!
Ieremia 1:1-8; 10:1-5; 26:1-16; 2 Uea 24:1-17.