Mwakoro Tebwi Ma Ruaiua
Teimatoa n Tataekina Ana Taeka te Atua n Akea te Maaku
1. (a) Tera te rongorongo ae raoiroi ae tataekinaki irouia taan rimwin Iesu, ao tera aron butimwaeana irouia I-Iutaia tabeman? (b) Baikara titiraki aika ti kona n iaiangoi ngkai?
E A KAANI KORO ngkai 2,000 te ririki mai mwin te tai are e kabiraki iai Iesu Kristo ae Natin te Atua bwa te Uea ae e na tautaekana te aonnaba ni kabuta. E kaungaki kamatean Iesu irouia taan ribaa ana Aro, ma e kautia Iehova man te mate. E a kona ngkai n reke te maiu are aki toki rinanon Iesu. Ma a boni bwainikirinaki taan rimwin Iesu ngke a tataekina te rongorongo ae raoiroi. Tabeman mai buakoia a karabutinaki, ao a kataereaki ma n tuangaki bwa a nang aki manga tataekina Iesu. (Mwakuri 4:1-3, 17; 5:17, 18, 40) Tera ngkanne ae a na karaoia? Tera ae ko na karaoia ngkana tao e a riki naba anne nakoim? Ko kona n teimatoa n tataekina te rongorongo n akea te maaku?
2. (a) Tera te rongorongo ae moan te raoiroi ae riai ni katanoataki n ara tai aei? (b) Antai tabena tataekinan te rongorongo ae raoiroi?
2 N 1914, e katokaaki i aon ana kaintokanuea i karawa Iesu Kristo, bwa ngaia te Uea n ana Tautaeka te Atua, ae na tautaeka ‘i buakoia ana kairiribai.’ (Taian Areru 110:2) Imwin anne, a karenakoaki nakon te aonnaba Tatan ma ana koraki n taimonio. (Te Kaotioti 12:1-5, 7-12) A moanaki iai kabanea ni bongin te waaki ae buakaka ae ngkai. Ngkana a koro boong aikai, te Atua e na kamauna ana waaki Tatan ni kabane. (Taniera 2:44; Mataio 24:21) Aomata aika kamaiuaki iai a na kona ni maiu n aki toki n te aonnaba ae e na manga karaoaki bwa te baretaiti. Ngkana ko a tia ni butimwaea te rongorongo ae raoiroi aei, ko na bae ni kan tibwaia nakoia aomata tabeman. (Mataio 24:14) Ma tera aron butimwaeana irouia aomata ae ko riai ni kaantaningaia?
3. (a) Tera aron butimwaean rongorongon te Tautaeka n Uea irouia aomata? (b) Tera te titiraki ae ti riai n rinanona?
3 Tabeman a kona ni butimwaea euangkerion te Tautaeka n Uea ae ko tataekinna, ma angiia a na aki bwerengaki iai. (Mataio 24:37-39) Tabeman a kona ni kakanikoko ke ni kairiribai. E taku Iesu bwa a kona naba ni kaaitarako am koraki iai. (Ruka 21:16-19) A kona naba ni kairiribai kaain am tabo ni mwakuri ke am kuura n reirei. N aaba tabeua, e bon katabuakaki aia waaki Ana Tia Kakoaua Iehova iroun te tautaeka. Ngkana e riki anne i abam, ko kona n teimatoa n tataekina ana Taeka te Atua n akea te maaku, ma n “teimatoa n te onimaki”?—1 I-Korinto 16:13.
Ti Aki Onimakina Oin Korakorara
4. (a) Tera ae ti riai ni karaoia bwa ti aonga ni kakaonimaki ni beku iroun te Atua? (b) Bukin tera ngkai a rangi ni kakawaki bobotaki ni Kristian?
4 Aomata aika kakaonimaki ni beku iroun Iehova a kabonganai bwaai n ibuobuoki ake a a tia n anganaki ibukin buokaia n te itera n taamnei. Teuana mai buakon bwaai aikai bon bobotaki nako n te ekaretia. Te Baibara e kaungaira bwa ti na aki kaakeai botaki aikai. (Ebera 10:23-25) Taani Kakoaua ibukin Iehova aika kakaonimaki a boni kakorakoraia ni kaakaei botaki ma raoia n taromauri. E na kabuburaki riki ara atatai i aon te Baibara ni botaki aikai. E rikirake naba iai otara i aon koaua aika tanoata taekaia, ao ti a rabakau riki ni kakamanenai. Ti a kaan riki iai ma tarira ni Kristian ngkai ti katiteuanaki n taromauri ma ngaiia, ao ti a kakorakoraki naba bwa ti na kakaraoa nanon te Atua. Taamnein Iehova e kairira rinanon te ekaretia, ao e mena naba Iesu i buakora rinanon te taamnei aei.—Mataio 18:20; Te Kaotioti 3:6.
5. Tera aron karaoan aia bobotaki Ana Tia Kakoaua Iehova n aaba ake e katabuakaki aia waaki iai?
5 Ko boni kakaonimaki ni kaakaei botaki nako, ma ni kakamanenai reirei aika maroroakinaki iai? N taai tabetai ngkana a katabuaki ni waaki Ana Tia Kakoaua Iehova n aaba tabeua, a bobotaki ni kurubu aika uarereke ni mwengaia aomata. A kona ni bibitaki taabo ao taai ake a kakaraoaki botaki iai, ao a kona n aki angaraoi kioina ngkai botaki tabeua, a a tibwa karaoaki ngkana e a bwakanako te tai n te tairiki. E ngae ngkana e aki angaraoi irouia ke e karuanikai rokoia iai, ma taari-mwaane ao taari-aine aika kakaonimaki a kakorakoraia n roko ni botaki ni kabane.
6. Tera arora ni kaotia bwa ti onimakina Iehova, ao tera buokara ae e na reke iai ni kaineti ma tataekinan te rongorongo n akea te maaku?
6 E karikirakeaki riki onimakinan Iehova ngkana ti ataa kainnanoakin te ibuobuoki mairouna ao ti kakawaria rinanon te tataro ni katoa tai. Ko kakaraoa anne? E aki toki n tatataro Iesu ngke e karaoa ana mwakuri ni minita i aon te aba. (Ruka 3:21; 6:12, 13; 22:39-44) Ao n te tairiki are imwain taurakina n te kai, e kaungai nanoia taan rimwina ni kangai: “Taratara ao tataro, ba kam na aki konaki n te kaririaki.” (Mareko 14:38, BK) A kona ni moanna ni bwara nanora n ara mwakuri ni minita ngkana ti kakaitiboo ma aomata aika aki bwerengaki n rongorongon te Tautaeka n Uea. Ti kona n taku bwa ti nang katoka tataekinan te rongorongo ngkana a kakanikoira aomata ke a bwainikirinira. Ma ti na bon tokanikai iai ngkana ti kakorakoraira n tatataro ni bubutii bwa taamnein te Atua e na buokira n tataekina te rongorongo n akea te maaku.—Ruka 11:13; I-Ebeto 6:18-20.
Taan Tataekina te Rongorongo Aika Aki-maaku
7. (a) Bukin tera bwa e kakaongora rongorongon te boki ae Mwakuri iroura? (b) Kaekai titiraki aika mena imwin te barakirabe aei, ma ni katereterea aron buokara ae reke mai iai.
7 E rangi ni kakaongora iroura rongorongon te boki ae Mwakuri. E kaongoira bwa a kanga abotoro ao taan rimwin Kristo rimoa, aika aomata naba n ai arora, n tokanikai i aon bwaai n tutuki, ma ni kakaonimaki iroun Iehova n tataekina te rongorongo n akea te maaku. Ti na kabonganai titiraki ao kiibu aika kaotaki imwin aei, n neneri rongorongo tabeua mai iai. Ngkana ti karaoa anne, ao iangoia bwa ko na kanga ni buokaki man bwaai aika ko wareki.
E bubura aia reirei abotoro? Bon aomata aika babanga ni maaku ngaiia, n aki ongeia bwa tera ae riki nakoia? (Ioane 18:17, 25-27; 20:19; Mwakuri 4:13)
Tera ae buoka Betero bwa e na taetae n akea te maaku, nakoia kaain te kaboowi n Iutaia ake a kaburea Natin te Atua? (Mataio 10:19, 20; Mwakuri 4:8)
Tera are a karaoia abotoro i nanon wiiki ake imwain kairakiia nako matan te Tanirim? (Mwakuri 1:14; 2:1, 42)
Ngke a tuangaki abotoro irouia mataniwi bwa a na aki tataekina rongorongon Iesu, ao tera aia kaeka Betero ao Ioane? (Mwakuri 4:19, 20)
Imwin kainaaomatakia abotoro, a kakaaea buokaia mairoun antai? A tataro ni bubutii bwa e na toki bwainikirinaia, ke tera ae a tataroia? (Mwakuri 4:24-31)
E kanga Iehova ni buokia abotoro ngke a kataia, taani kairiribai, n totokoia man tataekinan te rongorongo? (Mwakuri 5:17-20)
A kanga ni kaotia abotoro bwa a ataa bukin kainaaomatakiia? (Mwakuri 5:21, 41, 42)
Tera ae a teimatoa ni kakaraoia taan rimwin Kristo ngke a kamaenakoaki ngkoa n te bwainikirinaki? (Mwakuri 8:3, 4; 11:19-21)
8. Baikara uaa aika raraoi aika nako man aia mwakuri ni minita taan rimwin Kristo rimoa, ao tera irekerekera iai?
8 E bon aki matebuaka tataekinan te rongorongo ae raoiroi irouia. Tao 3,000 mwaitiia taan rimwin Kristo ake a babetitoaki ni Bentekota 33 C.E. “Ao a ririkirake maitia te koraki, ake mane ma aine, ake a riki ba raoia ni kakoaua te Uea.” (Mwakuri 2:4; 14:4; 5:14, BK) Imwin tabeua te tai, temanna ae rangi ni bwabwainikirinia ngkoa ana aomata te Atua, ae Tauro mai Tareto, e a manga riki naba bwa te Kristian, ao e a tataekina te koaua n akea te maaku. E a bon riki Tauro bwa te abotoro Bauro. (I-Karatia 1:22-24) E bon tuai n toki te mwakuri are moan waakinaki n te moan tienture. E a kakorakoraki riki karaoana i nanoni boong aika kaitira aikai, ao e a roko n taabo nako. Ti a kakabwaiaki naba ngkai ti kona ni buoka te mwakuri aei, ao ngkana ti karaoia, ao ti na buokaki iai n aia katoto taani kaotioti ake a kakaonimaki ake a maiu imwaira.
9. (a) E kakareketai n te tai raa Bauro ibukin tataekinan te rongorongo? (b) Baikara aaro aika ko kakabonganai ibukin tataekinan rongorongon te Tautaeka n Uea nakoia aomata?
9 Tera ae e karaoia Bauro ngke e a ataa te koaua ibukin Iesu Kristo? “Ao e teirake naba ni kaotioti . . . ba bon Natin te Atua Iesu.” (Mwakuri 9:20, BK) E kaitaua te Atua ibukin akoana irouna, ao e ataia bwa aomata ni kabaneia a kainnanoa naba te rongorongo ae raoiroi are e a tia ngaia n anganaki. Bon te I-Iutaia Bauro, ao e ira katein rimoa ngke e nanako n taian tinakoka n tataekina te rongorongo iai. E tataekina naba te rongorongo man te auti teuana nakon te auti teuana, ao e mamaroro ma aomata n taabo ni boobwai. E anga naba nanona bwa e na tataekina te euangkerio n aaba ake e tuai n roko te rongorongo iai.—Mwakuri 17:17; 20:20; I-Rom 15:23, 24.
10. (a) E a kanga Bauro ni kaotia bwa e bwaina te wanawana n te tai are e tataekina te rongorongo iai n akea te maaku? (b) Ti na kanga ni katotonga aroaron Bauro ngkana ti kaotioti nakoia ara koraki, raora ni mwakuri, ke raora n reirei?
10 E aki maaku Bauro n tataekina te rongorongo, ma e bwaina te wanawana, n aron ae ti riai naba ni karaoia. E kabotoa ana anainano nakoia I-Iutaia i aon ana berita te Atua nakoia aia bakatibu, ma e mamaroro ma I-Erene i aon bwaai ake a bon taneiai iai. N taai tabetai e kaotioti nakoia aomata ni karakina aron reken te koaua irouna. E taku: “Ao I karaoi bwaai ni kabane i bukin te euangkerio, ba N na buokanibwai ma ngkami ni baina mwina.”—1 I-Korinto 9:20-23; Mwakuri 22:3-21.
11. (a) Tera are e karaoia Bauro, bwa e aonga n aki kauniia taani kairiribai? (b) Tao n ningai te tai ae raoiroi ae ti na katotonga iai aron Bauro, ao ti na kanga ni karaoia? (c) E reke mai ia te korakora are e buokira n tataekina te rongorongo n akea te maaku?
11 Ngkana e korakora te kairiribai n te aono teuana, e a manga mwaing Bauro nakon te tabo teuana n tataekina te rongorongo iai i nanon tabeua te tai. E karaoa anne ibukina bwa e kani kararoaa te un. (Mwakuri 14:5-7; 18:5-7; I-Rom 12:18) Ma e bon aki maamaa n te euangkerio. (I-Rom 1:16) E ngae ngke e aki kukurei Bauro n te iowawa ao te tiritiri are karaoaki nakoina irouia taani kairiribai, ma e bon “ninikoria iroun Atuara,” bwa e na teimatoa n tataekina te rongorongo. E kangai: “Ma E tei te Uea i rarikiu, ao E kakorakoraai; ba e na kakororaoaki taekinan te euangkerio i rou.” (1 I-Tetaronike 2:2; 2 Timoteo 4:17) Atun te ekaretia ni Kristian ae Iesu e teimatoa ni kanakoa te korakora ae ti kainnanoia bwa ti aonga ni kakaraoa te mwakuri are e taetae ni burabetina karaoana n taai aikai.—Mareko 13:10.
12. Tera ae kaotiota te aki-mamaaku irouia Kristian, ao e aanaki i aon tera?
12 A mwaiti bukina ae ti riai n tataekina iai ana taeka te Atua n akea te maaku, n aron are e karaoia Iesu ao ana toro te Atua aika kakaonimaki ake a maiu n te moan tienture. Tiaki nanona bwa ti na kaakeai bongaia aomata iai ke ni kairoroia ngkana a aki kan ongora. Ma ti na aki kabwaraa nanora n aia aki-bwerengaki aomata; ao ti na aki maaku naba n taetae ngkana ti ribaaki. N aron are e karaoia Iesu, ti tataekinna bwa tii ana Tautaeka n Uea te Atua ae e riai n tautaekana te aonnaba. Ti aki nanououa n taetae, ibukina bwa ti tei ibukin Iehova are te tia Tautaeka i aon bwaai ni kabane, ao te rongorongo ae ti taekinna bon tiaki mairoura ma boni mairouna. Bukina ae kakawaki riki ae ti karaoiroa iai Iehova, bon tangirana iroura.—I-Biribi 1:27, 28; 1 I-Tetaronike 2:13.
Te Maroro Ibukin te Kauring
• Bukin tera bwa e kakawaki tataekinan rongorongon te Tautaeka n Uea nakoia aomata ni kabane, ma tera aron butimwaeana irouia aomata ae ti riai ni kaantaningaia?
• Ti na kanga ni kaotia bwa ti aki onimakina oin korakorara n ara beku iroun Iehova?
• Baikara reirei aika kakawaki ake a reke man te boki ae Mwakuri?
[Taamnei n iteraniba 173]
N aron are karaoaki rimoa, ana toro Iehova ni boong aikai a tataekina ana taeka te Atua n akea te maaku