“Taekina Ana Taeka Te Atua Ma Te Ninikoria”

“A kaonaki n te taamnei ae raoiroi . . . ao a taekina ana taeka te Atua ma te ninikoria.”​—MWAKURI 4:31.

1, 2. E aera ngkai ti riai ni kakorakoraira bwa ti na mwaatai n ara mwakuri ni minita?

E tuangia taan rimwina Iesu tenibong imwaini matena ni kangai: “E na tataekinaki te rongorongo ae raoiroi aei ae taekan te tautaeka n uea, n te aonnaba ni kabutaa bwa te bwai ni kaotioti nakoia botannaomata ni kabaneia, ao ngkanne e a roko naba te toki.” Imwain ae e rierake nako karawa Iesu are e a tia ni kautaki, e mwiokoiia taan rimwina bwa a na ‘karekeia taan rimwina mai buakoia botannaomata nako n reireinia bwa a na kakairi ni bwaai ni kabane ake e tua nakoia.’ E berita naba bwa e na memena irouia “ni boongi ni kabane ni karokoa tain tokin te waaki ae ngkai i aon te aba.”​—Mataio 24:14; 26:1, 2; 28:19, 20.

² Ngkai Ana Tia Kakoaua Iehova ngaira, ti riai ni katoatai n uataboa te mwakuri are e moanaki n te moan tienture. Te mwakuri ni kakamaiu ae tataekinan rongorongon te Tautaeka n Uea ao karekeaia taan rimwini Kristo, bon tii ngaia te mwakuri ae te kabanea ni kakawaki. Ai kakawakira ngkanne, bwa ti na rangi ni mwaatai n ara mwakuri ni minita! N te kaongora aei, ti na nora iai buokara ni kona n taetae ma te ninikoria n ara mwakuri ni minita, ni kairirara rinanon te taamnei ae raoiroi. E na kaotaki ni kaongora aika uoua aika imwina, aron taamnein Iehova ni kona ni kairira bwa ti na mwaatai n angareirei ao n uarongorongo n taai nako.

Ti Kainnanoa te Ninikoria

3. E aera ngkai e kainnanoaki te ninikoria n uataboan tataekinan te Tautaeka n Uea?

³ E rangi n rine mwiokoara ae e anganira te Atua ae tataekinan te Tautaeka n Uea. Ma n tabetai, e kona n rangi ni kangaanga. E ngae ngkai a kai butimwaea rongorongon Ana Tautaeka n Uea te Atua tabeman, ma a mwaiti ake a noraki bwa titeboo maiuia ma ake a maiu n ana bong Noa. E taku Iesu: A “aki muti ni karokoa rokon te ieka n uotiia nako ni kabane.” (Mataio 24:38, 39) Iai naba ake a kakanikoira ke ni kaaitaraira. (2 Betero 3:3) Tao ti kona ni kaitaraaki naba irouia taan tautaeka, raora n reirei, raora ni mwakuri, ke ara utu ni kaan. Irarikin te kakaaitara aei, ti riai naba ni buakani mamaarara n aron te maamaa ao maakakin te ribaaki. A rangi ni mwaitikurikuri baika a kona ni karikii kangaanga ni kaineti ma kaotiotan ‘te aki maaku n taetaenikawai’ ao n taekinan ana taeka te Atua ma te “ninikoria.” (I-Ebeto 6:19, 20) E kainnanoaki te ninikoria ngkana ti na botumwaaka n taekina ana taeka te Atua. Tera ae kona ni buokira bwa ti na ninikoria?

4. (a) Tera te ninikoria? (b) E kanga n ninikoria n taetae nakoia I-Tetaronike te abotoro Bauro?

⁴ Te taetae ni Kuriiti ae rairaki bwa “ninikoria” e nanonaki iai “te rabakau ni kakarabakau, kainetan raoi te bwai ae taekinaki ao kamatataana.” E kaotaki n te taeka anne te iango ae “te ninikoria, onimakinana, . . . te aki mamaaku.” E aki nanonaki n te ninikoria bwa ko nang aki mutiakin aia namakin aomata ke ko na taetae ni kamatauninga. (I-Korote 4:6) E ngae ngkai ti ninikoria, ma ti boni kan raoi naba ma aomata nako. (I-Rom 12:18) Irarikina, ngkana ti tataekina te rongorongo ae raoiroi ibukin Ana Tautaeka n Uea te Atua, ti riai n taetae ma te ninikoria ao te bwanaa n akoi bwa ti a aonga n aki kaunia ake ti uarongorongo nakoia. Ni koauana, ngkana ti kani karikirakea te ninikoria n te aro ae riai, ti riai ni karikirakei aroaro riki tabeua ake e kainnanoaki iai te kakorakora ae bati. E aki reke te aeka n ninikoria aei man oini korakorara ke onimakinara i bon iroura. A a kanga naba te abotoro Bauro ao raona ni “kaninikoriaaki” n taetae nakoia I-Tetaronike imwini ‘kammarakaia ma bwainikirinaia i Biribi’? E korea ae kangai Bauro: “Iroun Atuara.” (Wareka 1 I-Tetaronike 2:2.) E kona ni katoki maakura Iehova ae te Atua ao n anganira te ninikoria ae aekan anne.

5. E kanga Iehova n angani Betero ao Ioane ao taan rimwini Kristo ake tabeman riki te ninikoria?

⁵ Ngke a kaitaraaki abotoro aika Betero ao Ioane irouia “taani kairiri [i aoia aomata] ma unimwaane ao taani koroboki” ao a taku: “Ngkana e eti i matan te Atua bwa ti na ongo riki iroumi nakon te Atua, ao motikia i bon iroumi. Ma ti aki kona ngaira, ni katoka tataekinani baike ti nori ma n ongo.” N oneani mwin are a na tataro nakon te Atua bwa e na toki bwainikirinaia, a tataro ni bubutii ma raoia n onimaki ni kangai: “Iehova, tarai aia taeka ni kakamaaku, ao angania am toro te teimatoa n taekina am taeka ma te ninikoria ae bati.” (Mwakuri 4:5, 19, 20, 29) Tera aron Iehova ni kaekaa aia bubutii? (Wareka Mwakuri 4:31.) E buokiia Iehova ni kaninikoriaia rinanon taamneina. E kona ni karaoa naba anne nakoira te Atua rinanon taamneina. Ti na kanga ni karekea taamnein te Atua ao ni kairiraki iai n ara mwakuri ni minita?

Aroni Karikirakean te Ninikoria

6, 7. Tera te kawai ae kaineti raoi ma karekean te taamnei ae raoiroi mairoun te Atua? Taekini katoto.

⁶ Te kawai ae kaineti raoi ma karekean te taamnei ae raoiroi are mairoun te Atua, boni mani butiiana. E tua ae kangai Iesu nakoia taan ongora: “E ngae ngke kam buakaka ma kam ataa te angania natimi bwaintangira aika raraoi, ao ai batira riki ngkanne nanon te Tama are i karawa ni kan anga te taamnei ae raoiroi nakoia akana butiia!” (Ruka 11:13) Ni koauana, ti riai n tataro ni bubutii te taamnei ae raoiroi n taai nako. Ngkana e taonira te maaku ni karaoan iteran te mwakuri ni minita tabeua, tao n uarongorongo i rarikin te kawai, te uarongorongo n te tai ae aki baireaki, ke mwakurian taabo ni bitineti, ti kona n tataro nakon Iehova bwa e na anganira taamneina ao ni butiia bwa e na kaninikoriaira n aron ae ti kainnanoia.​—1 I-Tetaronike 5:17.

⁷ E karaoa anne te aine ae te Kristian ae Rosa.a N te bongina, n ana tabo ni mwakuri Rosa, ao e wareka te ribooti man te reirei teuana raona n tia reirei n aroni bwainikirinaia ataei. E rangi n tabeaianga te tia reirei aei n te baere warekia ao e kanenea bwanaana ni kangai: “Ai tera ae nang riki nakon te aonnaba aei?” E bon aki kani katibanakoa reken ana tai n uarongorongo aei Rosa. Tera are e karaoia bwa e na ninikoria ni moana ana maroro? E taku: “I tataro nakon Iehova ao I butiia taamneina bwa e na buokai.” E a reke iai angana n uarongorongo ae nakoraoi, ao e boraraoi ibukini manga tomaan ana maroro aei. Iangoa naba rongorongon te ataeinnaine ae nimaua ana ririki ae Milane, ae maeka i New York City. E taku neiei: “Imwain nakou n reirei, I tatataro nakon Iehova ma tinau n taai nako.” Tera ae a tatataroia? A tataro bwa e na ninikoria Milane n tei ibukin ana koaua ao ni kona n taetae ibukin Atuana! E taku tinani Milane: “E reke buokan Milane n aei bwa e ninikoria ni kabwarabwaraa ana koaua ibukin rekenibong ao boong ni motirawa ao n rarawa n irii ngkana a karaoaki.” E kaotaki ni katoto aikai bwa e boni kona ni kaninikoriaira te tataro.

8. Tera reireiara ae kona n reke mairoun te burabeti ae Ieremia ibukin te ninikoria?

⁸ Iaiangoa naba te baere e kaninikoriaa te burabeti are Ieremia. Ngke e rineia Iehova bwa e na riki bwa aia burabeti botannaomata, ao e kaeka ni kangai: “Noria, I babanga taetae: ba te tei ngai.” (Ieremia 1:4-6, BG) Ma imwin tabeua te tai, e a rikirake n rangi ni botumwaaka Ieremia ao ni bwanaa matoa n ana tai n uarongorongo n te aro are a bati ake a a iangoia bwa te aomata ae aki toki n tataekina tii te kabuanibwai. (Ieremia 38:4) E ninikoria n tataekina ana motikitaeka Iehova i nanon 65 tabun te ririki. E a rangi ni kinaaki teuaei i Iteraera n akeani maakuna ao ninikoriana n uarongorongo. Ibukin anne, tao 600 tabun te ririki imwina ao ngke e taetae ma te ninikoria Iesu, a a taku tabeman bwa e a manga maiu Ieremia. (Mataio 16:13, 14) E a kanga naba n tokanikai i aoni mamaana te burabeti ae Ieremia are e rawa ngkoa n te moantai? E taku: “E roko iai i nanou te bwai [ae ana taeka te Atua] ae kanga te ai ae ura ae kainaki i nanon riu, ao I a kua n taotaona nanou.” (Ieremia 20:9, BG) Eng, e roko mwaakan ana taeka Iehova i aon Ieremia ao e kaumakia bwa e na taetae.

9. E aera ngkai e kona n rotiira ana taeka te Atua n aron are e rota Ieremia?

⁹ E korea ae kangai te abotoro Bauro n ana reta nakoia I-Ebera: “E maiu ana taeka te Atua ao e mwaaka ao e kakang riki nakoni kabaang aika uaitera wiia, ao e ewaewa ni kaota kaokoron taraan te aomata ma are i nanona, ao taian toma n ri ma kanoaia, ao e kona n atai baike e iangoi te nano ma baike e kantaningai.” (Ebera 4:12) E kona n rotiira ana rongorongo ke ana taeka te Atua n aron are e rota Ieremia. Uringnga bwa e ngae ngke a kamanenaaki mwaane ibukini korean te Baibara, ma kanoana bon tiaki rongorongoni wanawanaia aomata aika bobotakaki, bwa e boni kairaki koreana iroun te Atua. Ti wareka ae kangai n 2 Betero 1:21: “Akea te taetae ni burabeti ae reke mai nanon te aomata, ma a taetae aomata mairoun te Atua ngke a kairaki n te taamnei ae raoiroi.” Ngkana ti kabatiai ara tai n ukeuke n reirei n te Baibara i bon iroura n te aro ae uaana, a na rikirake iai ni kaonaki ara iango n te rongorongo ae kairaki koreana rinanon te taamnei ae raoiroi. (Wareka 1 I-Korinto 2:10.) E noraki koauan te rongorongo anne bwa “kanga te ai ae ura” i nanora, n te aro are ti a aki kona n taon nanora man tataekinana.

10, 11. (a) Tera arora ae riai ni karaoan ara ukeuke n reirei n te Baibara ngkana ti kani kaninikoriaaki n taetae? (b) Taekina te mwaneka teuana ae ko iangoia bwa ko na karaoia ibukini kanakoraoan riki arom n ukeuke n reirei n te Baibara i bon iroum.

¹⁰ Ngkana ti tangiria bwa e na korakora rotakira man ara ukeuke n reirei n te Baibara, e riai ni karaoaki n te aro ae e na rotaki raoi nanora n te rongorongo are iai. N te katoto, e anganaki te burabeti ae Etekiera te miitara are e tuangaki iai bwa e na kana te nira ni boki ae iai i nanona te rongorongo ae matoatoa ae na taekinaki nakoia aomata aika taningamatoa. E riai n reiakina raoi te rongorongo are e tataekinna Etekiera ao ni maiuakinna. Ni karaoan aei, e nang kakukurei iai te mwioko ae tataekinan te rongorongo kaanga ai aroni kangkangin ana karewe te manibeeru.​—Wareka Etekiera 2:8–3:4, 7-9.

¹¹ Titeboo arora ngkai ma aron Etekiera ngkoa. Ni boong aikai, a bati aika a bon rawa ni kan ongoraea ae taekinaki n te Baibara. Ngkana ti na botumwaaka n tataekina ana taeka te Atua, e kakawaki bwa ti na ukeuke n reirei n te Baibara n te aro are ti a kona iai n ota ao n onimakini raoi rongorongo aika i nanona. Ti riai ni katoatai ni karaoa ara ukeuke n reirei, ma tiaki tii n taai ake ti mwaawa iai. E riai n titeboo nanora ma te tia areru are e anene ni kangai: “A na tangiraki ana taeka wiu ma iangoan nanou i matam, Iehova, ae au bwa ae rietata, ma au tia kamaiu.” (Taian Areru 19:14, BG) Ai kakawakira kabatiaan ara tai ibukini kananoan ara iango i aoni baika ti wareki, bwa a aonga n rin raoi i nanora ana koaua te Baibara! Ni koauana, ti riai ni kakorakoraira ni kanakoraoi riki arora n ukeuke n reirei i bon iroura.b

12. E aera ngkai a buokira bobotaki ni Kristian bwa ti na kairaki rinanon te taamnei ae raoiroi?

¹² Te anga teuana riki ibukini karekean te kakabwaia rinanon te taamnei ae raoiroi are mairoun Iehova, boni man ‘iaiangoami i marenami ni kaungaingkami nakon te tangira ma mwakuri aika raraoi, ao n aki kaaki aromi ni bobotaki.’ (Ebera 10:24, 25) Aaro aika raraoi ake ti a kona iai ni kairaki rinanon te taamnei ae raoiroi, boni kakorakorakira n iririi botaki ni Kristian ni katoatai, kakauongora raoi ao maiuakinani baike ti a tia n reiakin. Bwa ni koauana, e anganga te kairiri rinanon te ekaretia taamnein Iehova.​—Wareka Te Kaotioti 3:6.

Kakabwaia Aika Reke n te Ninikoria

13. Tera ae ti kona n reiakinna mani kakororaoan te mwakuri n uarongorongo irouia Kristian ake n te moan tienture?

¹³ Te taamnei ae raoiroi bon te mwaaka ae te kabanea ni korakora i aoni bwaai ni kabane ao e kona ni kakorakoraia aomata nakoni karaoan nanon Iehova. A a tia Kristian ake n te moan tienture ni kakororaoa tataekinan te rongorongo n te aro ae rangi ni korakora i aan ana kairiri te taamnei. A tataekina te rongorongo ae raoiroi “n taabo nako aika i aani karawa.” (I-Korote 1:23) Ngkana ti iaiangoia ae angia mai buakoia a “uarereke aia reirei ao a aki kakannato,” e na mataata iai bwa a kairiraki n te mwaaka ae korakora riki.​—Mwakuri 4:13.

14. Tera ae kona ni buokira bwa ti na ‘ingainga rinanon te taamnei’?

¹⁴ Ngkana ti maiuakina ae boraoi ma kairirara rinanon te taamnei ae raoiroi, ti a kaungaaki iai bwa ti na ninikoria ni waakina ara mwakuri ni minita. Ni katoataira n tataro ibukin te taamnei, taningamaraura n ukeuke n reirei n te aro ae manena raoi, kananoan ara iango i aoni baika ti wareki ao n tataroi, ao te katoatai n irii botaki ni Kristian, ti na buokaki iai bwa ti na “ingainga rinanon taamnein te Atua.” (I-Rom 12:11) Ni kaineti ma ‘temanna te I-Iutaia ae arana Aboro ae kaain Arekanria, ae te mwaane ae wikateke, are roko i Ebeto,’ e taekinaki ae kangai n te Baibara: “E ingainga nanona n te taamnei, ao e taetae ma n angareirei n taekan Iesu ma te eti.” (Mwakuri 18:24, 25) Ngkana ti ‘ingainga rinanon te taamnei,’ ti a kona iai ni kaotiota rikirakera riki n ninikoria ni kawaran te auti teuana ma teuana n te mwakuri ni minita ao ngkana ti uarongorongo n te tai ae aki baireaki.​—I-Rom 12:11.

15. Ti kanga ni kakabwaiaaki n rikiraken ninikoriara n taetae?

¹⁵ E uaana nakoira rikiraken ninikoriara n uarongorongo. A kanakoraoaki iai aroarora bwa ti a ota raoi riki ni kakawakin ao manenan ara mwakuri. E a korakora ingaingan nanora n namakinan te kimwareirei ae raka riki ngkana e a uaana ara mwakuri ni minita. Ao e a kakorakoraaki ingaingan nanora ngkai ti a ataia raoi bwa e kaumakaki te mwakuri n uarongorongo.

16. Tera arora ae riai ngkana e a kekerikaaki ingaingan nanora n te mwakuri ni minita?

¹⁶ Ma tera arora ngkana e a bua ingaingara n ara mwakuri ni minita ke e a kekerikaaki, ai tiaki aron are ti taneiai iai mai mwaina? E a kainnanoaki moa tuoan raoi te nano. E korea ae kangai Bauro: “Teimatoa n tuoingkami bwa kam mena n te onimaki ke kam aki ao teimatoa n tuoingkami bwa tera aromi.” (2 I-Korinto 13:5) Titirakiniko ni kangai: ‘I teimatoa ngkai n ingainga rinanon te taamnei? I tatataro nakon Iehova ni butiia taamneina? A kaotaki n au tataro bwa I onimakinna bwa e na boni buokai ni karaoa nanona? I mwanewei taeka ni kakaitau ibukin te mwakuri ni minita ae ti anganaki n au tataro nako? Tera aron anuau n au ukeuke n reirei i bon irou? Mwaitira au tai ae I kakabanea ni kananoan au iango i aoni baika I wareki ke n ongoraei? Tera arou ni boutokai bobotaki nako n te ekaretia?’ Iaiangoan aeka n titiraki aikai, e a kona ni buokiko n atai itera ake ko mamaara iai ao n atai naba arom ni kaetii.

Kariaia Kaninikoriaam Rinanon Taamnein te Atua

17, 18. (a) Tera aron raababan te mwakuri n uarongorongo ni boong aikai? (b) Ti na kanga ni kaotiota te “aki maaku” n tataekinan te rongorongo ae raoiroi ibukin Ana Tautaeka n Uea te Atua?

¹⁷ E tua ae kangai Iesu are e a tia ni kautaki nakoia taan rimwina: “Ane kam na anganaki te mwaaka ngkana e roko i aomi te taamnei ae raoiroi, ao kam na riki bwa taani kakoaua ibukiu i Ierutarem ao i Iutaia ni kabanea, ao i Tamaria ao nako tabon aonnaba.” (Mwakuri 1:8) Te mwakuri ae moa karaoana man te tai arei, e a korakora karaoana ni boong aikai n te aro ae tuai man nonoraki mai mwaina. E a kaania itua te mirion taani Kakoaua ibukin Iehova aika a tabe n tataekina rongorongon te Tautaeka n Uea n aaba aika raka i aoni 230, ike a a kabanea iai te aoa ae kaania 1.5 te birion ni katoa ririki n te mwakuri ni minita. Ai kakukureira karaoan te mwakuri ae aki okioki karaoana aei ma te ingaingannano!

¹⁸ E waakinaki te mwakuri n uarongorongo ni katobibia te aonnaba ni boong aikai i aan ana kairiri te Atua rinanon taamneina, n aron naba are n te moan tienture. Ngkana ti kataua kairirara rinanon te taamnei, ti na kaotiota iai te “aki maaku” n ara mwakuri ni minita. (Mwakuri 28:31) Mangaia are ti bia kataua kairara rinanon te taamnei ngkai ti tataekina te rongorongo ae raoiroi ibukin Ana Tautaeka n Uea te Atua!

[Kabwarabwara ae nano]

Tera ae Ko a Tia n Reiakinna?

• E aera ngkai ti kainnanoa te ninikoria n taekinan ana taeka te Atua?

• Tera ae buokiia taan rimwini Kristo ake rimoa bwa a na taetae ma te ninikoria?

• Tao tera arora ni karekea te ninikoria?

• Ti kanga ni kakabwaiaaki man ninikoriara?

[Taamnei n iteraniba 12]

A na kanga kaaro ni buokiia natiia n ninikoria?

[Taamnei n iteraniba 13]

E kona te tataro ae kimototo ni kaninikoriako n te mwakuri ni minita