Reirei 5

Raoraon te Atua A na Maeka n te Baretaiti

Te Baretaiti e na bon tiaki aron te aonnaba ae ti maekanna ngkai. Te Atua e aki tangira te aonnaba bwa e na kaonaki n te kangaanga ma te nanokawaki, te maraki, ao te karawawataaki. N te tai ae na roko, te Atua e na boni karaoa te aonnaba aei bwa te baretaiti. E na tera aron taraakin te Baretaiti? Ti na nora ana taeka te Baibara:

Aomata aika raoiroi. Te Baretaiti e na riki bwa mweengaia raoraon te Atua. A na karaoi mwakuri aika raraoi ibon ibukia n tatabemania nako. A na maeka ma te aroaro ae eti n aron are e kaantaningaia te Atua.​—Taeka N Rabakau 2:21.

E na bati te amwarake. N te Baretaiti, e nang akea te baki. E taku te Baibara: “Ane e na bati te uita [ke te amwarake] i aon te aba.”​—Taian Areru 72:16.

Auti aika raraoi ao te mwakuri ae kakukurei. N te Baretaiti i aon te aonnaba, a na bane n toa utu ma mweengaia. A na bane aomata ni karaoa te mwakuri ae e na karekea te kakukurei ni koaua.​—Itaia 65:21-23.

Te rau ae taabangaki n te aonnaba. Akea aomata aika a na manga un ao ni mate n te buaka. E taku ana Taeka te Atua: “[Te Atua] E katoki buaka.”​—Taian Areru 46:8, 9.

Te marurung raoi. E berita te Baibara bwa: “Ane maeka [n te Baretaiti] e na aki kangai, I aoraki.” (Itaia 33:24) N te tai naba anne, akea ae e na manga mwauku, ke ni mataki, ke ni bonotaninga, ke ni bae newena.​—Itaia 35:5, 6.

Tokin te maraki, te nanokawaki, ao te mate. E taku ana Taeka te Atua: “Ao e na akea riki te mate, ao e na akea naba te nanokawaki, ma te tang ma te maraki: ba a mauna nako bwaai rimoa.”​—Te Kaotioti 21:4.

Aomata aika buakaka, a nang akea. E berita Iehova bwa: “A na teweaki nako akana buakaka mai aon te aba, ao a na taekaki taani bure mai nanona.”​—Taeka N Rabakau 2:22.

Aomata a nang itangitangiri ao n ikarinerine imarenaia. E na aki manga noraki te kaetieti ae ribuaka, te karawawataaki, te mataai ni kanibwaibwai, ao te kairiribai. Aomata a nang inanoi ao a na maeka n te aro ae boraoi ma ana kawai te Atua ae e eti.​—Itaia 26:9.