Antai Mikaere ae te Anera Are Mataniwia Anera?

E AKI bati n tataekinaki te anera ae arana Mikaere n te Baibara. Ma ngkana e taekinaki, ao e boni kaotaki bwa te anera ae e mwamwakuri. N te boki ae Taniera, e taekinaki Mikaere bwa e buakania anera aika buakaka; n ana reta Iuta, e taekinaki iai bwa e kauntaeka ma Tatan; ao n Te Kaotioti, e buaka iai ma te Riaboro ao ana taimonio. E maiuakina raoi nanon arana Mikaere ae, “Antai ae ai Aron te Atua?” n arona ni boutokaa ana tautaeka Iehova, ao ni buaka ma taani kairiribai nakon te Atua. Ma bon antai raoi Mikaere?

N taai tabetai, ao e kona n ae e raka i aon teuana araia aomata. N te katoto, te baatua are Iakoba, arana naba Iteraera, ao te abotoro Betero, arana naba Timon. (Karikani Bwaai 49:1, 2; Mataio 10:2) N aron naba anne, e katereterea te Baibara bwa arani Mikaere naba teuana bon Iesu Kristo, imwain ao imwini maiuna i aon te aba. Ti na rinanoi bukina tabeua aika reke man te Baibara.

Te Anera are Mataniwia Anera. E arana Mikaere Ana Taeka te Atua bwa “mataniwia anera.” (Iuta 9) Noria bwa e aranaki Mikaere bwa te anera are mataniwia anera. E kateretereaki n aei bwa tii temanna te aeka n anera anne. Ni koauana, te taeka ae “te anera are mataniwia anera” ae kabonganaaki n te Baibara, e kaineti nakon tii temanna ao e aki bururare. Irarikina, e irekereke Iesu ma te nakoa ae mataniwia anera. E taku 1 I-Tetaronike 4:16 ni kaineti ma te Uea are kautaki are Iesu Kristo: “E na ruo mai karawa te Uea ao e na tua ni bwanaana ae bwanaani mataniwia anera.” Mangaia are e kabwarabwaraaki bwanaan Iesu bwa bwanaani mataniwia anera. E kateretereaki ngkanne n te kibu aei, bwa Iesu boni Mikaere ae te anera are mataniwia anera.

Te tia Kaira te Taanga ni Buaka. E taku te Baibara bwa “a buakana te rakon [ma ana anera] Mikaere ma ana anera.” (Te Kaotioti 12:7) Mangaia are Mikaere bon te tia Kaira aia buaka anera aika kakaonimaki. E kabwarabwaraaki naba n Te Kaotioti bwa Iesu, bon te tia Kaira te taanga ni buaka ae kaainaki irouia anera aika kakaonimaki. (Te Kaotioti 19:14-16) Ao te abotoro Bauro e taekina naba “te Uea ae Iesu” ma “ana anera aika mwaaka.” (2 I-Tetaronike 1:7; Mataio 16:27; 24:31; 1 Betero 3:22) Mangaia are te Baibara e uaia n taekina Mikaere ma “ana anera,” ao Iesu ma “ana anera.” (Mataio 13:41) Kioina ngkai e aki taekinna Ana Taeka te Atua bwa uoua aia taanga ni buaka anera aika kakaonimaki i karawa, are aongkoa teuana e kairaki irouni Mikaere ao teuana e kairaki iroun Iesu, e teretere iangoana ngkanne ae Mikaere bon Iesu Kristo ngkana e karaoa ana mwakuri i karawa.a