Kabanean Ana Tataro Iesu n te Ruu Are i Eta

Ibukina bwa e rotaki nanona ni korakoran tangiraia ana abotoro, e a kataubobongaia raoi imwain nakona ae e a kaan. E euti matana Iesu nako karawa ao e tataro nakon Tamana ni kangai: “Kamimitonga natim bwa e aonga n neboiko natim, n aron are ko a tia n anganna te mwiokoaki i aoia aomata ni kabane, bwa e aonga n anga te maiu are aki toki natim nakoia te koraki nako ake ko anganna.”​—Ioane 17:1, 2.

E teretere bwa e ataia Iesu bwa e rangi ni kakawaki neboakin te Atua. Ma ai karaunanora te kantaninga are e taekinna Iesu ae taekan te maiu are aki toki! Ngkai e a tia n anganaki “te mwiokoaki i aoia aomata ni kabane,” e a kona Iesu ni karekei kakabwaia nakoia aomata nako man ana karea ni kaboomwi. Ma tii tabeman aika a na kakabwaiaaki. Bukin tera? Ibukina bwa e na karekei kakabwaia Iesu man ana karea ni kaboomwi tii nakoia te koraki ake a kaboraoi maiuia ma are e a manga taekinna ae kangai: “Ibukini karekean te maiu are aki toki, a riai n ataiko ae tii ngkoe te Atua ae koaua, ao n ataa naba teuare ko kanakomaia ae Iesu Kristo.”​—Ioane 17:3.

E riai te aomata ni kinaia raoi naakai ae te Tama ao te Nati ao ni karikirakea reitakina ae kaan ma ngaiia. E riai n titeboo ana namakin ma aia namakin ni baika karaoi. Ae kakawaki riki, e riai ni kakorakoraa ni kakairi n aroaroia aika a aki kona ni kabotauaki n aroia n tabeakinia aomata. E riai naba ni butimwaea ae reken te maiu are aki toki irouia aomata, bon te kauoua ni bwai ae kakawaki i rarikin neboan te Atua. E okira te boto n reirei aei Iesu ngke e kangai:

“I a tia n neboiko i aon te aba, ni katiaan te mwakuri are ko anganai bwa N na karaoia. Mangaia ae kamimitongai ngkai Tamau i rarikim, n te mimitong are mimitongiu i rarikim imwaini karikan te botannaomata.” (Ioane 17:​4, 5) Eng, e bubutii Iesu bwa e na kaokaki nakon neboakina i karawa rinanon te mangauti.

Ma e aki mwaninga Iesu te baere e a tia ni kakororaoia n ana mwakuri ni minita. E tataro ni kangai: “I a tia ni kaotiota aram nakoia aomata ake ko anganai mai buakoia kaain te aonnaba. Bon am bwai ngaiia ao ko anganai, ao a kakairi n am taeka.” (Ioane 17:6) E bati ae e karaoia Iesu n ana mwakuri ni minita nakon tii tataekinan aran te Atua ae Iehova. E buokiia ana abotoro bwa a na ataa ae nanonaki n te ara anne ae aroaron te Atua ao arona n tabeakinia aomata.

A a tia abotoro ni karekea ataakin Iehova, mwiokoan Natina ae Iesu, ao baike e angareirei iai. E nanorinano Iesu ni kangai: “I a tia n taekin nakoia taeka ake ko anganai, ao a butimwaei ao a a bon ataia ngkai ae I roko mairoum bwa N na tei ibukim, ao a a kakoauaa ae ko boni kanakomaiai.”​—Ioane 17:8.

E a ataa ngkanne te kaokoro Iesu i marenaia taan rimwina ma aomata aika kaain te aonnaba ngke e kangai: “I boni bubutii ibukia. I aki bubutii ibukia kaain te aonnaba, ma ibukia te koraki ake ko a tia n anganai, ibukina bwa bon am bwai ngaiia . . . Tamau ae ko Tabu, kawakinia ibukin aram ae ko katokaa i aou, bwa a aonga ni katiteuanaaki n arora ae ti katiteuanaaki. . . . I kamanoia, ao akea temanna ae bua bwa tii teuare e na kamaunaaki,” ae arana Iuta Itekariota are karaoa tabena ni kamwanea Iesu.​—Ioane 17:9-12.

E reitaanako ana tataro Iesu ni kangai: “A ribaaki irouia kaain te aonnaba. . . . I aki bubutiiko bwa ko na anaiia mai buakoia kaain te aonnaba, ma I butiiko bwa ko na kawakinia mairoun teuare buakaka. A aki arona aroia kaain te aonnaba, n arou naba ngai ae I aki arona aroia kaain te aonnaba.” (Ioane 17:14-16) A mena abotoro ao taan rimwin Iesu n te aonnaba, aia botaki aomata ae tautaekanaki iroun Tatan, ma a riai n teimatoa ni kaokoroia mai iai ao mani baika bubuaka ake iai. Ni kangaa?

A riai ni kateimatoa itiakia, ae kaokoroaia ni beku ibukin te Atua, ni maiuakini koaua aika kuneaki n te Baibara n Ebera, ao koaua ake e bon reireinia iai Iesu. E tataro Iesu ni kangai: “Ko na katabuia rinanon te koaua. Bon te koaua am taeka.” (Ioane 17:17) Imwina riki ao tabeman abotoro a na korei booki aika kairaki koreaia rinanon te taamnei, ake a na riki naba bwa iteran “te koaua” ae buokaki iai te aomata bwa e na itiaki.

Ma e na roko te tai are a na butimwaea iai “te koaua” tabeman. Ngaia are e tataro Iesu ‘tiaki tii ibukia naakai, [te koraki ake a mena ikanne] ma ibukia naba te koraki ake a onimakinna n aia taeka.’ Tera are e bubutii Iesu ibukia ni kabane? “Bwa a aonga ni bane n riki n teuana, n arom Tamau ae ko katiteuanaaki ma ngai, ao I katiteuanaaki ma ngkoe, ao a na katiteuanaaki naba ma ngaira.” (Ioane 17:20, 21) Bon tiaki te aomata ae tii temanna Iesu ao Tamana. A riki n tii teuana bwa a boraoi n iango ni bwaai ni kabane. E tataro Iesu bwa e na reke irouia taan rimwina te katiteuanaaki ae aron aei.

Teutana te tai imwain aei, e a tuangaki Betero ao raona tabeman iroun Iesu bwa e na nako ni katauraoa te tabo ibukia, ae taekan aia tabo i karawa. (Ioane 14:2, 3) E a uringa te iango anne Iesu ngke e tataro ni kangai: “Tamau, I tangiriia te koraki ake ko anganai bwa a na mena ike I mena naba iai, bwa a aonga n nora mimitongiu are ko anganai, ibukina bwa ko a kaman tangirai mai mwaini moan rikin te botannaomata.” (Ioane 17:24) Ngaia are e a kakoauaa bwa ni boong ake ngkoa imwain ae a karikiia natiia Atam ao Ewa, ao e a kaman tangira Natina te Atua ae ana rikitemanna are e riki bwa Iesu Kristo.

Ngke e motika ana tataro Iesu, e a manga kamataataa riki aran Tamana ao ana tangira te Atua ibukia abotoro ao ibukia tabemwaang ake a na manga butimwaea “te koaua,” ngke e kangai: “I a tia ni kaota aram nakoia ao N na boni manga kaotia, bwa e aonga ni mena i nanoia te tangira are ko tangirai iai, ao N na katiteuanaaki ma ngaiia.”​—Ioane 17:26.