Antai Mataniwia Anera ae Mikaere?

Ana kaeka te Baibara

Te ara ae Mikaere, are a tataekinna Aaro tabeua bwa Santo Mikaere, bon aran Iesu imwain ao imwini maiuna i aon te aba.a E kauntaeka Mikaere ma Tatan imwini mateni Mote, ao e buoka naba te anera are e karokoa ana rongorongo te Atua iroun te burabeti are Taniera. (Taniera 10:13, 21; Iuta 9) E kakororaoa nanon arana Mikaere, ae “Antai ae ai Aron te Atua?” n arona n tei ibukin ana tautaeka te Atua, ao ni buakania taani kairiribai nakon te Atua.​—Taniera 12:1; Te Kaotioti 12:7.

Noria bwa e aera ngkai e bon tau ni kakoauaaki ae Iesu boni ngaia Mikaere are mataniwia anera.

• Mikaere boni “mataniwi anera.” (Iuta 9) Te nakoa ae “mataniwia anera” e kaoti ni kiibu aika tii uoua n te Baibara. Ngke e mwaneweaki ni kiibu akanne ao e bon tingkura, ae nanona bwa bon tii temanna te anera ae taua te nakoa anne. E kaotaki n teuana mai buakoni kiibu akanne bwa te Uea ae Iesu are e kautaki “e na ruo mai karawa  . .  ao e na tua ni bwanaana ae bwanaani mataniwia anera.” (1 I-Tetaronike 4:​16) Iai bwanaan Iesu ae “bwanaani mataniwia anera,” kioina ngkai boni ngaia Mikaere ae mataniwia anera.

• E kairiri i aoia taanga n anera Mikaere. “A buakana te rakon [ae taekan Tatan] Mikaere ma ana anera.” (Te Kaotioti 12:7) E rangi ni mwaaka i karawa Mikaere bwa e aranaki bwa “temanna i buakoia natinuea mwaane aika taiani kabanea ni kakannato” ao “te natinuea te mwaane ae kakannato.” (Taniera 10:13, 21; 12:1) E taekinna te tia rabakau n te Nu Tetemanti ae David E. Aune bwa nakoani Mikaere aikai e a kaotaki iai bwa boni ngaia “te mataniwi ae kakannato i aoia anera.”

  E taekinaki te ara riki teuana n te Baibara ae iai naba mwaakana i aoia taanga n anera. E taekinaki ae kangai: “E a kaotaki te Uea ae Iesu mai karawa ma ana anera aika mwaaka n te ai ae uramwaaka, ngkana e a karekei kaia.” (2 I-Tetaronike 1:​7, 8; Mataio 16:27) “E a tia n nako karawa [Iesu], ao a a kaakiaki i aana anera ma tautaeka ao taiani mwaaka.” (1 Betero 3:​21, 22) E na taraa ni kamanga ngkana e mwiokoa Iesu ao Mikaere te Atua bwa a na uaia ni kairiri i aoia anera. Ma e na eti riki kakoauaan ae te ara ae Iesu ao Mikaere e boni kaineti nakon te aomata temanna.

• “E na teirake” Mikaere n “tain te rawawata” ae tuai man nonoraki mai mwaina. (Taniera 12:1) N te boki ae Taniera, ao te taeka ae “teirake” e aki toki ni kaineti nakon te uea temanna ae teirake ni karaoa te bwai teuana ae okoro. (Taniera 11:​2-4, 21) E aranaki naba Iesu Kristo bwa “Ana Taeka te Atua” ao e na karaoa te bwai teuana ae okoro n rikina bwa aia “Uea ueea,” ae kamaunaaia taani kairiribai nakon te Atua ao ni kamanoia ana aomata te Atua. (Te Kaotioti 19:11-​16) E na karaoa anne n tain “te rawawata ae korakora ae tuai ni kaoti mangke e moani karikaki te aonnaba ni karokoa ngkai.”​—Mataio 24:21, 42.